NIKOH - OILA MUSTAHKAMLIGINING TAMAL TOShI

Har bir inson bolasi oilada dunyoga keladi, oilada oʻsib ulgʻayadi va kamolga yetadi. Shuning uchun oilani har qancha avaylab asrasak, ulugʻlab ardoqlasak arziydi. Yangi fuqarolik jamiyatining bunyodkorlari va kelajak egalari boʻlgan yoshlar ham oilada dunyoga kelib, kamolga yetadilar. Aholisi 30.5 million kishidan oshgan qudratli mamlakatimiz yoshlar mamlakati, deb taʼriflanadi. Negaki, mamlakatimiz aholisining 60 foizdan ortigʻini yoshlar tashkil etadi. Jami aholining 40 foizi esa 18 yoshgacha boʻlgan yoshlardir. Ular oila va taʼlim muassasalari tarbiyasidadirlar. Binobarin, mamlakatimizda yangi avlod vujudga kelishida va uning oʻsib ulgʻayishi hamda tarbiyalanishida oilaning oʻrni va roli beqiyosdir. Shu bois hozirgi davrda davlatimiz siyosatida oila mustahkamligi va yoshlar tarbiyasi masalalari ustuvor yoʻnalish olganligi bejiz emas. Bunda albatta davlatimiz eng avvalo konstitutsiyamizga, "Yoshlar toʻgʻrisida”gi Qonunga, "Oila Kodeksi” tamoyillariga va shu yoʻnalishdagi Prezidentimizning qator qarorlar va farmonlarga hamda huquqiy-normativ hujjatlarga tayanadi. Konstitutsiyamizda oila toʻgʻrisida alohida bob ajratilib, oila manfaatlari muhofaza qilinayotganligi va oila mustahkamligi tamoyillari belgilanib kafolatlanayotganligi bejiz emas. Konstitutsiyamizda belgilangan oila manfaatlari, huquqlari va majburiyatlarining "Oila Kodeksi” tamoyillari, talablari va qoidalarida yanada rivojlantirilib va mustahkamlanib er-xotin oldiga quyilayotgan vazifalar va majburiyatlar hamda burchlar qonuniylashtirilgan boʻlib, ularni bajarishga oʻzaro teng huquqli boʻlgan, er-xotinlar majburdirlar. Ayniqsa farzand tarbiyasidagi ota-ona masʼulligi kuchaytirilib bu boradagi majburiyatlari va burchlarini bekamu koʻst bajarish majburligi qonunda belgilab berilgan.

Bizning tuman FHDYo boʻlimimiz xodimlari va mutaxassislari Konstitutsiyamizga, "Yoshlar toʻgʻrisida”gi Qonun talablari va gʻoyalari, "Oila kodeksi” tamoyillari va qoidalariga amal qilib, bu boradagi va Prezidentimizning qator qarorlari va Farmonlariga hamda sohaga tegishli boshqada huquqiy normativ hujjatlarga amal qilgan holda oila manfaatlarini koʻzlab, shuningdek, yangi oila quruvchi yosh yigit-qizlarning baxtu saodatlarini koʻzlab orzu-istaklarini, ezgu niyatlarini inobatga olgan xolda ish yuritmoqdamiz.

2013-yil - "Obod turmush yili”da ikki ming nafarga yaqin nikoh qayd qilinib, hujjatlari rasmiylashtirildi. Bu tumanimiz boʻyicha shuncha yangi oila vujudga keldi, demakdir. Turmush qurgan yigit-qizlarning nikohdan oldin tibbiy koʻrikdan oʻz vaqtida oʻtishlari taʼminlanmoqda. Chunki sogʻlom ota-onadan sogʻlom farzand tugʻilishini hayot tasdiqlamoqda.

Hayot goʻzal, baʼzan bilib-bilmay yoʻl qoʻygan xatoliklari tufayli ajralishlar ham sodir boʻlmoqda. Ajrashayotgan oilalardagi oilaviy sharoit va muhitni, kelishmovchiliklar sababini oʻrganganimizda kelin yoki kuyov tanlashdagi adashishlarga yoʻl qoʻyilganligi oydek ravshan boʻlib qoladi. Shuningdek, oilaviy kelishmovchiliklar, nizo va janjallar kelib chiqishining turli sabablari boʻladi. Bunda birinchi navbatda moddiy-iqtisodiy yetishmovchiliklar, qaynona kelin munosabatlarida ahillik yoʻqligi, er-xotinning bir-birovlarini toʻgʻri tushunmasligi, oʻrtada mehr-muhabbat, hurmat-izzatning koʻtarilishi, bir-biriga xiyonat qilishlar tufayli kelishmovchiliklar oxir oqibat er-xotin ajrimlari bilan tugaydi. 2013-yil mobaynida mana shunday sabablarga koʻra tumanimiz boʻyicha 52 ta oilaning nikoh ajrimlari qayd etildi. Eng achinarlisi ajrim qilingan mana shu oilalarning koʻpchiligida kamida ikki nafar farzand tirik yetim boʻlib qolmoqda. Bu goʻdak bolalar uchun ham, oila uchun ham ogʻir fojeadir. Bunday achinarli holatga hech birimizning befarq qarashga haqqimiz yoʻq. Qolaversa, yetarli hayot tajribasiga ega boʻlgan katta yoshdagi kishilarning, qaynota va qaynonalarning, eng yaqin qarindosh-urugʻlarning, mahallaning bunday holatga sovuqqonlik bilan qarab turishlariga barham beradigan payt keldi.

Mana 2014-yil - "Sogʻlom bola yili”ning ham ilk oylari poyoniga yetmoqda. Sogʻlom avlod haqida yanada koʻproq qaygʻurib, sogʻlom farzandlarning dunyoga kelishi, ularning ham jismonan, ham maʼnaviy jihatdan komil inson boʻlib voyaga yetishlari uchun oʻzimizdagi butun imkoniyatlarimizni ishga soladigan davr keldi. Chunki bolalar - kelajagimizdir.

Sanobar Xalbayeva,

tuman FHDYo boʻlimi mudirasi.

(Foto - http://www.haqida.uz)