Maktablarda tashkil etiladigan kuzatuv Kengashlarining vazifalari, huquq va vakolatlari nimalardan iborat?

Barcha sohalarda boʻlgani kabi xalq taʼlimi tizimida ham joriy etilayotgan islohotlar tufayli koʻpgina yutuqlarga erishilayotir.

Muhtaram Prezidentimizning “Xalq taʼlimini boshqarish tizimini takomillashtirish boʻyicha qoʻshimcha-chora tadbirlar toʻgʻrisida”gi 2018-yil 5-sentyabrda qabul qilingan Farmonida sohada yoʻl qoʻyilayotgan kamchiliklarni bartaraf etish orqali faoliyat samaradorligini oshirish yoʻl-yoʻriqlari koʻrsatib berilgan edi. Xususan, xalq taʼlimi tizimini boshqarishning samarali mexanizmalarini joriy etish lozimligi, bu oʻz navbatida oʻsib kelayotgan yosh avlodni maʼnaviy-axloqiy va intellektual rivojlantirishni sifat jihatdan yangi bosqichga koʻtarishga asos boʻlishi  taʼkidlangan.

Shu maqsadda umumiy oʻrta taʼlim muassasasalarida kuzatuv Kengashlari tashkil qilish taklif qilindi. Yaqinda xalq taʼlimi vazirligi tomonidan ishlab chiqilgan kuzatuv Kengashlari haqidagi namunaviy nizom Adliya vazirligida davlat roʻyxatidan oʻtkazildi.

Endilikda nizomga muvofiq, taʼlim jarayonining shaffofligini taʼminlash, jamoatchilik taʼsirini kuchaytirish, oʻquvchilarning sifatli taʼlim olishlari, oʻqituvchi-pedagog xodimlarning mehnati munosib baholinishi va ularga munosib mehnat sharoitlari yaratish, taʼlim-tarbiya jarayonini qoʻllab-quvvatlash maqsadida har bir taʼlim muassasasida kuzatuv Kengashi tashkil etiladi.

Kengashning asosiy vazfilari nimalardan iborat?

Albatta, bu savol koʻpchilikni qiziqtiradi. Kengash Oʻzbekiston Pespublikasi Xalq taʼlimi vazirligi va uning hududiy boshqarmalari tomonidan tavsiya etilgan nomzodlardan taʼlim muassasasi rahbarini saylash, shuningdek, belgilangan tartibda uni egallab turgan lavozimidan ozod etish haqida takliflar kiritishi, taʼlim muasassasini rivojlantirishning ustuvor yoʻnalishlarini belgilash, taʼlim muassasasi rahbarining muassasa faoliyatini tkaomillashtirish, moliyaviy xoʻjalik holati, daromadlar va xarajatlar, byudjet, byudjetdan tashqari, homiylik va boshqa mablagʻlardan foydalanish boʻyicha koʻrilgan chora-tadbirlar toʻgʻrisidagi hisobotlarini tinglash, oʻquvchilar uchun yaratilgan sharoitlar ustidan tizimli ravishda monitoring oʻrnatish, ota-onalarning va oʻquvchilarning murojaatlarini koʻrib chiqish kabi vazifalarni hal etishga masʼul boʻladi.

Kengash aʼzolari taʼlim muasassasi direktori, oʻrinbosarlarining qarindoshlari, yaqinlaridan saylanishiga yoʻl qoʻyilmaydi. Maktab direktori Kengash ishini tashkil qilish uchun masʼul hisoblanadi.

Kengash yigʻilishlari oʻtkazilganligi haqidagi bayonnomalar yigʻilish oʻtkazilgan kundan boshlab 3 kundan kechiktirmay, tegishli Xalq taʼlimi vazirligi hamda uning hududiy boshqarmalariga taqdim etilishi lozim.

Kengash faoliyatiga tuman(shahar) xalq taʼlimi boʻlimi aralashmaydi.

Kengash maktab direktori lavozimiga tavsiya etilgan nomzodlar orasidan eng munosibini ochiq ovoz berish yoʻli bilan saylash vakolatiga ega. Kengash aʼzolari tomonidan nomzodga qarshi ovoz berilgan taqdirda, uni direktorlik lavozimiga tayinlashni rad etish haqida uni tavsiya etgan Xalq taʼlimi vazirligi yoki uning hududiy boshqarmalariga maʼlum qiladi.

Taʼlim muassasasini rivojlantirishning ustuvor yoʻnalishlarini belgilash, maktabda taʼlim-tarbiya jarayonining sifatli tashkil etilishi boʻyicha jamoatchilik nazoratini oʻrnatish ham kengashning asosiy vazifalaridandir.

Oʻylaymizki, maktablarda kuzatuv kengashlarining tashkil qilinishi taʼlim jarayonining shaffofligini taʼminlash, taʼlim jarayonini samarali boshqarishda jamoatchilik taʼsirini kuchaytirishga, pirovardida esa oʻquvchilarning sifatli taʼlim olishlari va mamlakatimiz taraqqiyotiga munosib hissa qoʻshadigan kadrlar boʻlib yetishishi kabi ezgu maqsadlarga xizmat qiladi.

Otabek XIDIPBOYeV, tuman xalq taʼlimi boʻlimi mutaxassisi.