Xalq qabulxonalari – inson manfaatlari garovi

Prezidentimiz Shavkat Mirziyoyev Oʻzbekiston Respublikasi Konstitutsiyasi qabul qilinganligining 24 yilligiga bagʻishlangan tantanali marosimdagi maʼruzasida 2017-yilni mamlakatimizda "Xalq bilan muloqot va inson manfaatlari yili” deb eʼlon qilar ekan, "Avvalo, "Xalq bilan muloqot va inson manfaatlari yili”ning asosiy maqsad va vazifalaridan kelib chiqqan holda, davlat organlarining fuqarolar bilan oʻzaro munosabatlari yuzasidan yondashuvni tubdan qayta koʻrib chiqish zarur. Bu borada aholi bilan doimiy muloqot qilish, ularni qiynayotgan muammolarni hal etishning yangi mexanizmlari va samarali usullarini joriy etishimiz darkor”, - deya alohida taʼkidlab, har bir tuman va shaharda "Xalq qabulxonalari”ni tashkil etish va ularning toʻlaqonli faoliyat koʻrsatishini taʼminlash zarurligini ham qayd etib oʻtdilar.

Shuningdek, Prezidentimiz 2016-yil 28-dekabr kuni "Jismoniy va yuridik shaxslarning murojaatlari bilan ishlash tizimini tubdan takomillashtirishga doir chora-tadbirlar toʻgʻrisida”gi Farmonga imzo chekdi. Mazkur Farmon esa "Xalq qabulxonalari”ni tashkil etish va faoliyat yuritish tartib-taomillarini mufassal belgilab berdi. Unga koʻra, Oʻzbekiston Respublikasi Prezidentining Xalq qabulxonasi, Qoraqalpogʻiston Respublikasi, viloyatlar va Toshkent shahrida, shuningdek, har bir tuman va shaharda Oʻzbekiston Respublikasi Prezidentining Xalq qabulxonalari hamda Oʻzbekiston Respublikasi Prezidentining virtual qabulxonasi tuziladigan boʻldi.

Kelib tushgan murojaatlar "Jismoniy va yuridik shaxslarning murojaatlari toʻgʻrisida”gi Oʻzbekiston Respublikasi Qonuniga qatʼiy amal qilgan holda, toʻliq, xolis va oʻz vaqtida koʻrib chiqilishini taʼminlash, kelib tushgan va tegishliligi boʻyicha davlat organlari va xoʻjalik boshqaruvi organlariga yuborilgan murojaatlar koʻrib chiqilishi ustidan tizimli monitoring va nazoratni amalga oshirish, jismoniy shaxslarning va yuridik shaxslar vakillarining qabullarini davlat organlari va xoʻjalik boshqaruvi organlarining mansabdor shaxslari ishtirokida, shu jumladan videokonferentsaloqa orqali oʻtkazish, kelib tushayotgan murojaatlarning qayd etilishi, umumlashtirilishi, tizimlashtirilishi va koʻrib chiqilishi ustidan nazorat qilinishi boʻyicha yagona elektron axborot tizimini joriy etish orqali murojaatlar bilan ishlashda zamonaviy axborot-kommunikatsiya texnologiyalaridan keng foydalanish Xalq qabulxonalari va Virtual qabulxonaning asosiy vazifalari etib belgilangan.

Bu bilan davlatinson, uning hayoti, erkinligi, shaʼni, qadr-qimmati va boshqa daxlsiz huquqlarini oliy qadriyat sifatida tan olgan holda, fuqaroning har bir murojaatini eʼtiborsiz qoldirmaslik taʼminlanadi hamda huquqni qoʻllash amaliyotida qanday boʻshliqlar mavjudligini aniqlash imkonini berib, amaldagi qonun hujjatlariga tegishli oʻzgartish va qoʻshimchalar kiritilishiga asos boʻladi.

Xalq bilan muloqotning ushbu oʻziga xos yoʻnalishlari inson manfaatlarining yuksalishiga, davlat organlarining fuqarolar bilan oʻzaro munosabatlarining tubdan takomillashishiga, bir soʻz bilan aytganda, aholi bilan doimiy muloqot qilish, ularni oʻylantirayotgan muammolarni hal etishning yangi mexanizmlari va samarali usullarini topish uchun imkoniyat yaratadi.

Elmurod TURSUNOV,

Qoraqalpogʻiston Respublikasi Adliya vazirligi Jamoat, nodavlat notijorat va diniy tashkilotlar boʻlimi boshligʻi.

(Foto - http://kun.uz)