MUROJAATLARGA EʼTIBOR INSON OMILIGA EʼTIBORDIR
Mamlakatimiz Prezidenti Sh.Mirziyoyevning "Oʻzbekiston Respublikasini yanada rivojlantirish boʻyicha Harakatlar strategiyasi toʻgʻrisida”gi Farmoniga muvofiq ishlab chiqilgan, shu yilning 12-sentyabridan kuchga kirgan "Jismoniy va yuridik shaxslarning murojaatlari toʻgʻrisida”gi Oʻzbekiston Respublikasi Qonuniga oʻzgartish va qoʻshimchalar kiritish haqida”gi Qonun murojaatlar bilan ishlash tizimini yanada yaxshilashga xizmat qilishi bilan ahamiyatlidir.
Yangi tahrirdagi Qonunning ishlab chiqilishi va qabul qilinishidagi asosiy oʻzgarishlardan biri uning amal qilishi davlat ishtirokidagi tashkilotlarga ham tatbiq etilishidir. Avvalgi Qonunda davlat organlariga murojaat qilish kafolatlari aks etgan boʻlsa, endilikda buning doirasi kengaytirildi. Yaʼni, endi davlat ulushi mavjud boʻlgan tijorat tashkilotlariga murojaatlar ham Qonun himoyasida boʻladi.
Qonunga kiritilgan yangiliklardan biri – murojaatlarni koʻrib chiqishning asosiy printsiplari belgilab qoʻyilganidir. Yaʼni, murojaatlarni oʻz vaqtida va toʻliq koʻrib chiqish, murojaatlarga nisbatan talablarning bir xilligi, murojaatlarni koʻrib chiqishda byurokratizm va sansalorlikka yoʻl qoʻyilmasligi kabi maxsus printsiplar bilan toʻldirildi. Shuningdek, murojaatlarni "toʻliq koʻrib chiqish” degan alohida rahbariy talab kiritildi.
Bu jismoniy va yuridik shaxslarning bitta murojaatida uchrashi mumkin boʻlgan bir-necha masalani ham toʻliq koʻrib chiqish kafolatlarini mustahkamladi.
Yangi tahrirdagi Qonunning 2-bobida Oʻzbekiston Respublikasi Prezidentining Xalq qabulxonalari va Virtual qabulxonasining asosiy vazifalari, huquq va majburiyatlari, shuningdek davlat organlarining, tashkilotlarning va ular mansabdor shaxslarining virtual qabulxonalarini tashkil etish tartibi oʻz aksini topgan.
Endilikda elektron murojaat uchun elektron raqamli imzo talab qilinmaydi. Shuningdek, Qonunda ogʻzaki murojaatlar real vaqt rejimida axborot-kommunikatsiya texnologiyalaridan foydalangan holda, jumladan, davlat organlarining, tashkilotlarning ishonch, tezkor aloqa telefonlari orqali ham berilishi mumkinligi belgilab qoʻyildi.
Qonunga kiritilgan "Murojaatlar boʻyicha ish yuritish”, deb nomlangan yangi moddada davlat organi, tashkilot yoki ularning rahbarlariga kelib tushgan murojaat oʻsha kunning oʻzida, ish vaqti tugaganidan keyin kelib tushgan taqdirda esa keyingi ish kuni roʻyxatdan oʻtkazilishi kerakligi belgilandi.
Murojatlarni roʻyxatdan oʻtkazishni rad etishga yoʻl qoʻyilmaydi.
Har bir murojaat orqasida inson, taqdiri, uning dard-u tashvishlari bor. Shu boisdan ham murojaatlarga eʼtibor – inson omiliga eʼtibordir.
Murojaatlarga munosabat tubdan oʻzgarib, eʼtibor tobora kuchayayotgani xalqimizning davlat organlari va mansabdor shaxslar fuqarolar oldida, jamiyat oldida masʼul ekanligini, xalq manfaati ustuvorligini oʻz hayotlarida yaqqol his qilishlariga, pirovardida, davlatimizdan minnatdor boʻlib yashashlariga imkoniyat yaratmoqda.
Rustam ROʻZMETOV,
xalq deputatlari tuman Kengashi raisining oʻrinbosari.
(Foto - http://xushnudbek.uz)
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
