Sogʻlom bola - millat kelajagi

Yurtboshimiz tomonidan "Obod turmush yili” deya eʼlon qilingan 2013-yil ham poyoniga yetmoqda. Koʻngillarimizda olam-olam taassurotlar, quvonchlar, natijalar, yangi-yangi rejalar bilanyangi yilga yuz tutmoqdamiz. Bunday paytda joriy yilda amalga oshirilgan ulkan bunyodkorliklar, yangidan qad rostlab, foydalanishga topshirilgan maʼmuriy binolar, namunaviy loyiha asosida qurilgan, yurtimiz koʻrkiga-koʻrk qoʻshib turgan hovlilar, qishloq xoʻjaligi sohasidagi yutuqlar, sanoatning rivojlanishi va shular asosida iqtisodiyotimizning yuksalib, chin maʼnodagi obodlikka erishayotganimizdan koʻngillarimiz faxru iftixorga toʻladi.

Ayniqsa aholi oʻrtasida sogʻlom turmush tarzini keng targʻibqilish, tibbiy madaniyatni yuksaltirish, yoshlarni nikohga tayyorlash, sogʻlom oila qurish madaniyatini shakllantirish, oilada sogʻlom farzandlar dunyoga kelishiga erishish, ularni jismoniy va maʼnaviy barkamol qilib tarbiyalash borasida keng koʻlamli chora-tadbirlar amalga oshirildi.

Ezgu orzular ogʻushida qarshi olishga chogʻlanayotganimiz - yangi yilning "Sogʻlom bola yili” deya nomlanishi joriy yilda farzandlar tarbiyasi borasida amalga oshirilgan ishlarimiz mantiqan davom ettirilishi va yanada yangi pogʻonaga koʻtarilishidan darak beradi.

Yurtboshimiz Asosiy Qonunimiz qabul qilinganligining 21 yilligigabagʻishlangan tantanali yigʻilishdagi maʼruzasida "Bizning mana shu qisqa – yigirma ikki yillik yangi tariximizda mustaqillikka erishish, milliy davlatchiligimiz, ertangi kunimizni qurishda, yurtimizni turli balo-qazolardan asrashda, Oʻzbekistonimizning rivojlangan demokratik davlatlar qatoriga kirishi, jahon maydonida munosib obroʻ topishida eng asosiy omillar nima, deb soʻrasa, men, boshqa mezonlarni inkor etmagan holda, bir fikrni alohida taʼkidlab aytgan boʻlardim: bu yoʻldagi eng muhim omil – bu ham jismoniy, ham maʼnaviy jihatdan sogʻlom, hech kimdan kam boʻlmasdan boshini baland koʻtarib yashaydigan, Vatanimizning taqdiri va kelajagi uchun masʼuliyatni oʻz zimmasiga olishga, xalqimiz intilayotgan kelajagi buyuk davlatni barpo etishga qodir boʻlgan barkamol avlodimiz, desam, ayni haqiqatni aytgan boʻlaman”, - dedilar yangi yilning nomlanishiga taʼrif berayotirib.

Ha, mamlakatimizda yoshlarni komil insonlar qilib tarbiyalash, farzandlar tarbiya topadigan qutlugʻ maskan – oilalarni mustahkamlash, onalik va bolalikni muhofaza qilish borasida amalga oshirilgan ishlar oʻz samarasini berayotganini bugun hayot tasdiqlamoqda. Oʻzbekiston dunyoning 125 davlati orasida xotin-qizlar uchun qulay sharoitlar yaratish va onalik, bolalikni muhofaza qilish borasida yetakchi oʻrinlardan birini egallab turgani, Yunisefning sharqiy Yevropa, Boltiqboʻyi va Mustaqil Davlatlar Hamdoʻstligi mamlakatlari boʻyicha ofisi tomonidan onalik va bolalikni muhofaza qilish borasidagi dasturlarni joriy qilishda Oʻzbekistonning mintaqadagi namunaviy model sifatida eʼtirof etilgani ham bejiz emas.

Dunyoda bizning xalqimizchalik borini bolasiga ataydigan bolajon xalq boʻlmasa kerak. Ota-onaningeng oliy orzusi - farzandining kamolidir. Yangi yilimizning "Sogʻlom bola yili” deya nomlanishi va shu munosabat bilan davlatimiz qabul qiladigan Dastur farzandlarimiz tarbiyasi borasidagi ishlarimizni yanada yangi bosqichga koʻtaradi.

Oygul RAJABOVA.