AMUDARYoDA YoShLAR IShTIROKIDA MARAFON-YuGURISh MUSOBAQASI OʻTKAZILDI

Keyingi yillarda mamlakatimizda sportni, xususan, bolalar sportini rivojlantirish borasida keng koʻlamli ishlar amalga oshirilmoqda. 2019-2023-yillarda jismoniy tarbiya va ommaviy sportni rivojlantirish kontseptsiyasi tasdiqlanib, mazkur hujjat asosida qator sport musobaqalari, bellashuvlar va tadbirlar tashkil qilinmoqda.

Qolversa, Prezidentimizning beshta muhim tashabbusi hamda “Obod qishloq” va “Obod mahalla” dasturlari doirasida olis hududlarda ham sport obʼektlari ishga tushirilib, yoshlar sportga faol jalb etilmoqda. Mana shu kabi ishlar natijasida sport bilan shugʻullanayotgan yoshlar safi kun sayin ortib bormoqda.

Amudaryo tumanida yoshlarni sportga jalb qilish boʻyicha amalga oshirilayotgan ishlar bilan yaqindan tanishish maqsadida Respublika ishchi guruhi aʼzolari 16-yanvar kuni tuman Bolalar va oʻsmirlar sport maktabiga tashrif buyurdi.

Taʼkidlash kerakki, tumanda jismoniy tarbiya va omaviy sportni rivojlantirish sohasida olib borilgan ishlar natijasida bugungi kunda tumanning barcha hududlarida jami 15 ta sunʼiy qoplamali futbol maydonchalari mavjud.

Bolalar-oʻsmirlar sport maktabida 133 ta guruhda jami 1 ming 794 nafar yoshlar sport sirlarini oʻrganmoqda. Ularning 314 nafari qizlardir. Sport maktabida 21 ta sport turi boʻyicha toʻgaraklar tashkil qilingan boʻlib, shundan 15 tasi olimpiya, 2 tasi milliy, 4 tasi boshqa sport turlari boʻyicha olib boriladi. Yoshlarga 57 nafar murabbiylar sport sirlarini oʻrgatishmoqda.

2019-yil amudaryolik sportchilar hayotida chuqur iz qoldirdi. Birgina tuman Bolalar-oʻsmirlar sport maktabi sportchilari 62 ta medal sohiblari boʻlishdi. Oʻzbekiston kubogi va chempionatlarida 6 ta oltin, 2 ta kumush, 11 ta bronza medalni qoʻlga kiritdilar. Xalqaro musobaqalarda esa sport maktabi tarbiyalanuvchilari 10 ta oltin, 15 ta kumush, 18 ta bronza medalga sazovor boʻldi.

Ishchi guruh aʼzolari sport toʻgaraklari faoliyati bilan yaqindan tanishib, bolalar hamda oʻsmirlar bilan muloqot qildi. Sportchilar uchun yaratilgan sharoitlar bilan yaqindan tanishgan ishchi guruh aʼzolari yoshlarni sportga yanada koʻproq jalb qilish, toʻgaraklar sonini koʻpaytirish boʻyicha tavsiyalar berdi. Shuningdek, faol sportchi yoshlarga esdalik sovgʻalari topshirildi.

Chindan ham, sport bilan shugʻullangan yoshlar nafaqat boʻsh vaqtini mazmunli oʻtkazadi, balki jismoniy chiniqib, sogʻlom boʻladi. Eng muhimi, sogʻlom turmush tarzi sport bilan shugʻullangan insonning hayotiy qoidasiga aylanadi.

Shu maqsadda Mangʻit shahrida oʻtkazilgan marafonda 300 nafardan ziyod yoshlar ishtirok etishdi. Bayramona kayfiyatda tashkil qilingan ushbu musobaqalar amudaryolik yoshlarni birlashtirishda muhim vosita boʻldi.

Qayd etish kerakki, Oʻzbekiston Respublikasi Prezidentining ijtimoiy, maʼnaviy-maʼrifiy sohalardagi ishlarni yangi tizim asosida yoʻlga qoʻyish borasidagi 5 ta muhim tashabbusidan biri ham aynan yoshlarni sportga jalb qilish orqali ularni sogʻlom va barkamol qilib voyaga yetkazishdek ezgu maqsadga qaratilgan.

Marafon gʻolib va sovrindorlariga tuman hokimligi va tashkilotchilarning esdalik sovgʻalari, diplomlar topshirildi. Sport tadbirida faol ishtirok etgan bir guruh yoshlar turli nominatsiyalar boʻyicha munosib taqdirlandi.

Bu kabi sport tadbirlari aholi, xususan yoshlar oʻrtasida sportni ommaviylashtirishda muhim oʻrin tutadi hamda sport rivojiga hissa qoʻshish bilan birga kelajagimiz egalarining sogʻlom va barkamol boʻlib ulgʻayishlarida hal qiluvchi ahamiyat kasb etadi.

Gʻ.Yeshniyozov