Jayxun ilhomlari

Bolani yoshidan...

Bolalarni mudom tergab turmasang,

Ulgʻayganda bebosh boʻlib ketadi.

Gʻisht qolipdan koʻchgach qilgan pushmoning,

Oʻz-oʻzingga dushman boʻlib keladi.

Yosh niholni egsang agar mabodo,

Egilar va bukilar har tomonga.

Fikr qilsang bolalar ham nihol-da,

Toʻgʻri oʻssa, yetarsan-ku murodga.

Shomurod Saidov, Toʻlqin ovuli.

 

UMR

Quyosh chiqqaniga quvonmagin sen,

Umring varagʻidan yirtilar bir bet.Quyosh botganiga qiynalmagin sen,

Kun tunga oʻrnini berar ketma-ket.

Shunday oʻtaverar kunu tunlaring,

Bir kun qarabsanki, qarib qolibsan.

Har kuni bir savob egasi boʻlsang,

Ikki dunyong obod, mutloq gʻolibsan!

Farhod AVEZOV, Namuna mahallasi.

 

DOʻSTLARGA TILAK

Dunyoga keldingmi, insonday yasha,

Yaxshi xulqing bilan beza umringni.

Hatto koʻzingga tor koʻrinsa dunyo,

Ezgulikka baxsh et qalbing qoʻrini!

Tilingdan qochsa gar bir soʻz beoʻrin,

Bermasalar senga davraning toʻrin.

Beldan quvvat ketsa, koʻzlaringdan nur,

Sabr-u qanoatga dildan ber oʻrin!

Doʻst, deb kitobni oʻzingga doim,

Ota-yu onangga boʻlgin muloyim.

Odamiylik seni tark etmasin hech,

Xulq-u odobingni isloh qil doim!

Mohira YOʻLDOShEVA,

70-sonli maktab oʻquvchisi.

 

KENG BANDARGOH

Odam koʻp,

Kemalar undan koʻproq,

Mening kemam eng yiroq,

Mening yukim ogʻirroq.

Bandargoh keng – olam keng,

Odamlar koʻzida baxt,

Qoʻllarida kular gul.

Sen qanisan,

Sen qayon,

Menga silkigin-da qoʻl.

Bandargoh keng, kema tor,

Eshkaklarida charchoq,

Maysalarga dil mushtoq –

Qanisan,

Topmaysanmi,

Mana,

Mana men,

Kemamda oppoq bayroq.

Vaqt yugurar

Sen haliyam yoʻq...

Vaqt yeladi

Sendan yoʻq xabar...

Vaqt tugadi,

Xushtak chalindi.

Endi

Kema keng, bandargoh tor...

Dildora XUDOYBERGANOVA.

 

YaNA ShEʼR YoZGIM KELAVERADI

Dardimni ichimga hech sigʻdirolmay,

Baribir yana sheʼr yozaveraman.

Boʻldi, oʻylamayman, yashayman yozmay,

Deyman-u yozolmasdan yuraolmayman.

Yana armonlardan sheʼrlar bitaman,

Yulduzli falakdan umid kutaman.

Kutganim kelgaydir ilhom meni deb,

Men kutgan dunyoda qolsin meni deb.

Yozib chiqqanlarim umr yoʻllari

Tovonlarim tilar chagʻir toshlari.

Men bosib oʻtgan yoʻl oʻng-u soʻllari,

Qalamdan toʻkilgan sabrim yoshlari.

Shahnoza HAYITBOYeVA,

Yoshlar ittifoqi faoli.

 

ORZU

Hamma yaxshi xislatlar

Jamdir onamda.

Uning kabi mehribon

Yoʻqdir olamda.

Ilm-u hunar oʻrganib

Katta boʻlaman.

Vatanim va onamni

Rozi qilaman.

Mohitobon TURSUNBOYeVA,

2-sonli maktab oʻquvchisi.

 

SOAT

Chiq-chiq, chiq-chiq,

Urib turadi soat.

Kecha-yu kunduz demay,

Yurib turadi soat.

Ertalab maktabimga,

Ketmoqchi boʻlganimda.

Kech qolmagin, deb doim,

“Chiq-chiq”laydi muloyim.

Sadoqat BOZORBOYeVA, 14-maktab oʻquvchisi.

 

IQROR VA TILAK

Yuzimda tabassum, koʻzimda kulgu

Lekin ich-ichimda yigʻlaydi yurak.

Nega yosh boshimga bunchalar qaygʻu,

Ha, deganda amalga oshmaydi tilak.

Hayot avval boshdan shunday yaralgan,

Gohida baland-u, gohi pasti bor.

Bu oʻtkinchi dunyo aytar oʻz soʻzin,

Kimgadir yolgʻon-u, kimga rosti bor.

Allohim butun bir yer shari uzra,

Yaxshi-yu yomonni barobar sochgan.

Insonga: “Oʻz yoʻling oʻzing tanla”, deb,

“Oq-u qora”, deya ikki yoʻl ochgan.

Qoʻlingdan kelsa gar yaxshilik qilgin,

Kimgadir yordam ber, hojatin chiqar.

Yaxshi boʻlish qoʻlingdan kelmasa, unda,

Yomon boʻlishni ham esingdan chiqar.

Bu hayotni odamga sinovga bergan,

Sinovdan sabrli yuraklar oʻtar.

Ochkoʻz-u badbaxtning qilgan ishlari,

Oxir doʻzax tomon yetaklab ketar.

Boshga tushar gohi qorongʻi tunlar,

Alam, armon, ogʻriq bagʻringni tilar.

Ammo, shunday zulmat tunlar ortidan,

Baxtga toʻlgan nurli tonglar ham kelar.

Orzu qilishdan hech toʻxtama bir zum,

Mayli, u amalga oshsin, oshmasin.

Mayli, qalbing sheʼrga toʻlib toshsin-u,

Lekin koʻzing yoshga aslo toʻlmasin.

Gulruh AHMEDOVA,

Doʻrman ovuli.