Jayxun ilhomlari

ENDI

Yoʻlsiz suv ham oqar behuda,

Umr uqtirdi, bilaman endi.

Oʻrinli-ku yor-doʻstga juda,

Kitob sovgʻa qilaman endi.

Oltin-kumush baxt bermas boylik,

Sirti silliq gullik – chiroylik,

Olma oni, ichi saroylik –

Kitob sovgʻa qilaman endi.

Kitob – kalom jamlagan olam,

Sir ocharsan qochmasang, bolam,

Men – bogʻboning, sen boʻlib lolam,

Kitob sovgʻa qilaman endi.

Yuz-koʻzingga nur taratadi,

Ilmlilikni ul yaratadi,

Ilib olsang, koʻp yarashadi,

Kitob sovgʻa qilaman endi!

J.HIDOYaTOV.

 

QAYDAN IZLAB TOPGUM ENDI?

Muhammad Yusuf xotirasiga

Mana bugun bogʻda sarin sabo yeldi,

Qaldirgʻochlar gul bahorni boshlab keldi,

Lek bu bahor koʻzlarimni yoshlab keldi,

Koʻzimda yosh qizgʻaldoqni oʻpgum endi,

Muhammadni qaydan izlab topgum endi?

Mayli, barcha shoirlarni ustoz deyin,

Topolmayman lek, Muhammad Yusufdayin.

Koʻzlarimda yosh qalqiydi borgan sayin,

Oy yuzini etak bilan yopgum endi,

Muhammadni qaydan izlab topgum endi?

Bir mung chiqmas soʻz mulkiga sultonlardan,

Soʻrolmayman Qodiriy va Choʻlponlardan.

Qidiraymi izlarini osmonlardan,

Kech boʻlsa-da, Andijonga chopgum endi,

Muhammadni qaydan izlab topgum endi?

Besh yosh edim, afsus, uni koʻrolmadim,

Ming savol bor, birortasin soʻrolmadim,

Men hali ham Andijonga borolmadim,

Borsam agar, qabrin quchib yotgum endi,

Muhammadni qaydan izlab topgum endi?

Komronbek Kamol,

“Muhammad Yusuf izdoshlari”

toʻplamidan. Qangli ovuli.

 

HUNAR

Derlar, oʻrgansang hunar,

Hunar-la rizqing unar.

Chala bilsang qirqtasin,

Toʻkis bilgin bittasin.

U ajoyib moʻʼjiza,

Hech tuganmas xazina.

Boyliging tugasa ham,

Hunaring ketmas sira.

Nilufar BEKIMBETOVA,

30-sonli maktab oʻquvchisi.

 

KITOBLAR OLAMI

Mening kitob javonim,

Koʻzimni quvnatadi.

Doston, sheʼr-u ertaklar,

Dilimni yayratadi.

Dadajonim doimo,

Sovgʻa qiladi kitob.

Xonam ham nurga toʻlar –

Kitoblar misli oftob.

“Sariq devni minib”mi,

“Sariq devning oʻlimi”.

Oʻqigach, bilsa boʻlar,

Toʻgʻri hayot yoʻlini.

Alisher bobomizning,

Gʻazallarin oʻqidim.

Ulardan zavqlanib men,

Turfa sheʼrlar toʻqidim.

“Gulliverning sayohati”n,

Oʻqib maza qildim men.

U bilan hatto birga,

Sayohatda boʻldim men.

“Alpomish”ni oʻqigach,

Katta saboqlar oldim.

Ogʻa-ini janjalining,

Yomon tomonin bildim.

Konfutsiy taʼlimoti,

Ezgulikka boshlaydi.

Hatto, baʼzi jumlalar,

Koʻzingizni yoshlaydi.

“Qobusnoma” oʻgitlari,

Yoʻlingizni yoritar.

Ezgulik va yovuzlikning,

Chegarasin tanitar.

Oʻqib, uqsak kitoblarni,

Toʻgʻri ibrat olamiz.

Yurt ishonchin oqlaydigan

Yigit-qizlar boʻlamiz.

Ozoda KAMOLOVA,

19-maktab oʻquvchisi.

 

Kitob

Bizga beradi bilim,

Oʻrgatar hayot ilmin.

Doʻst boʻling kitob bilan,

Tanishing olam bilan.

Yangi-yangi kitoblar

Oʻqib oling baholar.

Hamroh boʻlar har qachon

Siz izlagan qahramon.

Layloxon KAMOLOVA, 40-sonli maktab oʻquvchisi.

 

MUSTAQILLIGIMIZ ADABIY BOʻLSIN

Onaning bagʻriday issiq Vatanim,

Tuprogʻi bebaho, oltin Vatanim.

Senga taʼzim qilay, koʻksimda qoʻlim,

Mustaqilligimiz abadiy boʻlsin!

Seni koʻrolmayin yurganlar qancha,

Zimdan toshlar otib yurganlar qancha?

Xalqingning birligi, mardligi uchun,

Senga yovlar yaqin kelolmas aslo.

Bayrogʻing koʻklarga koʻtarmoq uchun,

Ravon yoʻlga chiqdik, havasda ochun.

Yoshlar kamarbasta ezgu yoʻlingda,

Mangu mustaqillik va hurlik uchun!

M.Madiyorov, 51-sonli maktabning Yoshlar ittifoqi boshlangʻich tashkiloti yetakchisi.

 

MEHRIBON USTOZIM

Maktabga ilk bora qoʻyganda qadam,

Meni kutib oldi yorugʻ yuz bilan.

Qoʻlimga tutqazib qogʻoz-u qalam,

Oʻqish va yozishni oʻrgatgan onam –

Mehribonim mening, aziz Ustozim!

Shu ondan oʻzimni baxtiyor sezdim,

Goʻyo osmonlarda parvoz qildim men.

Xayolimda cheksiz dunyoni kezdim,

Chunki ilm tomon qadam qoʻydim men.

Dilga havas, hayrat solgan Ustozim!

Dilnoza BOZORBOYeVA, 40-maktab oʻquvchisi.

 

DOʻSTLIK

Qanday yaxshi yoningda oʻrtoq,

Doʻstlaring-la yashasang inoq.

Shundaylar bor, ammo hayotda –

Doʻstlari yoʻq, mehrdan yiroq.

Doʻsting bilan bu dunyo goʻzal,

Barcha inson tinch-totuv yashar.

Doʻstlar uchun oqibat afzal,

Bir-biriga mehr ulashar.

Doʻstlik bilan munavvar olam,

Doʻsti yoʻqlar yutarlar alam.

Doʻstlik bilan mangu osuda,

Xalqlar yashar va millatlar ham.

Iroda BEKIMBETOVA,

30-maktab oʻquvchisi.