USTOZ OTANGDAY ULUGʻ

Ustoz! Bu soʻz zamirida gʻoyat teran maʼno bor. Taʼbir joiz boʻlsa, Anvar Xudoyberganov tumanimiz madaniyat va sanʼat sohasida ayni paytda faoliyat olib borayotgan barcha xodimlarning ustozidir. U oʻzining bilim va tajribasini sanʼatga, taʼlim-tarbiya sohasiga baxshida qilib yashayotgan fidoyi insondir. Anvar ogʻa 32-yildan buyon madaniyat va sanʼat sohasida faoliyat yuritib, tumanimizda oʻtkaziladigan Mustaqillik va Navroʻz bayramlarida, turli sanalarga bagʻishlangan tadbirlarda faol ishtiroki bilan xalqimiz olqishiga sazovor boʻlib, faoliyati davomida qanchadan-qancha shogirdlar tayyorlab, ustoz, degan nomni oqlab kelmoqda. Uning shogirdlari “Yagonasan, muqaddas Vatan!” hamda “Nihol” kabi respublika koʻrik-tanlovlarida sovrinli oʻrinlarni egallab kelayotir. Anvar Xudoyberganov Vatanini sevadigan, xalqini ulugʻlaydigan sanʼatkor.

Uning har bir qarich yerini muqaddas bilganidan aksariyat qoʻshiqlari ona Vatan mavzusiga bagʻishlangan. Bu qoʻshiqlar tinglovchilar qalbida Vataniga muhabbat, xalqiga sadoqat tuygʻularini uygʻotadi va u oʻz sanʼati orqali yoshlarni maʼnan boy insonlar qilib tarbiyalashga munosib hissasini qoʻshayotganidan kuch va ilhom oladi. Bugungi kunda tumanimizda Anvar Xudoyberganovning qoʻshiqlari kirib bormagan xonadon yoʻq.

Bu inson mening uchun ham ulugʻ ustozdir. U menga oʻz xizmat vazifamni sidqidildan bajarishni, har bir ishga masʼuliyatli yondashishni va xalqimizga halol xizmat qilishni oʻrgatdilar. Hozir ham bir daqiqa vaqtini bekor oʻtkazmasdan yoshlar bilan ijodiy ishlar olib boradi, yosh ijrochilarga sahna madaniyati, sanʼatkorga xos axloqiy xususiyatlar haqida qimmatli maslahatlar beradi.

Aziz va mehribon Ustoz, bayram muborak, hamisha qaddingiz va qadringiz baland boʻlsin!

Ustoz – otangday ulugʻ, ustoz qadami qutlugʻ,

Ustozning har kamoli ilm-u hikmatga toʻlugʻ,

Ustozning dili ravshan, ustoz makoni yorugʻ,

Unib chiqar albatta, ustoz tashlagan urugʻ.

Oybek BEGIMOV, tuman Madaniyat va aholi

dam olish markazi rejissyor-mutaxassisi.