DARSDA OʻQITUVChI ODOBI HAM MUHIM
Istiqlol tufayli mamlakatimizda fuqarolarning erkin va ozod taraqqiy etishi uchun keng imkoniyatlar yuzaga keldi. Xalqimiz oʻzining boy tarixiy merosi, madaniyatining oʻlmas anʼanalarini tiklash va rivojlantirish, ulugʻ ajdodlarimizga munosib barkamol avlodni tarbiyalash, tafakkur olamini sogʻlomlashtirishdan iborat gʻoyat katta bunyodkorlikka kirishdi. Xalq taʼlimi tizimida olib borilayotgan ulkan islohotlar ham shular jumlasidandir.
Bugungi kunda sobiq ittifoq davridagidek oʻquvchining darsga qatnashishi, tinch oʻtirishi, tartibga rioya qilishi, necha baho olishi emas, darsda nimani oʻrganishi, nimalarga qiziqishi kuchaygani, oʻrganganlarini amaliyotda qoʻllay olishi va oʻz fikrini mustaqil oʻrtaga tashlay olishi oʻqituvchi mehnati natijasi hisoblanadi.
Yurtimizning kelajagi biz tarbiyalayotgan bolalar qoʻlida ekan, bu oʻz navbatida oʻqituvchi zimmasiga ulkan masʼuliyat yuklaydi.
Zamon tezkor, zamon shiddatli. Bolalarimizning orzu-intilishlari, qiziqishlari ham shunga monand. Bu oʻz-oʻzidan oʻqituvchilardan chuqur bilimli, maʼnaviyatli, oqil va yetuk axloqli boʻlishni taqozo etadi.
Oʻzbekiston xalq taʼlimi vazirligining 2013-yil 28 fevraldagi buyrugʻiga asosan umumiy oʻrta taʼlim maktablar oʻqituvchi va oʻquvchilarining odob-axloq qoidalari qabul qilindi. U taʼlim tizimiga joriy etilgan hukumatimiz qarorlari, qoidalar va umum eʼtirof etilgan maʼnaviy-axloqiy tamoyillar asosida ishlab chiqilgan boʻlib, taʼlim muassasalari jamoa aʼzolarining muassasadagi oʻzaro munosabatlarida rioya etishlari shart boʻlgan obod-axloq tamoyillari, xulq-atvor meʼyorlari va majburiyatlarini belgilab beradi.
"Obod-axloq qoidalari” – umumiy oʻrta taʼlim maktablarida sogʻlom ijtimoiy-psixologik muhitni shakllantirish, yosh avlodga zamon talablari va milliy qadriyatlar asosida taʼlim-tarbiya berish, taʼlim muassasalarida oʻquv-tarbiya jarayonining sifati, maʼnaviy-maʼrifiy ishlar samaradorligini oshirishga sharoit yaratish maqsadida qabul qilingan boʻlib, mamlakatimizdagi barcha taʼlim muassasalari oʻqituvchilari, oʻquvchilari va texnik xodimlari uchun majburiydir.
Toʻqqizta bobdan iborat "Odob-axloq qoidalari”da jamoa aʼzolarining odob-axloqiga oid qoidalar, oʻqituvchi va oʻquvchilarning taʼlim-tarbiya jarayonidagi oʻzaro munosabatlari, oʻqituvchilarning oʻzaro munosabatlari, maktab jamoasi aʼzolarining obod-axloqqa oid majburiyatlari, maktab jamoasi aʼzolarining odob-axloqida man etiladigan holatlar, ragʻbatlantirish va chora koʻrish tartibi aniq bayon etilgan boʻlib, bu qoidalar bizning 15-sonli umumtaʼlim maktabimiz faoliyatida ham dasturilamal boʻlib xizmat qilmoqda.
Oʻz ishini mazkur qoidalar asosida tashkil oʻtgan oʻqituvchi oʻquvchilar oldida ibrat boʻlgulik maʼnaviy qiyofa kasb eta oladi.
Kimningdir yaxshi ishini eshitgan odam albatta, oʻqitgan ustoziga rahmat, deydi. Bu bejiz emas. Hammaning ham hayotida erishayotgan yutuqlarida maktab taʼlimining oʻziga xos oʻrni borligi tabiiy. Buning ustiga oʻqituvchi yuksak odob-axloqi, yuksak maʼnaviyati, keng dunyoqarashi va mehr-oqibati bilan ham oʻquvchilarga oʻrnak boʻla olsa, uning oʻrgatgan bilimlarining qadri yanada yuksaladi.
Ha, oʻqituvchilik sharafli va ayni paytda masʼuliyatli kasb. Hayotini ana shunday fidoyilikka baxshida etayotgan barcha kasbdoshlarimni 1-oktyabr – Oʻqituvchilar va murabbiylar kuni bilan tabriklayman.
Nargiza MATLATIPOVA,
15-sonli umumtaʼlim maktabi direktorining maʼnaviy-maʼrifiy ishlar boʻyicha oʻrinbosari.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
