MAQSADIMIZ – XALQIMIZGA XIZMAT QILISh
Yaqin oʻtmishda qoloq va agrar respublika boʻlgan, iqtisodiyotining asosini faqat paxta xomashyosini yetishtirish va qayta ishlash korxonalari tashkil etgan Oʻzbekistonimizda istiqlol yillarida barcha sohalarda ulkan yuksalishlarga erishildi. Umuman yangi soha – kichik biznes va xususiy tadbirkorlikka keng yoʻl ochilib, ayni kunda ishlab chiqarilayotgan yalpi ichki mahsulotning 60 foizdan ziyodi shu tarmoq hissasiga toʻgʻri kelayapti. Mamlakatimizdagi jami ish bilan band aholining 80 foizga yaqini aynan shu sohada mehnat qilishmoqda. Tadbirkorlar jamiyatimizning tayanchiga, suyanchiga aylanishmoqda. Xotin-qizlarga doimiy eʼtibor berilib, ularning jamiyat hayotidagi faolligini oshirishga, oʻz iqtidorlarini toʻla roʻyobga chiqarishlariga shart-sharoitlar yaratildi.
Shu boisdan men ham 2004-yilda tumanimiz aholisiga transport xizmati koʻrsatuvchi "Goʻzaloy Mahmud qizi” masʼuliyati cheklangan jamiyatini tuzib, faoliyatimni boshlagan edim. Imtiyozli kreditlar evaziga yoʻlovchi tashishga moʻljallangan avtobuslar sotib oldik va belgilangan yoʻnalishlar boʻyicha xizmat koʻrsata boshladik.
Davr bilan hamnafas boʻlib, oʻz korxonamda xizmat koʻrsatish sifatini yaxshilash, mijozlar uchun yaxshi sharoitlar yaratish maqsadida 2010 yilda Mangʻit shahrining buyum bozori yonida yangi, zamonaviy uslubda xususiy avtoshohbekat qurdik.
Shuningdek, avtoshohbekat yonida yoʻlovchilar uchun kutish joyi, avtomashinalarga texnik xizmat koʻrsatish shoxobchasi hamda salqin ichimliklar bilan savdo qiluvchi doʻkon ham xalqimizga xizmat koʻrsatmoqda.
Ayni kunda ham ikkita avtobusimiz, mikroavtobuslarimiz xalqimizga namunali transport xizmati koʻrsatmoqda.
Tadbirkorlarning oʻz biznesini rivojlantirishlari, faoliyatini kengaytirishlari uchun yaratilayotgan imkoniyatlar tufayli joriy yilda kredit hisobiga yana besh dona "Gazel” rusumli yoʻlovchi tashishga moʻljallangan mashina sotib oldik va xizmat koʻrsatishni boshladi. Yana 12 ta yengil mashina olish arafasidamiz.
Yurtdoshlarimiz dasturxoni toʻkin boʻlishiga hissa qoʻshish maqsadida 5 gektarerda bogʻ yaratib, bu yil ilk hosilini davlatimizga topshirdik.
Bizga bunday imkoniyatlar mamlakatimiz mustaqilligi tufayli yaratildi. Har gal tumanimizning, respublikamizning turli hududlariga yoʻl olayotgan avtomashinalarimizdagi yoʻlovchilarning nigohidagi minnatdorchilikni koʻrganimda oʻz faoliyatimdan mamnun boʻlib ketaman.
Maqsadimiz xalqimizga namunali xizmat qilishdir. Bizni bugungiday dorilomon va farovon kunlarga yetkazgan mustaqilligimizning 25 yilligi bilan tumanimizning barcha xalqini qizgʻin tabriklayman. Doimo safari bexatar boʻlishini tilab qolaman.
Gulbahor QURBONBEKOVA,
"Goʻzaloy Mahmud qizi” MChJ raisi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
