Oʻzbekiston Respublikasi Konstitutsiyasining 21 yilligi oldidan

Oʻzbekiston Respublikasida barcha fuqarolar bir xil huquq va erkinliklarga ega boʻlib, jinsi, irqi, millati, tili, dini, ijtimoiy kelib chiqishi, eʼtiqodi, shaxsi va ijtimoiy mavqeidan qatʼi nazar, qonun oldida tengdirlar.

Oʻzbekiston Respublikasi Konstitutsiyasining 18-moddasidan.

Oʻzbek qardoshim, qozoq bavurim deydi

Tumanimizda koʻp ming sonli qozoqlar oʻzbek, qoraqalpoq, turkman, rus, tatar kabi turli millat vakillaribilan bir ota-ona farzandlariday ahil-inoq yashashmoqda. Ularning ota-onalari Amu sohilida joylashgan shu makonda asrlar osha birga umrguzaronlik qilishib, barcha xalqlar bilan quvonchni ham, qaygʻuni ham birga totib kelishgan. Toʻy maʼrakasi bir, orzu-intilishlari bir odamlar turli millat vakillari orasida munosabatlarni chegaralovchi hech bir omil yoʻqligi bois, hatto koʻpchiligi qiz olishib, qiz berishib qarindosh boʻlib ketishgan.

Shunisi quvonarliki, yurtimizda oʻzbek qozoqqa qardoshim desa, qozoq oʻzbekka bavurim deydi. Oʻzaro hamjihatlik, shu yurt ravnaqi yoʻlidagi orzu-intilishlari nechogʻ-lik hamohang, turmush tarzi bir xil boʻlsa-da qozoqlar oʻz ota meros anʼanalarini, urf-odatlarini ham unutgani yoʻq. Bular ayniqsa kelin tushirish toʻylarida, beshik toʻylarda va boshqada marosimlarida ayniqsa yaqqol namoyon boʻladi. Shuningdek farzandning, kelinningota-ona bilan munosabatlarida ham oʻzgachaliklar bor. Qozoq millati vakillarining urugʻi bir boʻlsa, tugʻishgan qarindosh hisoblanadi. Ular bir-biri bilan qiz olishmaydi. Ona birinchi farzandining ismini aytmaydi, kelin qaynisi, bekachlarining ismini aytmaydi, qaynona-qaynotasiga-ena, ota deb murojaat qilsa, qaynisi, bekachlariga erkalatib oʻzicha ismlar qoʻyib oladi.

Turli millat vakillari orasida yashasada qozoqlar bir-biriga mehr-oqibatli, urf-odat, anʼanalariga sadoqatli. Asrlar osha oʻzbek zaminida yashab kelayotgan qozoqlarning bu urf-odatlarini shu makonda istiqomat qiluvchi barcha xalqlar ham hurmat qilishadi. Umuman Oʻzbekiston Respublikasi barcha fuqarolar bir xil huquq va erkinliklarga ega boʻlib, jinsi, irqi, millati, tili, dini, ijtimoiy kelib chiqishi, eʼtiqodi, shaxsi va ijtimoiy mavqeidan qatʼi nazar, qonun oldida tengdirlar, deya Asosiy qonunimizda taʼkidlangani hayotimizda har lahzada oʻz isbotini topib turibdi. Fikrimning isboti sifatida tumanimizda oz sonli qozoqlar orasida rahbar xodimlari, mulkdorlar, deputatlar borligini aytishim mumkin. Shuningdek ikkita qozoq tilida oʻqitiladigan umumtaʼlim maktablari bor va ularda bolalarning oʻqib ilm olishlari uchun cheksiz gʻamxoʻrliklar qilinayotir.

Ha, Oʻzbekistonimizda yashovchi xalqlarning millati, tili turlicha boʻlsada maqsadlari bir: mustaqil Vatanimizning tinchligi, osoyishtaligi va farovonligiga hissa qoʻshish, shu zaminni avlodlariga gullab-yashnagan oʻlkaga ay-lantirib meros qilib qoldirish.

Ozod Almurodov,

tuman qozoq milliy madaniyati markazi raisi.

(Foto-http://adolat.uz)