Paxtadan yuqori hosil olgan fermerlarga IMTIYoZLAR BERILDI

2013-yil 26-sentyabr kuni Oʻzbekiston Respublikasi Qishloq va suv xoʻjaligi vazirligi, Moliya vazirligi va Iqtisodiyot vazirligining qoʻshma qarori bilan "Paxta xom-ashyosini yetishtirishda yuqori hosildorlikka erishgan fermer xoʻjaliklarini ragʻbatlantirish tartibi toʻgʻrisida” nizom tasdiqlandi.

Mazkur nizomga asosan hisobot yilida paxta xom ashyosini yetishtirishda kamida 20 gektar maydonda 40 ts/ga dan hosildorlikka erishgan fermer xoʻjaliklari yuqori hosildorlikka erishgan fermer xoʻjaliklari hisoblanib, ular bir yil davomida quyidagi imtiyozlardan foydalanishlari mumkin:

a) fermer xoʻjaligining paxta ekiladigan jami yer maydonining kamida 5 foiziga Qonun hujjatlari bilan taʼqiqlanmagan boshqa turdagi qishloq xoʻjaligi ekinlarini ekish.

b) Qonun hujjatlari bilan taʼqiqlanmagan boshqa turdagi qishloq xoʻjaligi ekinlarini ekish uchun ajratilgan yer maydonlarida agrotexnik tadbirlarni amalga oshirish uchun taʼminotchi tashkilotlar bilan toʻgʻridan-toʻgʻri shartnoma tuzish orqali mazkur yer maydonining har bir gektariga ekilgan ekin turi uchun amaldagi texnologik kartalarda tavsiya etilgan meʼyorlar boʻyicha dizel yoqilgʻisi va mineral oʻgʻitlarni Oʻzbekiston Respublikasi Moliya vazirligi tomonidan deklaratsiya qilingan narxlarda (taʼminotchi ustamasi bilan) oldindan 100 foiz toʻlovni amalga oshirgan holda tegishli shoxobchalar orqali xarid qilish.

v) tuman (shahar) hokimligi zahirasidagi yer maydonlari boʻyicha oʻtkaziladigan tanlovlarda fermer xoʻjaligiga 10 ballgacha taqdim etish. Bunda fermer xoʻjaligi tomonidan hisobot davrida kamida 20 gektar boʻlgan maydonda yuqori hosildorlikka erishilganda 2 ball, yuqori hosildorlikka erishilgan maydon har 10 gektarga koʻpayganda qoʻshimcha 1 balldan, 100 gektar va undan ortiq maydonda yuqori hosildorlikka erishilganda 10 ball taqdim etiladi.

g) qishloq xoʻjaligi texnikalarini xarid qilish uchun tijorat banklari tomonidan imtiyozli kreditlar berish;

d) fermer xoʻjaligiga Oʻzbekiston Respublikasida ishlab chiqarilgan yengil avtotransport vositalaridan («Jeneral Motors Oʻzbekiston» YoAJ mahsuloti) xohlagan bitta modelini fermer xoʻjaligining asosiy talab qilib olguncha depozit hisobvaragʻidan pul mablagʻlarini oʻtkazish yoʻli bilan navbatsiz xarid kilish.

ye) qishloq joylarida qurilayotgan namunaviy uy-joylardan birini navbatsiz xarid qilish.

j) superelita, elita va keyingi avlodlarga mansub urugʻlik paxta yetkazib berish huquqiga ega boʻlish uchun xoʻjaliklar oʻrtasida oʻtkaziladigan tanlovda barcha shartlar boʻyicha teng ball toʻplangan hollarda yuqori hosildorlikka erishgan fermer xoʻjaliklari imtiyozga ega boʻladilar.

Aytish kerakki, muhtaram Yurtboshimizning "Fermer boy boʻlsa — mamlakat obod boʻladi” degan soʻzlari bugun hayotiy haqiqatga aylanmoqda. Yuqoridagi nizom bilan ilgʻor fermerlarga berilgan imtiyozlar ham kelgusida qishloq mulkdorlarining sidqidildan, fidoyilik bilan mehnat qilib, mamlakat obodligiga hissa qoʻshishdek xayrli ishlariga ragʻbat boʻladi.

Anvar YOʻLDOShEV,

xalq deputatlari tuman Kengashi deputati, tuman Qishloq va suv xoʻjaligi boʻlimi boshligʻi.