Pillakorlar tilidan

TOʻYGA TOʻYoNA BILAN

Ipak qurti boqishning oʻziga xos mashaqqatlari va zavqi borligini faqat biz pillakorlargina chuqur his qilamiz. Albatta, har ishning oʻzgacha mashaqqati va mehnatlari boʻladi. Ipak qurtlari ulgʻaygan sari uning ozuqaga boʻlgan talabi oshib boradi. Ozuqa tayyorlash, yaʼni, tutzorga borib tut novdalarini oʻrish va tashib keltirib, qurtxonalardagi ipak qurtlariga yetkazib berish serzahmat ish albatta. Bunda yarim soat yoki bir soat oʻtirib hordiq chiqarishga vaqt topish amri mahol, kecha-yu kunduz qilingan barakali mehnatlar tufayligina moʻl pilla hosili yetishtiriladi.

Bu yilgi mavsumda bir yarim quti ipak qurtlarini mehr bilan parvarishlab, moʻl pilla hosili yetishtirdik, rejadagi 102 kilogramm oʻrniga 137 kilogramm aʼlo navli "kumush tola” topshirdik. Bu biz pillakorlarning mustaqilligimizning qutlugʻ 22 yillik toʻyiga munosib toʻyonamiz boʻladi. Toʻyga toʻyona bilan borish esa xalqimizning eng yaxshi udumidir.

Murod Davletov,

"Davlatboyev Sobir” fermer xoʻjaligi pillakori.

BIZNING SOVFAMIZ

Pillakorlar safida ishlayotganimga oʻn besh yil toʻlmoqda. Shundan buyon har yili bahorda ipak qurti boqib, moʻl hosil olishni oʻzimizga odat qilib oldik. Bu yil ham 23-aprel kuni bir qurti ipak qurtini olib, mavsum davomida yaxshi parvarish qildik. Bunda oilamizning barcha aʼzolari mehnat qildilar. Jumladan, turmush oʻrtogʻim Bekchon Bobotoyev tutzorimizdagi tut novdalarini oʻrib keltirsa, Oysulton, Guliston va Sherzod ismli oʻgʻil-qizlarim ipak qurtlarini oziqlantirishda mengayaqindan yordam berdilar. Ayniqsa, ipak qurtlari toʻrt va besh yoshga kirganlarida kunni-tunga ulab mehnat qildik. Natijada pillalar boʻliq, ipakchanligi yuqori boʻldi, moʻl hosil olishga erishdik.

Bu yilgi mavsumda bir quti ipak qurtidan rejadagi 65 kilogramm oʻrniga roppa-rosa 90 kilogramm aʼlo navli pilla hosilini yetishtirib, davlat hazinasiga topshirdik. Bu oila aʼzolarimizning tumanimizning yuksakpilla xirmoniga qoʻshgan munosib hissasi va mustaqilligimizning 22 yillik bayramiga sovgʻamiz boʻldi, deb oʻylayman.

Gulzira Abdullayeva,

"Feruza Oxun” fermer xoʻjaligi pillakori.

YuRT BOYLIGIGA BOYLIK QOʻShIB

Xalqimiz pillani sevib-ardoqlab yetti xazinaning biri, deb hisoblaydi va pillamiz-tillamiz, deya eʼzozlaydi. Aslida ham ipak qurtlari xosiyatli jonivor boʻlib, xonadonga baraka keltiradi, oila aʼzolarini mehnatsevarlikka, bahamjihat boʻlib ishlashga chorlaydi.Mana yigirma besh yildirki, xonadonimizda ipak qurti boqib kelinadi. Har yili bahor kelishi bilanoq ipak qurti boqish taraddudini koʻramiz. Erta bahordan tutzorimizni oziqlantirib, sugʻoramiz. Negaki, ipak qurti boqish davrida ozuqa moʻl boʻlsa, bu borada tashvish boʻlmaydi.Ipak qurtlariga oʻz vaqtida tut bargi ozuqasini yetarli miqdorda yetkazib berib turilsa, qurtxonalar harorati meʼyorida saqlansa, xona havosi tez-tez shamollatib tozalab turilsa, bas. Ipak qurtlari toʻyib oziqlanadi va moʻl pilla hosili yetishtirilishini taʼminlaydi.

Bu yilgi mavsumda ham har yilgidek moʻl pilla hosili yetishtirishga muvaffaq boʻldik. Bir qutidan ortiqroq ipak qurti boqib, el xirmoniga 108 kilogramm aʼlo navli pilla hosilini topshirdik. Bu bilan yurt boyligiga boylik qoʻshdik.

Shohida OTAJONOVA,

"Otajonov Shukurulo” fermer xoʻjaligi pillakori.

ISTIQBOLLI REJALAR

Joriy 2013-yil boshidan boshlab tumanimizda pillachilikni yanada rivojlantirish maqsadida "Yulduz-pilla” MChJ tashkil topdi. Aniq va istiqbolli rejalar ishlab chiqildi. Mangʻit paxta tozalash zavodi "Yulduz” hissadorlik jamiyati homiyligida uch joyda – "Amudaryo-Panasham” fermer xoʻjaligida, "Qipchoq” paxta qabul qilish va saqlash maskani yonida va "Oq oltin” ovulida loyiha boʻyicha har birida 70 qutidan jami 210 quti ipak qurtlari boqiladigan qurtxonalar qurilib, qurt boqish mavsumigacha foydalanishga topshirildi hamda mana shu uchala qurtxonalarning har birida 70 quti ipak qurtlari boqishga kirishildi. Lekin ipak qurtlari uch-toʻrt yoshdan boshlab bu qurtxonalarning hajmi torlik qilishi maʼlum boʻldi. Buni biz eʼtiborga olib, kelgusi 2014-yil boshida mazkur qurtxonalar bilan yonma-yon yana shunday uchta qurtxona qurishni rejalashtirib oldik.

Ipak qurti boqish mavsumi jarayonida har bir qurtxonaga 45-50 nafardan mavsumiy ishchi qabul qilindi va bu yilgi ipak qurti boqish mavsumi muvaffaqiyatli oʻtdi. Faqat ipak qurtlarining ozuqa zahiralari yetishmovchiligidan ancha qiynaldik, xolos. Shuni inobatga olib, yangi tutzorlar tashkil qilishni istiqbolli rejamizga kiritib qoʻydik.

Mana, nihoyat yangi qurtxonalarimizda boqilgan jami 210 quti ipak qurtlaridan shartnomaviy rejadagi 13210 kilogramm oʻrniga 14000 kilogrammga yaqin aʼlo navli pilla hosili yetishtirildi. Bunda koʻp yillik boy tajribaga ega boʻlgan malakali pillakor agronomlarimizdan Bibisara Qoʻchqorova, Bibirabo Xalillayeva va Bobojon Tojiboyevlarning qurtxona ishlarini mohirlik bilan tashkil etganligini va ish jarayonlarida mahorat koʻrsatganliklarini alohida koʻrsatib oʻtish joizdir.

Omonboy ERDOShEV,

"Yulduz-pilla” MChJ rahbari.