Tumanda mahalliy byudjet hisobidan ikkita maktab filiali binosi yangidan qurildi (+video)

Maktab – yosh avlod taʼlim va tarbiya oladigan, ularga mustaqil hayot sari yoʻl koʻrsatib, kamolga yetkazadigan ulugʻ dargohdir. Bu dargohda oʻzligini tanib, maqsadini topgan insonlar ilm-fan, iqtisodiyot, texnologiya kabi koʻplab sohalar rivojiga hissa qoʻshish bilan birga jamiyatni ham taraqqiyot sari yetaklashmoqda. Taraqqiyot sari ildam borayotgan mamlakatimizda shu bois taʼlim tizimiga uni rivojlantirishga, yetarli sharoit yaratilib, moddiy-texnik bazasi mustahkamlanishiga alohida eʼtibor qaratib kelinmoqda.

Tumanimizda ham bu borada amalga oshirilayotgan islohotlar soha rivojiga xizmat qilmoqda. Taʼlim maskanlari binolari qayta taʼmirlanib, zamonaviy qiyofaga keltirilish bilan birga sharoitlari ham yaxshilanmoqda. Tumanning chekka hududlarida joylashgan maktablargacha taʼmirlash ishlari olib borildi va taʼlim oluvchilarga foydalanishga topshirildi. Soʻnggi davr mobaynida esa qayta taʼmirlash ishlari olib borilishi bilan birga, maktab uchun yangi binolar ham qurildi.

Choykoʻl ovuli “Toza qalʼa” aholi punktidagi 1962-yilda qurilgan 59-sonli umumtaʼlim maktabi 2013-yilda kapital taʼmirlangan boʻlib, 120-oʻringa moʻljallangan mazkur maktabda 204 nafar oʻquvchiga 30 nafar malakali oʻqituvchilar taʼlim berib kelinmoqda.

Qayta taʼmirlashdan soʻng, maktab sharoiti yaxshilandi. Ammo aholi soni ortayotgani bois oʻquvchi koʻpayayotgani hamda quyi sinflarga ovulning chekka joylaridan qatnab oʻqiyotgan bolalar masofa uzoqligidan qiynalishayotgani sababli maktabga qoʻshimcha bino qurishga katta ehtiyoj sezilayotgan edi. Mana shu ehtiyojdan kelib chiqib, maktab uchun filial tashkil qilish rejalashtirildi va shunga muvofiq, shu yilning may oyida bino qurilishi boshlab yubrildi.

Mahalliy byudjetdan ajratilgan 62 mln. 900 ming mablagʻ evaziga “Amuqurilishdizayn” masʼuliyati cheklangan jamiyati tomonidan qurilgan 59-sonli maktab filiali binosi qisqa muddat ichida qurilib, sentyabr oyida ishga tushirildi. Maktab olislik qilayotgan, ovul chekkasida yashovchi aholiga moʻljallab qurilgan mazkur filialga boshlangʻich sinflar joylashtirildi.

- Bu aholi uchun ayni muddao boʻldi - , deydi 59-sonli maktab filiali boshlangʻich sinf oʻqituvchisi Toʻti Eshchonova. – Shinam va issiq xonalarda taʼlim olayotgan bolajonlarimizning ham quvonchi cheksiz. Har birimiz mana shunday sharoitlar, imkoniyatlar yaratilayotganidan juda minnatdormiz. Biz, albatta, bularni oʻqish va ishdagi yutuqlarimiz bilan oqlaymiz.

Ayni paytda 1-4-sinflar oʻqitilayotgan filialda 16 nafar oʻquvchi taʼlim olmoqda. Samarali tashkil etilgan oʻquv jarayonlari yangi uslublar, pedagogik texnologiyalar asosida olib borilmoqda. Oʻquvchilar rus, ingliz, qoraqalpoq tili, tabiat, mehnat, odobnoma, tasviriy sanʼat, musiqa fanlarini Toʻti Eshchonova, Olimjon Jumatov, Saʼdulla Shomurodov, Goʻzal Oʻtaboyeva, Hamid Karimov, Dilorom Sultonova, Dilbar Pahimova, Oʻrozbika Bobojonova, Ismoil Xoʻjaboyev kabi malakali oʻqituvchilar yordamida oʻzlashtirishmoqda.

Kuyuk koʻpir ovulining “Qizilcholi” mahallasida ham tuman mahalliy byudjeti hisobidan 9-sonli maktabning filiali uchun yangi bino qurilib, qisqa muddat ichida foydalanishga topshirildi. “Amuqurilishdizayn” masʼuliyati cheklangan jamiyati tomonidan 156 mln. soʻm mablagʻ evaziga qurilgan binoda ayni paytda 1-4-sinflarda 68 nafar oʻquvchi ilm oʻrganmoqda. Ularga boshlangʻich sinf oʻqituvchilari Dilbar Oʻrinboyeva, Tursunoy Masharipova, Davlatboy Otajonov, Maqsuda Matkarimovalardan tashqari, fan oʻqituvchilari ham taʼlim-tarbiya berib kelishmoqda.

- Bizning 9-sonli umumtaʼlim maktabimiz binosi 1980-yilda qurilgan boʻlib, 2008-yilda qayta taʼmirlandi. Oʻtgan davrda ovuldagi aholi ozligiga koʻra, kam sonli oʻquvchiga moʻljallab qurilgan binoga bugungi kunda soni tobora ortayotgan oʻquvchilarimizni joylashtirish qiyinchilik tugʻdirayotgan edi. Bunga alohida eʼtibor qaratilib, maktab filiali tashkil etilgani va tez fursatlarda bino ham qurilib ixtiyorimizga topshirilganidan, yaratilgan qulaylikdan nafaqat biz balki, butun ovul ahli minnatdor, - deydi mamnuniyat bilan maktab direktori Xayrulla Oʻtegenov.

Atrofi ham obodonlashtirilgan yangi filial maktablardagi shinam sinflarda tahsil olayotgan, darslarni oʻzlashtirayotgan oʻquvchilarning ruhlari baland. Ertaga mamlakat kelajagini yaratish masʼuliyati zimmasida turgan yosh avlod munosib boʻlib kamolga yetish uchun bugungi kundagi imkoniyatlardan foydalanib, chuqur bilim olishga intilmoqda.

O.Xudoyberganova.