NUPBEK ENDI PPEZIDENT MAKTABIDA OʻQIYDI

Tumanimizdagi 36-umumtaʼlim maktabining aʼlochi oʻquvchisi Nurbek Yoʻldoshev endi Prezident maktabida oʻqiydi. Xoʻsh, Nurbekjon bunga qanday erishdi?

Bolaligidan hamma narsaga qiziquvchan Nurbek umumtaʼlim maktabining 1-sinfiga qabul qilinganidayoq oʻzining alohida qobiliyati bilan ajralib turar, tengdoshlariga nisbatan fikrlash doirasi keng, alifbeni va sanoqni oʻzlashtirishda ancha iqtidorli edi. Ikkinchi, uchinchi sinfga oʻtganida esa u oʻzining yana bir qobiliyatini namoyon etdi, sheʼrlar yoza boshladi. “Taraqqiyot koʻzgusi” va “Mening oilam” gazetalarida sheʼrlari yoritilganida u 9 yoshda, amudaryolik yoshlar ijodidan namunalar jamlangan “Jayxun jilgʻalari” toʻplamida  sheʼrlari chop etilganida endigina 11 yoshga toʻlgan bolakay edi.

Nurbekning qiziqishlari yoshi ulgʻaygan sari yanada kengaydi. U matematika faniga ixlos qoʻydi. 36-umumtaʼlim maktabining  matematika fani  oʻqituvchilari Temur Japaqov va Payhon  Yakubovalarning har bir darsini qunt bilan oʻzlashtirdi. Bir vaqtning  oʻzida ingliz tili fani oʻqituvchisi Dildora Xolmenova olib boradigan darslarni maroq bilan oʻrgana boshladi. Undagi xorijiy tillarni oʻrganishga boʻlgan alohida qobiliyatni  sezgan sinf rahbari, rus tili fani oʻqituvchisi Dilnura Boboniyozova Nurbekjon bilan alohida shugʻullanadigan boʻldi. Yuqori sinfga oʻtganida maktabning  yetakchi rus tili  oʻqituvchisi Nasiba Ahmedova va Nazira Soliyevalar Nurbek Yoʻldoshev uchun xorijiy til oʻzlashtirishning yangi yoʻllarini ochishdi. U sevimli ustozlari yordamida ham xorijiy tillarni, ham mantiqni oʻrgana boshladi. Natijada uning  rus va ingliz tillarida oʻz fikrini maʼnoli, mantiqiy ifodalash qobiliyati shakllandi. Bilimlar bellashuvi va fanlar olimpiadalarida bir necha marta tuman gʻolibi, respublika bosqichlarining bilimdon ishtirokchisiga aylandi.

Oʻzbekistonda, Nukus shahrida ham Prezident maktablarining tashkil etilishi Nurbek Yoʻldoshev uchun yana bir orzusini amalga oshirish imkonini berdi. U aniq fanlar yoʻnalishi boʻyicha maxsus maktabda taʼlim olishni orzu qilardi. Prezident maktablarining tashkil etilishi, uning nazarida ana orzusi tomon yoʻl ochdi. U mustaqil ravishda Prezident maktabiga oʻqishga kirish sinovlariga tayyorlana boshladi. Asli tadbirkor boʻlgan dadasi Bahodir Yusupov va onasi Zulxumor Arikovalar oʻgʻlining bu qatʼiyatini qoʻllab-quvvatlashdi. Mustaqil ravishda sinovlarga tayyorlanishi uchun uyda barcha sharoitlarni yaratib berishdi.

Prezident maktabiga oʻqishga kirish uchun hujjat topshirgan oʻquvchilar soni ancha koʻp, qolaversa, ularning asosiy qismi fanlar olimpiadalari va bilimlar bellashuvining respublika bosqichi gʻoliblari va ishtirokchilari edilar.

Yoshiga nisbatan ancha fikri teran, aniq fanlar boʻyicha bilimdon boʻlgan Nurbek Yoʻldoshev ikki bosqichda oʻtkazilgan kirish imtihonalaridan muvaffaqiyatli oʻtdi. Birinchi bosqichda matematika fanidan eng yuqori natijaga erishgan Nurbek uchun ikkinchi bosqich sinovlari – mantiq boʻyicha sinovlar umuman qiyinchilik tugʻdirmadi. U eng yuqori ball bilan Prezident maktabining 10-sinfiga qabul qilindi.

20-sentyabr kuni 36-umumtaʼlim maktabida Nurbek Yoʻldoshevni Prezident maktabiga oʻqishga kuzatish marosimi boʻlib oʻtdi. Unda tuman hokimining yoshlar masalalari boʻyicha oʻrinbosari Alisher Yoʻldoshev, Nurbek Yoʻldoshevning ustozlari, sinfdosh doʻstlari ishtirok etishdi. Alisher Yoʻldoshev Nurbek YOʻldoshevni Prezident maktabiga kirgani bilan tabrikladi va tuman hokimi S.Yoʻldoshevning shaxsiy tabrigi va tashakkurnomasini taqdim qildi.

- Kelajakda yetuk mutaxassis boʻlib yetishib, ona Vatanimga, xalqimga sidqidildan xizmat qilaman, Oʻzbekistonimiz taraqqiyotiga munosib hissa qoʻshaman. – deydi Nurbekjon oʻz orzulari haqida soʻzlarkan.

Biz iqtidorli va bilimga chanqoq Nurbek Yoʻldoshevga ilm choʻqqilari tomon qoʻygan dadil qadamlarida omad va yuksak parvozlar tilaymiz.

Pobiya YOʻLDOShEVA.