YaNGI OʻQUV YILI YaNGI BINODA
Davlatimiz rahbari I.A.Karimov taʼkidlaganidek, dunyo imoratlari ichida eng ulugʻi maktab boʻlsa, kasblar ichida eng sharaflisi oʻqituvchilik va murabbiylikdir. Qalbi ezgulik va mehrga limmo-lim muallimlarning masʼuliyatli mehnati tufayli yosh avlod ilm-maʼrifatga oshno boʻlib ulgʻayadi, kelajakning ishonchli vorislariga aylanadi.
Yakunlangan 2012-2013 oʻquv yili biz 19-son maktab jamoasi uchun samarali yil boʻldi. Uzoq yillar jamoamizga rahbarlik qilib hammamizga ustoz boʻlgan raxmatlik Doʻsimbat aka Yeshimbetovning ishlarini bugun shogirdlari davom ettirishayapti. Bugungi kunda mazkur taʼlim dargohida 532 oʻquvchi tahsil olmoqda. Ularga 66 nafar malakali oʻqituvchi taʼlim-tarbiya bermoqda. Darslar aniq reja, yoshlar salohiyatini rivojlantirishga qaratilgan ilgʻor pedagogik texnologiyalar asosida tashkil etilgan. Bir qancha fan va sport toʻgaraklari faoliyat koʻrsatmoqda. Oʻquvchilarning yozgi taʼtil davrida maktabimizda "Ohu” oromgohi tashkil qilinib, bolalarning boʻsh vaqtini mazmunli oʻtkazishda E.Xoʻjanova, G.Otajonova, G.Qoziyeva, M.Sobirova, Ye.Saparboyeva singari ustozlar tashabbuskor boʻldilar. Joriy, 2012-2013 oʻquv yilida 9-sinfni bitiruvchi oʻquvchilar soni 72 nafarni tashkil etdi. Ulardan 19 nafarining hujjatlari 3-sonli akademik litseyga, 53 nafarining hujjatlari kasb-hunar kollejlariga topshirildi va qabul qilindi.
Quvonarlisi shuki, yangi oʻquv yili kapital rekonstruktsiya qilingan va qoʻshimcha 10 ta xona qurilgan yangicha qiyofadagi maktabda boshlanadi. Pedagog oʻqituvchilarning mehnati natijasiga qarab kelajagimiz belgilanar ekan, biz oʻqituvchilar yosh avlodni tarbiyalash jarayonida tinmay izlanish, zarur barcha bilim, koʻnikma, malakalarni egallab, ertangi kunimizning egalari – yuksak maʼnaviyatli, komil insonlar boʻlib yetishishlari uchun barcha imkoniyatlardan foydalanamiz.
Farzandlarimizning kamolga yetishlari, baxtu saodati yoʻlida havas qilsa arzigulik ishlar amalga oshirilayotgani uchun davlatimiz rahbaridan minnatdormiz.
Liza OʻROZBOYeVA,
19-maktab direktorining oʻquv ishlari boʻyicha oʻrinbosari.
(Foto - http://www.qashqadaryogz.uz)
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
