Muhim ijtimoiy-siyosiy jarayon yakunlandi

 «Fuqarolarning oʻzini-oʻzi boshqarish organlari toʻgʻrisida»gi, «Fuqarolar yigʻini raisi (oqsoqoli) va uning maslahatchilari saylovi toʻgʻrisida»gi Oʻzbekiston va Qoraqalpogʻiston Respublikasi Qonunlariga muvofiq, fuqarolarning oʻzini-oʻzi boshqarish organlari raislari (oqsoqollari) va ularning maslahatchilarining vakolat muddati 2013-yil noyabr-dekabr oylarida tugashi munosabati bilan shu yil 12-noyabrdan 7-dekabrgacha tumanimizdagi fuqarolar yigʻinlarida saylovlar boʻlib oʻtdi.

Tumanda 1 ta shaharcha, 16 ta ovul, 19 ta ovullar tarkibidagi mahalla va shahardagi 11 ta mahalla fuqarolar yigʻinlarida boʻlib oʻtadigan saylovlarda 47 nafar fuqarolar yigʻini raislari hamda 420 dan ziyodroq oqsoqol maslahatchilari saylanishi rejalashtirilgan edi.

Saylovga puxta tayyorgarlik koʻrish maqsadida 2013-yilning 5-8-oktyabr kunlari tumandagi barcha fuqarolar yigʻinlarida fuqarolar yigʻini raisi (oqsoqoli) va uning maslahatchilari saylovi boʻyicha fuqarolar vakillari yigʻilishlari boʻlib oʻtdi. Fuqarolar vakillari yigʻilishlarida «Fuqarolar yigʻini raisi (oqsoqoli) va uning maslahatchilari saylovi toʻgʻrisida»gi Qonunning 14-moddasiga asosan fuqarolar yigʻini raisi (oqsoqoli) va uning maslahatchilari saylovini tashkil etish hamda oʻtkazish boʻyicha har biri 7 kishidan iborat tarkibda ishchi guruhlar tuzildi.

2013-yil 9-oktyabr kuni tuman komissiyasi tomonidan fuqarolar yigʻinlari raislari (oqsoqollari) va ularning maslahatchilari sayloviga shaharcha, mahallalar va ovullar fuqarolar vakillarining yigʻilishlariga vakillik normasi belgilandi.

Tuman komissiyasi raisi tomonidan 3-7-oktyabr kunlari 4 joyda, hududlar boʻyicha "Qilichboy” ovul fuqarolar yigʻini binosida 10 ta fuqarolar yigʻinlari, "Chordara” mahalla fuqarolar yigʻini binosida 16 ta fuqarolar yigʻinlari, Z.M.Bobur ovulidagi Amudaryo melioratsiya va suv xoʻjaligi kasb-hunar kolleji binosida 11 ta fuqarolar yigʻinlari, "Qipchoq” ovulidagi Amudaryo agrobiznes kasb-hunar kolleji binosida 10 ta fuqarolar yigʻinlari xodimlari bilan «Fuqarolar yigʻini raisi (oqsoqoli) va uning maslahatchilari saylovi toʻgʻrisida»gi Oʻzbekiston Respublikasi Qonunining asosiy qoidalari, fuqarolar yigʻinlari raislari (oqsoqollari) va ularning maslahatchilari saylovini tashkil etish hamda oʻtkazishga doir asosiy vazifalar, ishchi guruhlar tuzish, shuningdek ularning ishini tashkil etish mexanizmlari toʻgʻrisidagi mavzu boʻyicha oʻquv-seminarlar tashkil qilindi.

2013-yilning 12-oktyabr kunidan boshlab fuqarolar vakillarini saylash yuzasidan aholi punktlari va koʻchalarda aholining umumiy yigʻilishlari oʻtkazilib, bu yigʻilishlar 25-oktyabr kuni yakunlandi. Jami tuman boʻyicha 108603 nafar ovoz berish huquqiga ega boʻlgan aholi aniqlanib, aholi punktlari va koʻchalarda 464 joyda aholining umumiy yigʻilishlarida 63648 nafar aholi ishtirokida fuqarolar vakillari saylash yigʻilishlarida hamda ovullar tarkibidagi mahalla fuqarolar vakillari yigʻilishlarida vakillar saylash yigʻilishlari oʻtkazilib, ularda jami 2740 nafar fuqarolar vakillari saylandilar.

2013-yil 24-oktyabr kuni Qoraqalpogʻiston Respublikasi komissiyasi tomonidan tashkil etilgan "Fuqarolar yigʻini raisi (oqsoqoli) va uning maslahatchilari saylovining tashkiliy va huquqiy asoslari” mavzuida seminar kengashda tuman komissiyasi raisi, tashkiliy-nazorat guruhi rahbari va tumandagi barcha ishchi guruhlar rahbarlari ishtirok qildilar.

Fuqarolar yigʻini raisi (oqsoqoli) va uning maslahatchilari saylovi boʻyicha vakillar yigʻilishini oʻtkazish 2013-yilning 12-noyabridan boshlab 7 dekabrda yakunlandi. Ishchi guruhlar tomonidan fuqarolar yigʻini raisi (oqsoqoli) lavozimiga 117 nafar nomzodlar koʻrsatildi. Ishchi guruhlar tomonidan koʻrsatilgan nomzodlar hujjatlari tuman hokimi tomonidan koʻrib chiqilib, "Fuqarolar yigʻini raisi (oqsoqoli) va uning maslahatchilari saylovi toʻgʻrisida”gi Qonunning 17-moddasi talablariga toʻliq javob berishi bildirilib, 117 nafar fuqaroga fuqarolar yigʻini raisi (oqsoqoli) lavozimiga nomzod etib kiritishga kelishim berildi.

Tuman boʻyicha jami 47 ta fuqarolar yigʻinlarida yigʻin raisi (oqsoqoli) va ularning maslahatchilari saylovi yigʻilishlarida vakil boʻlib saylangan jami 2740 nafar vakillardan 2402 nafari bevosita saylovlarda ishtirok qildilar. Yaʼni, jami vakillarning deyarli 87,6 foizi qatnashdilar.

Saylangan 47 nafar fuqarolar yigʻinlari raislari (oqsoqollari)ning 41 nafari yoki jami oqsoqollarning 87,3 foizini oliy maʼlumotlilar, 6 nafari yoki 12,7 foizini oʻrta-maxsus maʼlumotlilar tashkil qiladi.

Saylov boʻlib oʻtgan 47 ta fuqarolar yigʻinlarida 31 nafar yigʻin raisi lavozimiga qayta saylandi. 16 ta fuqarolar yigʻinlarida fuqarolar yigʻinlari raislari (oqsoqollari) yangidan saylandi.

Yigʻin raisi vazifasiga saylanganlar orasida 17 nafari muhandislar, 16 nafari oʻqituvchilar, 1 nafari shifokor, 3 nafari agronomlar va 10 nafari boshqa mutaxassislarni tashkil etadi. Ularning 6 nafari 40 yoshgacha, 12 nafari 40-50 yosh oraligʻidagi, 24 nafari 50 yoshdan 60 yoshgacha va 5 nafari 60 yoshdan yuqori kadrlardir. Xalq deputatlari tuman Kengashi deputatlari boʻlgan fuqarolar yigʻinlari raislari esa 2 nafarni tashkil qiladi.

Fuqarolar yigʻini raislarining 420 nafar maslahatchilari saylanib,  ular orasida birinchi marotaba saylanganlar 249 nafarni yoki jami maslahatchilarning 59,3 foizini tashkil qildi.

Fuqarolar yigʻinlari raislarining 420 nafar maslahatchilarining 222 nafari yoki maslahatchilar jami sonining 52,9 foizi oliy maʼlumotlilar, 118 nafari yoki 28,1 foizi oʻrta maxsus maʼlumotlilar, 80 nafari yoki 19 foizi oʻrta maʼlumotlilardir. Saylangan maslahatchilarning 98 nafari ayollarni tashkil etadi. Yigʻin raisi maslahatchisi lavozimiga saylangan 4 nafar shaxslar xalq deputatlari tuman Kengashi deputatlaridir.

Saylovlar jarayonida siyosiy partiyalarning faolligi yanada oshdi. Fuqarolar yigʻinlarining 47 nafar raislarining 11 nafari Oʻzbekiston xalq-demokratik partiyasi, 5 nafari tadbirkorlar va ishbilarmonlar harakati - Oʻzbekiston liberal-demokratik partiyasi, 1 nafari Oʻzbekiston "Adolat” sotsial-demokratik partiyasi hamda 3 nafari Oʻzbekiston "Milliy tiklanish” demokratik partiyasi aʼzolaridir. 27 nafar yigʻin raisi esa partiyasiz.

"Tosh yop”, "Nazarxon” va Kuyuk koʻpir ovul fuqarolar yigʻinlari, Namuna, Bosuv, Durunki, Ayoqchi, Qum yop, Doʻstlik va Olmazor mahalla fuqarolar yigʻinlarida ishchi guruh tomonidan saylovlarga yuqori darajada tayyorgarlik koʻrilib, uning uyushqoqlik bilan, koʻtarinki ruhda oʻtganini taʼkidlash lozim.

Saylov yakunlanar ekan, bu yilgi saylovlarning oldingilardan qanday farqli jihatlari boʻldi, degan haqli savol tugʻiladi.

Birinchidan, joriy yilgi saylovlar tumanimizda fuqarolarning ijtimoiy-siyosiy faolligi ancha oshganini koʻrsatdi.

Ikkinchidan, bu saylovlar Yurtboshimizning qonunchilik tashabbusi huquqiy subʼekti sifatida "Mamlakatimizda demokratik islohotlarni yanada chuqurlashtirish va fuqarolik jamiyatini rivojlantirish Kontseptsiyasi”da bergan takliflari asosida ishlab chiqilgan yangi tahrirdagi "Fuqarolar yigʻini raisi (oqsoqoli) va uning maslahatchilari saylovi toʻgʻrisida”gi Oʻzbekiston Respublikasi Qonuniga koʻra oshkoralik, muqobillik va teng saylov xuquqi tamoyillari asosida hamda qonunlar normalarining talablariga muvofiq davlat va jamiyat qurilishining barcha jabhalarini demokratlashtirish va liberallashtirish, kuchli fuqarolik jamiyatini rivojlantirish jarayonlari chuqurlashib borayotgan, sifat jihatdan yangi ijtimoiy-iqtisodiy va ijtimoiy-siyosiy jarayonda amalga oshirildi.

Uchinchidan, Prezidentimiz tashabbusi bilan kiritilgan oʻzgarishlar va qoʻshimchalar asosida qabul qilingan yangi tahrirdagi "Fuqarolarning oʻzini-oʻzi boshqarish organlari toʻgʻrisida”gi Qonunga muvofiq endilikda fuqarolarning oʻzini-oʻzi boshqarish organlari zimmasiga aniq yoʻnaltirilgan asosda aholini ijtimoiy qoʻllab-quvvatlash, mahallani xususiy tadbirkorlik va oilaviy biznesni rivojlantirish markaziga aylantirish, davlat organlari faoliyati ustidan jamoatchilik nazoratini amalga oshirish va eng asosiysi, hududda ijtimoiy-maʼnaviy muhit barqarorligini taʼminlash, yoshlarni "ommaviy madaniyat”ning zararli taʼsiridan saqlash, yosh oilalarning jamiyatda mustahkam oʻrin egallashlarida yelkadosh boʻlish, bu borada ularga zarur koʻmak va maslahat berish ishlariga boshchilik qilish kabi qator muhim vazifalarning bajarilishini taʼminlash masʼuliyati yuklatildi.

Toʻrtinchidan, fuqarolarning oʻzini-oʻzi boshqarish organlari oldida turgan vazifalarni bajarishda yigʻin raisi lavozimiga koʻrsatilayotgan nomzodlardan tashkilotchilik qobiliyatiga ega boʻlish talab etildi. Chunki, Prezidentimiz taʼkidlaganidek "Islohotlarning muvaffaqiyati kadrlar malakasiga, ularning tashkilotchilik qobiliyatiga, yangicha fikrlashiga bogʻliq ekanini xammamiz yaxshi bilamiz. Rahbarlarning barcha boʻgʻinlariga insofli, diyonatli, halol va pok, talabchan va qatʼiyatli, xalqparvar insonlar boshchilik qilmasa, koʻzlangan maqsadga erishib boʻlmaydi”.

Shu maʼnoda olib qaraganda, joriy yilgi saylovlarda fuqarolar yigʻini raisi va uning maslahatchilari sifatida yangilikka chanqoq, zamon talabini chuqur anglagan holda fidoyilik bilan mehnat qiladigan, tashkilotchilik qobiliyatiga ega fuqarolar saylandi, deb oʻylaymiz va ularning kelgusi faoliyatida omadlar tilaymiz.

Rustam Roʻzmetov,

fuqarolar yigʻinlari raislari (oqsoqollari) va ularning maslahatchilari saylovini tashkil etish hamda oʻtkazishga koʻmaklashuvchi tuman komissiyasi raisi.