Bolaga eʼtibor – oilaga va millat kelajagiga ehtirom ifodasi

Oila jamiyatning asosiy boʻgʻinidir hamda jamiyat va davlat muhofazasida boʻlish huquqiga ega.

(Oʻzbekiston Respublikasi Konstitutsiyasining 63-moddasidan)

Istiqlol yillarida yoshlarga oila qurish naqadar muhim va masʼuliyatli ish ekanini anglatish, sogʻlom oilani shakllantirish, oilada yuksak maʼnaviy-axloqiy muhitni qaror toptirish uchun zarur shart-sharoit yaratish eng ustuvor siyosat darajasiga koʻtarildi.

Darhaqiqat, oila – fuqarolik jamiyatining, davlatning eng muhim hujayrasi. Sababi har bir jamiyat aʼzosining tarbiyasi, eng avvalo, oiladan boshlanadi. Oʻsib kelayotgan avlodning yetukligini ham, inqirozini ham oila muhiti belgilab beradi. Agar oila barkamol, ota-onalar maʼnaviyatli, qadriyatlarimizga eʼtiborli boʻlsa, bunday oilada yomon farzand tarbiyalanmaydi.

Yangi 2014-yilga muhtaram Prezidentimiz tomonidan "Sogʻlom bola yili” deb nom berilishi barcha davlat  idoralari, nodavlat va ijtimoiy tashkilotlar qatorida fuqarolik holati dalolatnomalarini yozish (FHDYo) organlari zimmasiga ham katta masʼuliyat yukladi.

Muhtaram Prezidentimiz Oʻzbekiston Respublikasi Konstitutsiyasining 21 yilligiga bagʻishlangan tantanali yigʻilishda soʻzlagan maʼruzasida shunday deb taʼkidladilar: "Maʼlumki, mamlakatimizda boʻlgʻusi kelin-kuyovlarni nikohdan oldin tibbiy koʻrikdan oʻtkazish tartibi joriy etilgan boʻlib, bundan koʻzlangan asosiy maqsad sogʻlom oila qurish, sogʻlom bolani dunyoga keltirish bilan bogʻliq. Lekin afsuski, insonning hayoti, tugʻilajak farzandning taqdiriga bevosita daxldor bu masalaga baʼzan masʼuliyatsizlik bilan qarash, soxta va yuzaki xulosalar chiqarish, tibbiy maʼlumotnomalarni sotib olish kabi holatlar uchrab turishi barchamizni tashvishga solishi zarur”.

Shunday ekan, Vazirlar Mahkamasining 2003-yil 25-avgustda qabul qilingan "Nikohlanuvchi shaxslarni tibbiy koʻrikdan oʻtkazish toʻgʻrisidagi nizomni tasdiqlash haqida”gi Qarori ijrosini taʼminlashga alohida eʼtibor qaratishimiz lozim.  Oila qurish arafasidagi yoshlar bir-birining  salomatligi haqida aniq maʼlumotga ega boʻlishini taʼminlash orqali kelgusida befarzandlik, jismoniy, ruhiy rivojlanishida nuqsoni boʻlgan bola tugʻilishining oldini olishga,  ajralishlarning kamayishiga erishiladi.

Ana shu maqsadlardan kelib chiqib, oila institutini yanada takomillashtirish, nikoh masʼuliyati, huquq va majburiyatlar tengligi, qon-qarindoshlik munosabalarining ahamiyati haqida yanada mazmunli, samarali targʻibot ishlarini olib borish lozim. Bunda avvalo, oilaning muqaddasligi hamda nikoh masʼuliyati boʻyicha turmush qurayotgan yoshlarning bilim va tushunchalarini boyitishga alohida eʼtibor qaratish, xususan, oila qurish har bir inson hayotida ulkan hodisa ekanligi, bu masala shaxsiy, xususiy  doiradan chiqib, ijtimoiy-huquqiy ahamiyat kasb etishini tushuntirish, ikkinchidan, voyaga yetayotgan oʻsmirlar ongida oila masʼuliyati, ularni turmush qurishga tayyorlash, yosh oilalarining huquqiy savodxonligini tubdan yaxshilash, oilada bolaning qonuniy huquq va manfaatlari himoyasi boʻyicha tadbirlar tashkil qilish boʻyicha tegishli mutaxassislar ishtirokida tushuntirish ishlarini olib borish zarur.

Xulosa oʻrnida shuni aytish joizki, ham maʼnan, ham jismonan sogʻlom oilaning vujudga kelishi yurt va millat taqdiriga daxldor masaladir.

Zero, Yurtboshimiz taʼkidlaganlaridek, "Sogʻlom bola – avvalo, sogʻlom va ahil oilaning mevasidir. Biz tayanchimiz va suyanchimiz, gʻururimiz va iftixorimiz boʻlmish bolalarimizga ishonch bilan, hurmat-eʼtibor bilan qarashni kelajagimizga boʻlgan ishonch, millatimizga, xalqimizga boʻlgan hurmat-ehtirom ifodasi deb bilamiz”.

Zulhumor BOLTABOYeVA,

tuman FHDYo boʻlimi inspektori, 3-darajali huquqshunos.