AHOLINING IJTIMOIY HIMOYaGA MUHTOJ QATLAMIGA SIFATLI TIBBIY XIZMAT KOʻRSATILMOQDA
Tumanimizda oʻtgan 2019-yil davomida aholining ijtimoiy himoyaga muhtoj qatlamini sifatli va arzon dori vositalari bilan taʼminlashni yaxshilash boʻyicha samarali ishlar amalga oshirildi. Bu haqda tuman hokimi S.Yoʻldashev Xalq deputatlari tuman Kengashining 76-sessiyasida qilgan maʼruzasida batafsil maʼlumot berdi.
Xususan, yil davomida 6107 nafar ijtimoiy himoyaga muhtoj aholiga tuman koʻp tarmoqli markaziy poliklinikasi tomonidan 186 mln. 86 ming soʻm miqdoridagi dori-darmon vositalari berilib, ijtimoiy yordam koʻrsatildi.
Oʻzbekiston Respublikasi Vazirlar Mahkamasining 2015-yil 20-avgustdagi “Keksalar va nogironlarni manzilli ijtimoiy himoya qilish va qoʻllab-quvvatlashni yanada kuchaytirish chora-tadbirlari toʻgʻrisida”gi 237-sonli Qaroriga asosan tuman hokimining qarori qabul qilinib, 115 nafar oʻzgalar parvarishiga muhtoj keksalar, nogironlar va yakka-yolgʻizlar roʻyxati shakllantirildi va aynan shu roʻyxatga olingan shaxslar yil davomida toʻliq dispanser koʻrigidan oʻtkazildi. Ularga tegishli xodimlar tomonidan namunali tibbiy-ijtimoiy xizmatlar koʻrsatilishi taʼminlandi.
60 nafar yolgʻiz keksa va nogironligi boʻlgan shaxslarga 2019-yilning yanvar-noyabr oylari oraligʻida 117 mln. 267 ming soʻm miqdoridagi 15 xil turdagi oziq-ovqat mahsulotlari va gigiyena tovarlari yetkazib berildi.
Turli bayram sanalari munosabati bilan ijtimoiy himoyaga muhtoj shaxslar holidan xabar olish, ularning koʻnglini koʻtarish doimiy anʼanaga aylangan. Shu bois, 115 nafar keksalar va nogironligi boʻlgan shaxslarga Navroʻz – umumxalq bayrami munosabati bilan homiylar hisobidan 7 mln. 215 ming soʻm miqdorida qoʻshimcha moddiy yordamlar, keksalar va nogironlardan 55 nafari bepul dori-darmon vositalari bilan taʼminlandi. Imtiyozlarga ega boʻlgan yakka-yolgʻizlardan 60 nafariga esa byudjet mablagʻlari hisobidan 5 mln. 500 ming soʻm miqdoridagi tibbiy dori-darmonlar berildi.
Oʻtgan 2019-yil davomida muhtoj shaxslarni protez-ortopediya buyumlari, reabilitatsiya texnik vositalari va nogironlik aravachalari bilan taʼminlashga ham alohida eʼtibor berilib, jami 408 nafar nogironligi boʻlgan shaxslar protez-ortopediya buyumlari, reabilitatsiya-texnik vositalar hamda aravachalar bilan taʼminlandi. Yil davomida 204 nafar nogironligi boʻlgan shaxslar va keksalar sihatgohlarda oʻz salomatliklarini tiklashlari uchun bepul yoʻllanmalar berildi.
Aholining ijtimoiy himoyaga muhtoj qatlamiga sifatli tibbiy-sanitariya xizmatini koʻrsatish yangi 2020-yilda ham izchil davom ettiriladi. Bu esa xalqimiz oʻrtasida sogʻlom turmush tarzini qaror toptirish, ularning salomatligini mustahkamlash orqali oilalar mustahkamligini hamda farovonligini taʼminlashga xizmat qiladi.
Robiya Yoʻldosheva.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
