Yangi sport maydonchasi foydalanishga topshirildi

Mamlakatimizda jismoniy tarbiya va sportni ommalashtirish ijtimoiy siyosatning muhim yoʻnalishlaridan biri etib belgilangan. Chunki sport aholi salomatligini mustahkamlash, yosh avlodni sogʻlom va barkamol etib tarbiyalash orqali jamiyatda sogʻlom turmush tarzini qaror toptiradi.

Yosh avlodning jismonan sogʻlom va barkamol ulgʻayishida sportning oʻrni beqiyos. Shu sababli ham yoshlarni sportga jalb qilish borasida yurtimizda tizimli ishlar qilinmoqda. Sport inshootlarini nafaqat davlat byudjeti mablagʻlari, balki tadbirkorlar tomonidan qurish orqali yoshlarni sportga jalb qilish bilan birga, yangi ish oʻrinlarini tashkil qilish va hududlar iqtisodiyotini raviojlantirishga ham katta eʼtibor qaratilmoqda.

Aynan sport ishnootlarini qurish orqali tadbirkorlikni yanada rivojlantirishga hissa qoʻshish istagida boʻlgan yoshlarimizni qoʻllab quvvatlash maqsadida esa tijorat banklari orqali kreditlari ajratilmoqda.

Sherzod Allayorov shunday yoshlardan biri biri boʻlib, oʻzi yashayotgan Qangli ovulidagi yoshlarning sport bilan shugʻullanishlari uchun xayrli ishga qoʻl urdi. Yaʼni yosh tadbirkorning tashabbusi va uning sport maydonchasi qurish loyihasi “Yoshlar kelajagimiz” jamgʻarmasi tomonidan qoʻllab-quvvatlandi hamda yosh tadbirkorga jamgʻarma tomonidan kredit ajratildi.

26-dekabr kuni Qangli ovulida mazkur mini futbol, voleybol, basketbol va tennis bilan shugʻullanishga moʻljallangan zamonaviy sport maydonchasining ochilishiga bagʻishlangan tantanali marosim boʻlib oʻtdi. “Yoshlar – kelajagimiz” jamgʻarmasi tomonidan ajratilgan 150 mln soʻmlik kredit mablagʻlari va tadbirkorning 60 mln soʻmlik oʻz sarmoyasi hisobiga qad rostlagan mazkur sport inshooti ovul yoshlari uchun munosib bayram tuhfasi boʻldi.

Taʼkidlash kerakki, sport bilan shugʻullanish turli kasalliklar, yoshlar oʻrtasida zararli odatlarning oldini olishga yordam beradi. Sport yoshlar qalbida yuksak madaniyat, vatanparvarlik tuygʻularini shakllantirishda ham muhim oʻrin tutadi. Bu sohada erishilgan yutuqlar mamlakatni dunyoga tanitadi, barcha yurtdoshlarga gʻurur-iftixor bagʻishlaydi.

Sport maydonchasining ochilish marosimida tuman hokimi oʻrinbosarlari Maʼmur Temirboyev, Jasur Norimov, Alisher Yoʻldoshev, Yoshlar ittifoqi tuman Kengashi raisi Mahmud Shermetov, “Yoshlar kelajagimiz” jamgʻarmasi tuman boʻlimi raisi Rashid Tursunboyevlar, shuningdek, Qangli ovul fuqarolar yigʻini masʼullari, ovul aholisi, yoshlari ishtirok etdilar.

Tadbirda soʻzga chiqqanlar mazkur sport maydonchasi Oʻzbekiston Respublikasi Prezidenti tomonidan ilgari surilgan 5 ta muhim tashabbusning biri – yoshlarni jismoniy chiniqtirish, ularning sport sohasida qobiliyatini namoyon qilishlari uchun zarur sharoitlar orqali kelajagimiz egalarini jismonan va maʼnan yetuk insonlar qilib tarbiyalashga xizmat qilishini taʼkidladilar. Yangi sport maydonchasida shgu kuniyoq ovul yoshlaridan tuzilgan jamoalar ishtirokida sport musobaqalari boshlanib ketdi.

Charos ARSLONOVA, tuman hokimligi axborot xizmati rahbari.