AMUDARYoDAGI OʻQUV-IShLAB ChIQAPISh MAJMUALAPIDA KASB-HUNAP OʻPGATILMOQDA (+video)

Mazkur oʻquv yilida umumtaʼlim maktablarida 11 yillik taʼlim joriy etilib, oʻquvchilar 10-sinflarda oʻqishni davom ettirmoqdalar. Davlatimiz tomonidan oʻquvchilarning taʼlim olishlari bilan birgalikda kasb-hunar oʻrganishlariga ham imkoniyat yaratilmoqda. Shu maqsadda joylardagi oʻrta maxsus kasb-hunar kollejlarida maktab oʻquvchilarining ham kasb-hunar oʻrganishlari uchun oʻquv-ishlab chiqarish majmualari tashkil etildi.

Tumanimizda ham umumiy oʻrta taʼlim muassasalarining 10-11-sinf oʻquvchilari uchun kollejlarda oʻquv-ishlab chiqarish majmualari tashkil etilib, turli yoʻnalishlar boʻyicha maktablarning yuqori sinf oʻquvchilariga kasb va hunar oʻrgatilmoqda. Kasbiy taʼlim berish jarayonini sifatli tashkil etish maqsadida tumandagi har bir kasb-hunar kollejidagi oʻquv-ishlab chiqarish majmuasiga shu hududda joylashgan umumtaʼlim maktablarining 10-sinf oʻquvchilari jalb etilmoqda.

Majmua tumandagi Amudaryo qishloq xoʻjalik kasb-hunar kollejida ham tashkillashtirilib, hozirgi kunda bu yerda oshpazlik va pazandalik, avtomobil taʼmirlash texnigi, kompyuterlarga texnik xizmat koʻrsatish hamda tikuvchilik yoʻnalishlarida oʻquvchilarga kollejning ishlab chiqarish taʼlimi ustalari hunar oʻrgatmoqdalar. Belgilangan dars jadvali asosida majmuaga hafta davomida tumandagi 1-, 25-, 26-, 4-, 38-, 59-, 5-, 31-, 42-, 55- umumtaʼlim maktablarining 10-sinf oʻquvchilari tashrif buyurmoqdalar.

– Oʻquvchilarga kasbiy taʼlim berish uzluksiz taʼlim tizimining tarkibiy qismidir, – deya izoh beradi Amudaryo qishloq xoʻjalik kasb-hunar kolleji direktorining ishlab chiqarish ishlari boʻyicha oʻrinbosari Shuhrat Matirzayev. – Majmualar Oʻzbekiston Pespublikasi Vazirlar Mahkamasining tegishli qarori asosida 2017-yilning oxirida tashkil etildi. Dastlab maktab oʻquvchilari uchun ekskursiyalar tashkil etilib, kollejimizda kasbiy taʼlim berilishi uchun yaratilgan sharoitlar bilan tanishtirildi. Shundan soʻng, tuman XTMFMTTE boʻlimi tomonidan har bir kollejdagi oʻquv ishlab chiqarish majmuasiga shu hududga yaqin joylashgan maktablarning oʻquvchilari jalb qilinishi rejalashtirilganligi sababli, bu yerga yaqin joylashgan maktablar oʻquvchilari tashrif buyurib, oʻzlari tanlagan yoʻnalishlar boʻyicha hunar oʻrganmoqdalar. Oʻquvchilarning oʻzlariga yoqqan kasb va hunarlarini puxta oʻrganishlari uchun kerakli jihozlar hamda yetarli sharoit mavjud. Kollejning malakali ishlab chiqarish taʼlim ustalari mahoratlarini ishga solib, “ustoz-shogird” anʼanalari asosida astoydil bilim bermoqdalar.

Oʻquv-ishlab chiqarish majmuasida oshpazlik va pazandalik yoʻnalishida Paʼno Boltaboyeva, Farida Matirzayevalar, avtomobil taʼmirlash texnigi yoʻnalishida Ozod Ortiqov, Qunduz Qutlimurodov, Shamsiddin Yoʻldoshev, Davron Xolimbetov, Bahodir Otamurodovlar, kompyuterlarga texnik xizmat koʻrsatish yoʻnalishida Sanjar Toʻrayev, Azamat Ortiqovlar, tikuvchilik yoʻnalishida esa Sayyora Mingboyeva, Muyassar Saparboyeva, Zulfiya Oʻrozboyevalar maktab oʻquvchilariga kasb va hunar sirlarini oʻrgatmoqdalar. Majmuada “Oq oltin” ovuli hududida joylashgan 5 ta umumtaʼlim maktablari oʻquvchilari uchun ham kasbiy taʼlim oʻrgatilishi belgilangan boʻlib, ayni paytda ovul oʻquvchilarining qatnashlari uchun masofa uzoq boʻlganligi sababli taʼlim ustalari maktablarga borib, oʻquvchilarning dastlabki kasbiy bilim va koʻnikmalarini shakllantirmoqdalar.

Oʻquv ishlab chiqarish majmuasida kasbiy taʼlim berish jarayonlari endi boshlanmoqda. Oʻquvchilarning kasb-hunar oʻrganishga boʻlgan ehtiyojini qondirish va iqtisodiyotimiz tarmoqlari uchun zarur mutaxassislar tayyorlashni taʼminlash maqsadida majmuada boshqa hunar va kasblar boʻyicha yoʻnalishlar tashkil etilishi rejalashtirilgan.

Maktab oʻquvchilari oʻquv-ishlab chiqarish majmualarida yoʻlga qoʻyilgan kasbiy taʼlim dars jarayonlarida katta qiziqish bilan kasb va hunar oʻrganmoqdalar.

Ozoda XUDOYBEPGANOVA.