YuTUQLAR SALMOQLI, REJALAR YaNA HAM YuKSAK

Yakunlangan 2016-yil Mangʻit shahridagi Bolalar-oʻsmirlar sport maktabi ustoz-murabbiylari, tarbiyalanuvchilari uchun muvaffaqiyatlarga boy yil boʻldi. Sportning 16 turi bilan muntazam shugʻullanayotgan 1700 nafarga yaqin oʻgʻil-qizlar bilan 45 nafar ustoz-murabbiylarning mashgʻulotlarni qatʼiy intizom asosida va qunt bilan olib borayotganligi oʻz samarasini bermoqda. Bunda oʻsib kelayotgan yosh-avlodning jismoniy va maʼnaviy barkamol insonlar boʻlib yetishishiga davlatimizning koʻrsatayotgan cheksiz gʻamxoʻrligi muhim asos boʻlayotir.

Yakunlangan yilning oxirgi oylariga nazar solsak, 18 noyabrda Toshkent viloyatining Chinoz shahrida boʻlib oʻtgan xalqaro turnirda sport maktabimiz tarbiyalanuvchisi Muhiddin Qozoqboyev dzyu-do kurashi boʻyicha 81 kilogrammgacha boʻlgan vazndagi polvonlar orasida birinchi oʻrinni, 21-noyabrda Namangan shahrida boʻlib oʻtgan turnirda esa faxrli uchinchi oʻrinni egalladi. 24 dekabrda Nukus shahrida "Yoshlik” jismoniy tarbiya va sport jamiyati birinchiligi uchun oʻtkazilgan dzyu-do bellashuvida 32 kg. vaznda Komron Endirboyev birinchi, 46 kg. vaznda Odilbek Bozorboyev birinchi, kurash boʻyicha Muhiddin Rajabov 60 kg. vaznda birinchi oʻrinni egalladilar.

19-dekabr kuni Samarqand shahrida boʻlib oʻtgan karate-do boʻyicha "Qorbobo kubogi” xalqaro turnirida Quvonchbek Safarboyev va Qunduzoy Jalilovalar oʻz vazn toifalarida birinchi oʻrinlarni yengib oldilar.

Eng ommaviy sport turlaridan boʻlgan shaxmat boʻyicha oʻtkazilgan Qoraqalpogʻiston chempionatida SaidbekQadamboyev, Ogʻabek Toʻrayev, Sevinch Safarboyeva, Sadoqat Rahimovalar gʻoliblikni qoʻlga kiritgan boʻlsa, taekvando WTF boʻyicha "Yoshlik” jismoniy tarbiya va sport jamiyati birinchiligida Kumush Norimbetova ikkinchi, ogʻir atletika boʻyicha Otabek Rajabov, Baxtiyor Murodovlar uchinchi oʻrinlarni egalladilar.

Shuningdek, yosh futbolchilarimiz Qoraqalpogʻiston Respublikasi Bolalar ligasi sport musobaqasida ikkinchi, basketbolchilar jamoasi birinchi oʻrinni zabt etganlari yakunlangan yilning eng esda qolarli voqealaridan biri boʻldi.

2016-yilning 11-noyabrida boks boʻyicha boʻlib oʻtgan Qoraqalpogʻiston Respublikasi kubogida Ogʻabek Davlatboyev birinchi oʻrinni egallagan boʻlsa, 29-dekabr kuni Qoraqalpogʻiston Respublikasi "Yoshlik” jismoniy tarbiya va sport jamiyati birinchiligida Gʻiyos Otajonov oʻz vazn toifasida gʻolib boʻldi.

Bolalar-oʻsmirlar sport maktabi direktori Chorsham Tojimurodov 2016-yilda kurash boʻyicha xalqaro turnir va Oʻzbekiston miqyosida oʻtkazilgan musobaqalarda faol hakamlik, yoshlarga namunali ustozlik qilgani uchun "Yilning eng yaxshi hakami” nominatsiyasi boʻyicha gʻolib boʻldi.

Sport maktab oʻqituvchi-murabbiylari joriy yilda yosh sportchilarning gʻalabalarini yanada koʻpaytirish, sportning ommaviyligiga erishish niyatida mashgʻulotlarni qunt bilan olib borishmoqda.

Maxsud KENJAYeV,

Bolalar-oʻsmirlar sport maktabi direktori oʻrinbosari.