“POLVONBOY OVULI” MChJ BIR KUNDA IKKI YaNGI TsEX FAOLIYaTINI YOʻLGA QOʻYDI

Toʻlqin ovulida faoliyat yuritayotgan “Polvonboy ovuli” masʼuliyati cheklangan jamiyati asosan chorvachilik mahsulotlari yetishtirishga asoslangan. Hozirgi kunda 200 tadan ziyod qoramol parvarishlanayotgan boʻlsa, shularning 110 boshdan ziyodini  zotdor mollar tashkil etadi, 75 boshi 2019-yilda Ukraina davlatidan keltirilgan edi. Mavjud qoramollarni  parvarishlash uchun korxonaga qarashli 47 gektardan ziyod maydonda ozuqabop ekinlar yetishtiriladi va toʻyimli ozuqa tayyorlanib, belgilangan meʼyorda beriladi.

Maʼsuliyati cheklangan jamiyatda har yili goʻsht, sut yetishtirish rejalari ortigʻi bilan bajarib kelinayapti. Korxonada yetishtirilayotgan chorvachilik mahsulotlarini qayta ishlash maqsadida shu yil 22-yanvar kuni Toʻlqin ovuli markazida qaymoq ishlab chiqarish tsexi ishga tushirildi. Jamiyatning oʻz mablagʻi va “Xalq banki” Mangʻit filialining 285 milliondan ziyod kredit mablagʻi evaziga Italiyadan keltirilgan zamonaviy texnologiya kuniga 1 tonna qaymoq tayyorlash imkonini beradi. Smetana,  kefir, qatiq, yogurt ham ishlab chiqarish yoʻlga qoʻyilmoqda.

“Polvonboy ovuli” masʼuliyati cheklangan jamiyatida avval 6 nafar toʻlqinliklar ish bilan band boʻlgan boʻlsa, qaymoq ishlab chiqarish tsexi ishga tushirilishi bilan yana uchta yangi ish oʻrni yaratildi.

Tsexning ishga tushirilishiga bagʻishlangan yigʻilishda tuman hokimi Sultonboy  Yoʻldoshev, ovul faollari ishtirok etdilar va ish boshlayotgan tsex faoliyati yurtdoshlarimizni arzon, sifatli va mahalliy chorvachilik mahsulotlari bilan taʼminlashda muhim hissa boʻlib qoʻshilishiga ishonch bildirdilar.

Shunisi eʼtiborliki, yangilikka intiluvchan, izlanuvchan va mehnat faoliyatini kengaytirishga harakat qilayotgan “Polvonboy ovuli” MChJ rahbariyati qaymoq ishlab chiqarish tsexi bilan birgalikda shu yerning oʻzida non pishirish tsexini ham bunyod etdi. Natijada ovulning yana uch fuqarosi doimiy ish oʻrniga ega boʻldilar.

Kuniga talabga qarab 1000 taga non, qolipli non, baton non va non mahsulotlari ishlab chiqarish quvvatiga ega tsex ishga tushirilishi ovul hayotida muhim voqea boʻldi.

Tuman hokimi S.Yoʻldoshev tsexdagi tayyorlangan ilk mahsulotlarga ulkan baho berdi va yurtdoshlari uchun ana shunday xayrli ishlarni amalga oshirayotgan uchun korxona rahbari Mansur Xoʻjaahmedovga ulkan minnatdorchilik bildirdi.

Mamlakatimizda tadbirkorlikka, ishbilarmonlikka keng yoʻl ochilayotgani ovul yoshlarining doimiy ish oʻrniga ega boʻlishi, yurtimiz farovonligiga xizmat qilishi bilan ahamiyatlidir.

O.RAJABOVA.