32 MING 840 TONNALIK “OQ OLTIN” XIRMONI TAYYoR!
Mehnatda toblangan, yer bilan tillashib, ishning koʻzini biladigan fidoyi va mirishkor paxtakorlarimiz bu yil ham anʼanaga sodiq qolgan holda Respublikamizda birinchi boʻlib davlatga paxta sotish boʻyicha shartnomaviy rejasini ortigʻi bilan bajardilar. 2016-yil 27-sentyabr kuni, 17 ish kunida davlat xazinasiga topshirilgan Amudaryo "oq oltin”i 32 ming 840 tonnadan oshib ketdi.
Aytish kerakki, Oʻzbekiston Respublikasining Birinchi Prezidenti Islom Karimov rahbarligida agrar sohada amalga oshirilgan islohotlar, hukumatimiz va Respublika rahbariyati tomonidan sohada yangi tizimning joriy qilinishi, paxta yetishtirishni yanada takomillashtirish borasida olib borilayotgan keng koʻlamli ishlar va dehqonlarimizning fidoyi mehnatlari paxtadan moʻl hosil olishga zamin yaratdi.
Yerlarni ekishga tayyorlash, chigit ekish, dalalarni begona oʻtlardan tozalash va yaganalash, gʻoʻza qator oralariga ishlov berish, gʻoʻza nihollarini oziqlantirish va zararkunandalardan himoya qilish, chilpish, defoliatsiya kabi agrotexnik tadbirlarning oʻz vaqtida va sifatli oʻtkazilgani bugungi yuksak xirmonning asosi boʻldi.
Eng muhimi, yigʻim-terim ishlari uyushqoqlik bilan, yangi tizim asosida tashkil qilindi. Bunda terimning otryad usulida olib borilishi katta samara berdi. Fermer xoʻjaliklarining ishchilari va pudratchilari, muassasa, korxona va tashkilotlarning ishchi-xizmatchilari, ovul va mahallalardagi uyushmagan aholi va Nukus davlat pedagogika instituti talabalaridan iborat terimchilar zahmatli mehnatlari bilan yuksak xirmon bunyod etdilar.
Terimchilar va hasharchilarga ishlash va dam olish uchun barcha zarur sharoitlar yaratilgani, terim pullarining oʻz vaqtida berilishi, hosilning toʻliq yuqori navlarga topshirilishi pudratchi va hasharchilarning moddiy manfaatdorligini, fermer xoʻjaliklarining iqtisodiy qudratini yanada yuksaltirdi. Jumladan, tijorat banklari tomonidan shu kungacha jami 9 milliard 359 million soʻmdan ortiq naqd pul mablagʻlari terim puli sifatida tarqatildi, fermer xoʻjaliklarimizning paxtadan olgan daromadlari 43 milliard 773 million soʻmdan oshib ketdi.
Tumanimiz paxtakorlari dalalarimizdagi moʻl hosilning bir misqolini ham nobud qilmasdan, yana qoʻshimcha 12 ming 500 tonna "oq oltin” topshirib, mamlakatimizning ulkan xirmoniga oʻzlarining munosib hissalarini qoʻshish niyatida mehnat qilmoqdalar.
Fursatdan foydalanib, paxta yetishtirish va yigʻib-terib olishda faol ishtirok etgan fidoyilarni bugungi mehnat zafari bilan chin qalbimizdan muborakbod etamiz! Halol mehnatingizning rohatini koʻring, azizlar!
Anvar YuLDAShEV,
tuman Qishloq va suv xoʻjaligi boʻlimi boshligʻi, Qoraqalpogʻiston Respublikasi Joʻqorgʻi Kengesi deputati, Oʻzbekiston Respublikasida xizmat koʻrsatgan paxtakor.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
