MUSTAQILLIK – ALLOHNING ULUGʻ NEʼMATIDIR

Bugun jannatmakon yurtimiz mustaqilligining 26 yilligi bayramini  katta shodiyonalar bilan nishonlayapmiz. Bu kunlarni koʻrish orzusida bir necha avlodlarimiz umid va hasratda dunyodan oʻtib ketishdi. Darhaqiqat, mamlakatimizda mustaqillik yillarida amalga oshirilgan bunyodkorlik ishlari shahar va qishloqlarimiz qiyofasini butunlay oʻzgartirib, yubordi. Muqaddas dinimiz, milliy qadriyatlarimiz qaytadan ravnaq topa boshladi.

Hozirgi paytda Oʻzbekistonda ikki mingdan ziyod masjid faoliyat koʻrsatmoqda. Har yili besh ming nafar hamyurtimiz islom dinining asosiy arkonlaridan biri haj ibodatini, umra ziyoratini ado etishga muyassar boʻlmoqdalar.

Azizlar, mustaqillik yillarida mamlakatimizda amalga oshirilgan barcha sohadagi islohot va oʻzgarishlarga diqqat bilan nazar solsak, ularning markazida inson manfaatlari turganiga guvoh boʻlamiz.

Tarixga nazar tashlansa, hamma davrda ham davlatning rivojlanishi, taraqqiy topishi jamiyatning farovon va osoyishta hayot kechirishiga bogʻliqligi ayon boʻladi. Shuning uchun ham Paygʻambarimiz (s.a.v.) hadislarining birida tinchlik-xotirjamlik eng katta neʼmat ekanligini taʼkidlab shunday deganlar:

"Ikki neʼmat borki, koʻpchilik insonlar uning qadriga yetmaydilar. U – xotirjamlik va sihat-salomatlik”.

Tinchlik qaror topgan yurtda xotirjamlik hukm suradi, jamiyatda har tomonlama yuksalish va rivojlanish roʻy beradi. Odamlarning oʻzaro bir-birlariga boʻlgan ishonch va sadoqatlari, mehr va muruvvatlarining samimiy boʻlishi ham asosan xotirjamlikka bogʻliqdir. Demak, dunyoda hayotning bir maromda davom etishi, xalqning Haq taolo buyurgan ishlarini mukammal va xotirjam ado etishlari uchun tinchlik va osoyishtalik lozim.

Qurʼoni Karim taʼlim beradiki, har qanday shakldagi zulm va zoʻravonlik islom aqidasiga tubdan qarama-qarshidir va bironta musulmon ana shunday jinoyatni sodir etishi mumkin emas.

Islom dini kishilarni tinchlikni asrash va barqarorlikni taʼminlash yoʻlida imon,  hamjihatlik va birdamlik bilan harakat qilishga, fitna va oʻzaro adovatga barham berishga chaqiradi, tinchlikparvarlik islom dinining mohiyatini tashkil etadi. Barchamiz ona Vatanimizdagi tinch, osoyishta va farovon hayotning qadriga yetib, shu farovon, osuda hayotni yanada mustahkamlash uchun oʻz hissamizni qoʻshib, el-yurt taqdiri, kelajagi uchun qaygʻurib yashaylik.

Azizlar, yaxshilik qilishdan charchamaylik. Binobarin, bu hayotda insondan faqat savobli amal va yaxshilikkina qoladi.

Ushbu saodatli kunlarda jannatmakon diyorimizda yashovchi barcha yurtdoshlarimizni mustaqillik bayrami bilan samimiy muborakbod etaman. Alloh taolodan bu ulugʻ bayramni barchamiz uchun xursandchilik, shodu xurramlik va hamjihatlikda oʻtkazishlikni soʻraymiz.

Rajabboy HABIBULLAYeV,

"Hoji Eshon bobo” jomʼe masjidi imomi.

(Foto - http://ijod.uz)