Jayxun ilhomlari
ShIJOAT KOʻRSAT
Sizga boqsam, yurtning ey, yosh avlodi,
Bir oddiy haqiqat koʻzga tashlanar:
Siz xalqimga Haqning buyuk imdodi –
Yurtning kelajagi sizdan boshlanar.
Sizday sher yurakli yoshlar qoshida,
Ne asov muammo ham yuvoshlanar.
Shaxdam qadam tashlang yoʻlning boshida,
Yurtning kelajagi sizdan boshlanar.
Bugun sizga qancha berilsa imkon,
Olgʻa shuncha dadil qadam tashlanar.
Sizning tashrifingiz kutmoqda jahon –
Yurtning kelajagi sizdan boshlanar.
Yoshlik – ilm olishga eng yaxshi fursat,
Kechiksang bosh afsus bilan qashlanar.
Demak, har sohada shijoat koʻrsat –
Yurtning kelajagi sizdan boshlanar.
Sizning jasoratni madh etmoq uchun,
Har kuni necha qalam taroshlanar.
Koʻrsating shu bugun yoshlikning kuchin,
Yurtning kelajagi sizdan boshlanar.
A.NAFASOV,
«Jayxun ilhomlari» NNT raisi.
MUROJAAT
Kalta yubka, tor shimlarni kiyib olib,
Koʻchalarda yurishadi qoʻl ushlashib.
Oʻzbek qizi, deyolmaysiz nazar solib,
Turishlarin qaranglar-a, gap talashib.
Qayda qoldi oʻzbegim xon atlaslari,
Momolarim ardoqlagan adraslari.
Koʻz tashlasang, odob-ibo yoʻqolibdi,
Zamon emas, oʻzbek qizi oʻzgaribdi.
Bilib oling, zamonaga ayb yoʻqdir,
Axir koʻplar zamonni pesh qilishadi.
Farmonbibi momom asli juda haqdir,
Xoʻrozqandni chetniki deng, yalashadi!
Ey doʻstlarim, koʻzingizni oching katta,
Shirin soʻzlab va iboli boʻlingiz-da.
Tor yubkaning puliga koʻp kitob olib,
Ilm oling va maʼnaviy boʻling gʻolib!
Oynura JIYaMURODOVA,
Amudaryo akademik litseyi oʻquvchisi.
OZODLIK
Qanot yozar, shodumon yayrab,
Anov koʻkda uchib yurgan qush.
Yotar edi qafasda qaqshab,
Kechagina mungʻayib, xomush.
Endi esa ozoddir, erkin.
Bagʻrin ochgan unga keng ochun.
Quyoshga intilgan gullar singari,
Hayot nurin ichmogʻi mumkin.
Maftuna KENJABOYeVA, “Doʻrman” ovuli.
KITOB
Kitoblardan oʻrganaman ilmni,
Kitob oʻqib, koʻpaytaman bilimni.
Kitobsiz hech yerga borib boʻlmaydi,
Men u bilan topdim yoʻlimni.
Kitoblar bor, jahon unda koʻrinar,
Kitoblar bor, yashaganing bilinar.
Varaqlasang, sahifalar ichida
Mir Alisher, Bobur bobom koʻrinar.
Dildora SOBIROVA,
19- maktab oʻquvchisi.
VATAN BAYROGʻI
Vatanimning bayrogʻi
Koʻklarda xilpiraydi.
Xalqimning mard oʻgʻloni
Shu Vatanda ulgʻayadi.
Bizning bayrogʻimizga
Tabiat rangi singgan.
Har bir rangda ezgulik,
Mujassamdir tinchlik.
Tomirlarda oqqan qon,
Kindik qon tomgan makon.
Poklikdan yaralgan dil,
Sadoqatli, oq koʻngil.
Xalqimning oydin yoʻli
Aks etgandir iqboli!
Sardorbek KENJABOYeV,
20-sonli maktab oʻquvchisi.
KIM GUNOHKOR?
Ajralishdi yosh kelin-kuyov,
Sabab bormi, deya izladim.
Ikkovi ham oʻzicha oppoq,
Kim gunohkor, shuni bilmadim.
Ikki oylik tanish edilar,
Dabdabali toʻy ham qildilar.
Qaynota-yu qaynona xursand,
“Koʻz tegmasin!” – deya suydilar.
Qiz chiroyli, yigit ham koʻrkam,
Norozilik boshlandi birdan.
Sovuqchilik tushdi oraga,
Bir-birini tushunmaslikdan.
Janjal chiqdi toʻqlik - shoʻxlikdan,
Mehnatga yor boʻlmadi ikkov.
Qiz ota uy eshigin qoqdi,
Haydab soldi noshukur kuyov.
Kuyov biron hunarni bilmas,
Roʻzgʻor nima, aslo tushunmas.
Shunday goʻzal qoʻrgʻon buzildi,
Mehr degan rishta uzildi.
Ho-yu havas oila boʻlmas,
Axir, hayot oʻyinchoq emas.
Eh, ikki yosh xatosi sabab,
Farzand ota neligin bilmas.
Tengdoshlarim, dugonalarim,
Bu sizlarga koʻp saboq boʻlsin.
Tilagim shu, barcha oila –
Eng goʻzal va mustahkam boʻlsin.
Ajralishdi yosh bir oila,
Azobini chekmoqda bola…
Dildora RAJABOVA,
“Bogʻ” mahallasi.
BILIM KONI
Qunt-la oʻqisang agar,
Koʻp narsani oʻrgatar.
Bilarsan odob-axloq,
Bilim koni bu – kitob.
Qoʻlimdan hech qoʻymasman,
Oʻqib-oʻqib toʻymasman.
Kelajakni oʻylayman,
Yoʻlimda chiroq – kitob.
Laylo Ilyosova, 75-sonli maktab
oʻquvchisi.
OLDINGA INTIL
Senga turli sinov yuborar taqdir,
Ulardan birma-bir sekin oʻtaver.
Orqangga qarama, yuraver dadil,
Koʻzlagan maqsading sari ketaver.
Kun kelib yuzingni bosadi ajin,
Qaltiroq qoʻllaring tutadi hassa.
Basavlat qomating egilgan sayin,
Qop-qora sochlaring oqarar asta.
Kun kelar, orqangga boqarsan, balki,
Eslarsan yoshlikda kechgan damlaring.
Oʻshanda oʻkinma bu nurli kunga,
Yetgan-etmagandir yaqin doʻstlaring.
Aslida yuzingda ajin emas u,
U hayot keltirgan eng ulugʻ tuhfa.
Oʻtmish hayotingdan qolgan chuqur iz,
Halol mehnatingdan qolgan bir meva.
Mehnat qil, bogʻ qilib, daraxt koʻkartir,
Sendan dogʻlar emas, qolsin nurli nom.
Qarigan paytingda toʻldirib tandir
Aziz farzandlaring yopar bugʻdoy non.
Gulruh AHMEDOVA, Doʻrman ovuli.
ORZU
Mudrab yotgan yaqin-yiroqlar,
Bogʻlariga bitib butoqlar.
Bayramlashar nurli kunlarni,
Koʻklamlashar koʻklam gullari.
Bor boʻlsin, “Kel!”- degan oʻtloqlar,
Orzuga soz ekan bu chogʻlar.
Jonga orom berar, aylanib –
Yursang arzir yurtingni tanib.
Jumaboy Hidoyatov.
VATAN MUQADDAS
Jang aro jangchilar topsa jarohat,
Joni azoblarda qolganda hayhot.
Ona yurt tuprogʻin bosib taniga,
Misli malham kabi topgaylar rohat!
Sayyoh oʻzga yurtda bemor boʻlsa gar,
Yemishin gohida unut qoldirar.
Lek yurtin suvini bosar koʻksiga,
Demishlar: «yurt suvi tanaga mador!»
Vatan quchogʻiga sigʻdira olar,
Uning quchoqlari kengdir shunchalar.
Shuning-chun muqaddas, oʻchmas yurakdan,
Har zarra tuprogʻi aziz, moʻʼtabar!
Navbahor RAHIMOVA, Amudaryo agrobiznes kasb-hunar kolleji oʻquvchisi.
YOʻQLOV (Ustozimiz Maqsud aka Matnazarov xotirasiga)
Umr daftarining har bir varagʻin,
Faqat gul-u gʻunchadan bezamoq istab,
Bunyodkor maqsading misoli chaqin –
Qoʻymadi gʻaflatda qolishni uxlab.
Har inson umri-chun mehnatdan ortiq,
Baxt uchun eltuvchi yoʻlning oʻzi yoʻq.
Zahmatlar ortidan kelgaydir tortiq,
Ortingizda qolgan rahmat cheki yoʻq.
Yurgan yoʻllaringiz kuzatdi sizni
Qora koʻzlaringiz uzatdi sizni.
Maktab hovlisiga siz ekkan nihol,
Bugun soya berib eslatdi sizni!
Sh. XOLMURODOVA,
32-maktab oʻqituvchisi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
