Tibbiyot xodimlari kuni keng nishonlandi

Mamlakatimizda barcha sohalarda olib borilayotgan islohotlar, yangilanishlar va oʻzgarishlar inson baxt-saodati, uning farovon va mazmunli hayot kechirishi uchundir.

Shu boisdan ham yurtimizda har yili ijtimoiy sohalarga, xususan, tibbiyot sohasiga davlat byudjetidan ulkan xarajatlar ajratiladi, aholining sogʻ-salomat yashab, uzoq umr koʻrishi yoʻlida gʻamxoʻrlik qilinadi. Chunki sogʻlom odamgina oʻzini baxtiyor his qiladi, davlat va jamiyat taraqqiyotiga hissa qoʻshadi.

Prezidentimiz Sh.Mirziyoyev rahnamoligida sogʻlikni saqlash tizimini yanada takomillashtirish, tibbiy xizmat sifati va samaradorligini oshirish, sifatli dori-darmon vositalari bilan taʼminlashga qaratilgan saʼy-harakatlar natijasida sohada koʻplab ijobiy oʻzgarishlar yuz berayotir.

Aholi salomatligini saqlash, ularning tibbiyotga boʻlgan ishonchini mustahkamlash, har bir kishining oʻz sogʻligiga masʼuliyatini oshirish, sogʻlom yashashga ragʻbatlantirish borasidagi olib borilayotgan keng miqyosdagi ishlar tufayli aholining umri davomiyligi oshib, sogʻlomlik darajasi yaxshilanmoqda.

Xalqning kayfiyati, hayotidan roziligi, avvalo, uning sihat-salomatligiga bogʻliq. Mamlakatimiz tibbiyotiga jahon tibbiyotida erishilayotgan yutuqlarni joriy etish, xalqaro ilgʻor tajribalarni oʻrganish, jahon sogʻliqni saqlash tizimiga integratsiyalashish va shu asosda tibbiy xizmat sifatini oshirish bugungi kunda tibbiyotimizning asosiy faoliyat mezoniga aylanmoqda. Keyingi ikki yil mobaynida sohani yanada rivojlantirish, tibbiy xizmatlar koʻlami va sifatini oshirish, tibbiyot xodimlarini ijtimoiy qoʻllab-quvvatlash yuzasidan Prezidentimiz va davlatimizning 40 tadan ortiq Farmon, Qarorlari qabul qilingani fikrimizning isbotidir.

Oʻzlarining hayotini xalqimizning sogʻligini saqlash va tibbiy xizmat koʻrsatishdek ezgu ishga baxshida qilayotgan tumanimiz tibbiyot xodimlari ham sohaga bugungi kunda qoʻyilayotgan talablarga monand mehnat qilmoqdalar.

Ayni kunda tumanimiz Tibbiyot birlashmasida 297 nafar shifokorlar, 1150 nafar oʻrta tibbiyot xodimlari faoliyat koʻrsatishadi. Aholiga 1 ta koʻptarmoqli markaziy poliklinika, 7 ta qishloq oilaviy poliklinikasi va 2 ta qishloq shifokorlik punktlari orqali patronaj tibbiy xizmat, 379-oʻrinli tuman markaziy shifoxonasi va 36-oʻrinli xoʻjalik hisobidagi pullik reabilitatsiya boʻlimida statsionar tibbiy xizmat koʻrsatilmoqda.

Joriy yilning oʻtgan toʻqqiz oyi davomida 19 ming 701 nafar bemor statsionar sharoitda davolanib, oʻz sogʻligini tikladilar.

Issiq jon isitmasiz boʻlmas, deydi dono xalqimiz. Ha, chindan-da, baʼzan odam oʻziga salgina beparvoligi tufayli, baʼzida hayotdagi baxtsiz hodisalar tufayli, baʼzan esa arzimagan muammolarga ortiqcha asabiylashish tufayli tibbiy yordamga muhtoj boʻlib qoladi. Dard bilan olishayotgan insonning undan xalos boʻlishiga koʻmaklashish, sogʻlom hayotga qaytarish – naqadar sharafli ish. Shu boisdan ham tumanimizda tibbiyotni rivojlantirishga, tibbiy xizmat sifatini oshirishga alohida eʼtibor berilmoqda.

Birlashmamizga qarashli muassasalar zamonaviy diagnostika va davolash jihozlari bilan taʼminlanmoqda. Shu kungacha birlashmamizning 55 nafar shifokorlari, shu jumladan uch nafari MDH davlatlarida oʻzlarining kasbiy mahoratlarini oshirish uchun malaka oshirish kurslarida oʻqib qaytdilar.

Bundan tashqari, tuman hokimligining yordami bilan birlashmamizning joriy yilda 1 ta UZD, 2 ta IVL apparatlari bilan taʼminlanganligi, moddiy-texnik bazasi mustahkamlanayotgani, 7- va 5-qishloq oilaviy poliklinikalarining joriy taʼmirlangani oʻz navbatida faoliyatimiz samarali boʻlishiga sezilarli taʼsir koʻrsatayapti.

Har yili noyabr oyining ikkinchi yakshanbasi tibbiyot xodimlari kuni sifatida nishonlanayotgani esa soha xodimlariga faxr-iftixor bagʻishlaydi, oʻz kasbida sidqidildan mehnat qilishga undaydi.

Fursatdan foydalanib, men tumanimizning, yurtimizning barcha tibbiyot xodimlarini mazkur sana – kasb bayramlari bilan qizgʻin tabriklayman, bemorlarga najot bagʻishlayotgan qoʻllaringiz dard koʻrmasin, xalqimizning duosini olib uzoq yashang, deyman.

Endirboy ABDULLAYeV, tuman Tibbiyot birlashmasi bosh shifokori,

Qoraqalpogʻiston Pespublikasida xizmat koʻrsatgan tibbiyot xodimi.