73 yoshli otaxon qanday qilib har yili tomorqasidan 40-50 mln. daromad qiladi?

 

– Men har yili tomorqa yerimdan 40-50 mln. soʻm daromad qilaman. 

 

Tomorqamga issiqxona qurganman. Alohida pitomnik-issiqxonada tuvaklarga pomidor, bodring, boʻlgʻor qalampiri va boshqa mahsulotlarni yetishtirib, keyinchalik klyonka ostiga oʻtkazaman. Kun isishi bilan ochiq maydonga joylashtiraman. Bu tajribani men 1970-yillarda ashxobodlik oʻrtoqlarimdan oʻrganganman va shundan buyon qoʻllab kelaman, – deydi Jumabay ogʻa. – Bunga hali mevali daraxtlarimdan va ipakchilikdan tushadigan daromadlarimni qoʻshmadim. Biz bozordan hech qanday meva-sabzavot, poliz mahsulotlarini sotib olmaymiz. Hammasi oʻzimizning yerimizda yetishtiriladi. Goʻsht va sut ham oʻzimizda: uy parrandalarining hamma turini, qoʻy-echki, qora mol saqlaymiz. Uyimiz oldida 4 sotix maydonda hovuzimiz bor. Baliq ham yetishtirib kelamiz.

 

 

Otaxon shu yoshiga qaramay, hamon tetik, harakatlari chaqqon. 

 

Ertalabdan tinmay tomorqasining tarbiyasi bilan band. Ayvondagi mollariga ham oʻzi oʻt-choʻp toshib yuribti. Kataklardagi parrandalarini ham esdan chiqarmaydi. 

 

Otaxonning oʻgʻil-qizlari va nabiralari ota tarbiyasini boʻyiga teran singdirgan. Har qaysisining oʻz oldiga xoʻjaligi va ishi boʻlsa ham, qoʻllari boʻshashi bilan otasining yoniga hozir boʻladi.

 

 

Oʻtgan yili oliygohga topshirib, kira olmagan nabirasi ham tushkunliikka tushmadi, aksincha, otasining qoshida haqiqiy hayotiy mashgʻulotlarini oʻtamoqda. 

 

Jumaboy ogʻaning taʼkidlashicha, mehnat kishini qaritmaydi, aksincha, insonga kuch beradi. Yerni Onaga bejiz qiyoslamaydi. Yer insonni boqadi, agar Siz uni boqsangiz.

 

 

Manba: OʻzA