Epizootolog-veterinar ogohlantiradi: QUTURISh – OʻTA XAVFLI KASALLIK

Quturish kasalligi – bu oʻta yuqumli va xavfli kasallik hisoblanadi. Kasallik bilan issiq qonli yovvoyi va uy hayvonlari hamda odamlar kasallanadi.

Quturish kasalligining oldini olish va unga qarshi kurashish boʻyicha Oʻzbekiston Respublikasi Vazirlar Mahkamasining 2011-yil 8 iyuldagi «Qarovsiz qolgan hayvonlarni tutish va saqlash bilan bogʻliq xizmatlar faoliyatini takomillishtirish chora-tadbirlari toʻgʻrisida»gi 202-sonli qarori ijrosini taʼminlash maqsadida tuman IIB, DSENM, Veterinariya boʻlimi, tuman Obodonlashtirish boshqarmasi va koʻp tarmoqli markaziy poliklinika bilan hamkorlikda ish olib borilmoqda.

Kasal hayvon kasallik qoʻzgʻatuvchi manba hisoblanadi. Kasal hayvon tishlaganda uning soʻlagi teridagi tirnalgan yoki yara joylarga tushganda kasallik yuqadi. Kasallik koʻzgʻatuvchisi kasal hayvon soʻlagida kasallik belgilari paydo boʻlishidan 10 kun oldin paydo boʻladi. Shuning uchun tishlagan hayvon yaxshi holatda edi-ku, deb oʻylamaslik kerak.

Eʼtibor bersak, hayvonlar tishlashidan koʻp holatlarda bolalar jabrlanadi. Shuning uchun bolalarning, ayniqsa daydi it, mushuklar bilan muloqotda boʻlmasligini taʼminlash zarur.

Uy hayvonlari, albatta, davlat Veterinariya boʻlinmalarida hisobga qoʻyilgan boʻlishi va har yili quturish kasalligiga qarshi emlanishi zarur.

Qaramogʻingizdagi hayvon har qanday kasallikka chalinganda va ayniqsa quturish kasalligi belgilari paydo boʻlganda yashash joyingizdagi veterinariya boʻlimlariga zudlik bilan murojaat qiling. Zinhor oʻzingiz davolashga harakat qilmang, bu bilan siz oʻzingiz va yaqinlaringiz hayotini xavf ostiga qoʻyasiz.

Agar sizning itingiz biror kishini tishlab olsa, holatni yoki hayvonni bekitishga harakat qilmasdan, jabrlangan shaxsga oʻzingizning manzilingizni bering va it yoki mushugingizni koʻrikdan oʻtkazish uchun yashash joyingizdagi  veterinariya mutaxassislariga murojaat qiling. Tishlagan hayvon 10 kun davomida veterinariya mutaxassislari kuzatuvida boʻladi.

Hayvon uchun uning egasi Vazirlar Mahkamasining 2011 yil 8-iyuldagi 202-sonli qarori bilan tasdiqlangan «Aholi punktlarida itlar va mushuklarni saqlash qoidalari»ga asosan toʻliq maʼmuriy javobgar hisoblanadi.

Kasal hayvondan jabrlanganda faqatgina toʻliq profilaktik emlash kursini olish bilan quturish kasalligining oldini olish mumkin.

Quturish kasalligi oʻta xavfli kasallik. Shuning uchun kasallikni davolashdan koʻra uning oldini olish afzaldir. Oʻz it va mushuklaringizni vaqtida emlatsangiz,  kasallikning oldini olgan boʻlasiz.

B.Bekchanov,

tuman Veterinariya boʻlimining epizootolog-veterinar vrachi.

(Foto - http://avitsenna.uz)