YuTUQLARDA HISSAMIZ BOR

Tumanimizda paxta yigʻim-terim qizgʻin davom etayotgan bir pallada muxbirimiz moʻl paxta hosili yetishtirish va uni yigʻib-terib olish ishlarida faollik koʻrsatgan jamoalar rahbarlari bilan suhbat qildi.

Quyida ushbu suhbat mazmunini eʼtiboringizga havola qilamiz.

Muxbir: – Ayni kunda tumanimiz qishloq xoʻjaligi mehnatkashlari davlatga paxta topshirishning shartnomaviy rejalarini bajarishib, gʻalaba nashidalarini surish arafasida.

Bunday yutuqlarimizda Siz rahbarlik qilayotgan jamoaning qanday hissasi bor?

Ilhom Polvonov, "Toshyop” ovulidagi "Bekman Allaberganov” fermer xoʻjaligi raisi:

– Men rahbarlik qilayotgan fermer xoʻjaligida bu yil 27 gektar maydonda paxta yetishtirildi. Biz paxta yetishtirishda barcha agrotexnika qoidalariga toʻla amal qildik va pudratchilarimiz bilan hamkorlikni yanada yaxshiladik.

Fermer xoʻjaligimizda paxta yetishtirishda mehnat qiladigan 20 nafar pudratchining barchasi ham paxtachilikni yaxshi biladigan kishilar hisoblanishadi. Shu sababli ham dalalarimizga ekilgan paxta yaxshi parvarishlanib, moʻl hosil toʻplandi.

Hosilni yigʻib-terib olishda pudratchilarimizdan Oʻrozgul Hayitboyeva, Bozorgul Sherboyeva, uyushmagan aholidan Raʼno Rajabova va Sevara Oqmonovalar gʻayrat-shijoat koʻrsatdilar.

Shu bilan birga Mangʻit shahrining Yangiobod mahallasi aholisi ham paxta yigʻim-terimida bizga yaqindan yordam berdilar.

Paxta yigʻim-terimi davrida yordamga kelgan kishilarga tushlik paytida  issiq ovqat berishimiz va terilgan paxta uchun ish haqlarini oʻz vaqtida berib borganimiz ish unumining oshishiga sababchi boʻldi.

Biz ayni kungacha davlat xirmoniga 60 tonna oʻrniga 70 tonna paxta topshirdik. Dalalarimizda hali hosil moʻl. Qolgan paxta hosilini ham tez kunlar ichida yigʻib-terib olib, davlat xazinasiga topshiramiz.

Abdiqodir Tilovmurodov,  "Turkmaniston” MMTP raisi:

– Paxta xom-ashyosini yetishtirish mamlakatimiz qishloq xoʻjaligi sohasidagi asosiy ishlardan biri hisoblanadi. Shu boisdan ham bu yil kelgusi yil hosili uchun qizgʻin mehnat jarayoni boshlanadi.

Xolimbeg ovuli hududida joylashgan 26 ta fermer xoʻjaliklarida paxta hosili yetishtiriladi. Bizning "Turkmaniston” muqobil mashina traktor parkimiz mana shu fermer xoʻjaliklarini zarur texnika va transport vositalari bilan taʼminlash boʻyicha xizmat koʻrsatib, ularning belgilangan rejalarini oʻz muddatida ado etishlariga yaqindan koʻmak beradi.

Bu yil bizning hamkorligimiz tufayli ovuldagi barcha fermer xoʻjaliklarida moʻl paxta hosili yetishtirildi. Paxtani ekishdan tortib, to paxta yigʻim-terimi davriga qadar 30 tadan ortiq texnikalarimiz, payvandlash, tokarlik, temirchilik va taʼmirlash tsexlarimiz fermer xoʻjaliklari uchun xizmat qildi.

Ovulimizdagi koʻplab fermer xoʻjaliklari davlatga paxta topshirish shartnomaviy rejalarini muddatidan oldin, oshirib bajarishga muvaffaq boʻldilar. Ulardan Sh.Avezov rahbarlik qilayotgan "Avezov Sherali” fermer xoʻjaligi 40 tonna, Gʻ.Jumatov rahbarlik qilayotgan "Gʻafur traktorchi” fermer xoʻjaligi 53 tonna, M.Annamurodov raislik qilayotgan "Qilich Niyozboy arna sohili” fermer xoʻjaligi 77 tonna, R.Sultonov rahbarlik qilayotgan "Usta Allayar” fermer xoʻjaligi 100 tonna paxta topshirishga erishdilar. Ularning bu yutuqlari bizlarni ham ruhlantirayapti.

Fermer xoʻjaliklarimiz dalalarida hali hosil moʻl. Biz ularga qolgan hosilni ham nest-nobud qilmay yigʻib-terib olishlariga, kelgusi yil hosiliga tayyorgarlik koʻrishlariga yaqindan yordam beramiz.

Allambergan JUMANIYoZOV suhbatlashdi.