SIL – MAKKOR KASALLIK
Sil yuqumli kasallik boʻlib, uni koʻzga koʻrinmaydigan mayda bakteriyalar – sil tayoqchalari yuzaga keltiradi. Koʻp hollarda sil tayoqchalari oʻpkani zararlaydi. Baʼzi hollarda miya va miya qobigʻi, suyaklar, boʻgʻinlar, buyraklar, jinsiy aʼzolar, koʻz va ichak sili uchrashi mumkin. Sil tayoqchalari organizmga nafas yoʻli orqali oʻtadi, oʻpka toʻqimalarida rivojlanadi va koʻpayadi.Sil bakteriyalari bemor yoʻtalganda, aksirganda, qattiq gaplashganda, tupurganda balgʻam zarralari bilan tarqaladi. Bu koʻzga koʻrinmas balgʻam zarralarida minglab sil tayoqchalari boʻladi, ular havoda, ayniqsa, xona havosida uzoq vaqt saqlanib qoladi.
Kasallikning rivojlanishi organizmning kasallikka qarshi kurashuvchanligiga bogʻliq. Sogʻlom turmush tarziga rioya qilmaslik, vaqtida dam olmaslik, giyohvandlik, kashandalik, spirtli ichimliklarga ruju qoʻyish, kasallika qarshi kurashuvchanlik xususiyatlarini susaytiradi hamda sil kasalligining rivojlanishiga zamin yaratadi.
Sil – makkor kasallik. Makkorligi shundaki, u koʻp hollarda gripp yoki nafas yoʻllarining shamollashi niqobi ostida kechadi. Nafas yoʻllarining shamollashida ishlatiladigan dorilar esa sil tayoqchalarini oʻldira olmaydi. Oqibatda odam kasallikni oʻtkazib yuboradi. Agar bemor vaqtida davolanmasa, yoʻtal kuchayib, balgʻam ajralib chiqadi, baʼzan qon tupuradi. Bunda yoʻtal 2 hafta ortiq davom etadi, isitma koʻtariladi, darmoni qurib, tez charchaydi, ozib ketadi, ishtaha boʻlmaydi, koʻkrak qafasida ogʻriq paydo boʻladi.
Shuni unutmangki, shifokorga qanchalik erta murojaat qilinsa, davolanish shunchalik samarali boʻladi. Chunki sil kasalligi bedavo emas, oʻz vaqtida toʻgʻri davolansa, bu kasallikdan butunlay sogʻayish mumkin.
Sil irsiy kasallik emas, u nasldan-naslga oʻtmaydi. Faqat yaqin muloqotda boʻlganligi sababli, bemorning oila aʼzolariga kasallikning yuqish ehtimoli yuqori boʻladi.
Sil kasalligini aniqlash va davolash xizmatlari bepul.
Hozirgi vaqtda silga qarshi emlash (BTsJ) tugʻruqxonada, chaqaloq hayotining birinchi kunlarida oʻtkaziladi. Emlashning taʼsiri 5-7-yildan keyin kamayadi. Shu munosabat bilan qayta emlanish oʻtkaziladi.
Salomatlik deb atalmish buyuk neʼmatning qadriga uni yoʻqotmasdan turib yeting!
(Foto - pressnews.uz)
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
