HARBIYLAR IShTIROKIDA MAKTABLARDA TADBIRLAR OʻTKAZILDI

Tumanimizda faoliyat yuritayotgan Davlat xavfsizlik xizmati chegara qoʻshinlari tarkibidagi 9202-“D”harbiy qismi harbiy xizmatchilari tumanimizning chegara hududida istiqomat qiluvchi aholi bilan mustahkam doʻstona aloqa oʻrnatib, chegara hududda yashovchi fuqarolar bilishi lozim boʻlgan qonun-qoidalar, Oʻzbekiston Respublikasining “Davlat chegarasi toʻgʻrisida”gi qonunida belgilangan tartiblar xususida keng tushuntirishlar olib borishmoqda.

Shuningdek, chegara  hududlarda joylashgan maktablar oʻquvchilari davrasida ham tez-tez boʻlishib, ularning qalbida vatanparvarlik tuygʻularini, milliy, maʼnaviy-madaniy qadriyatlarni qaror toptirish, “Jaholatga qarshi - maʼrifat” gʻoyasi asosida jamiyatda ijtimoiy-maʼnaviy muhit barqarorligini taʼminlash, ezgulik va tinchlikni qadrlash tuygʻularini mustahkamlash, Qurolli Kuchlarimizning harbiy salohiyati va sarhadlarimizning daxlsizligini taʼminlashdagi olib borayotgan ishlari xususida suhbatlar uyushtirib, Milliy Armiyamizga nisbatan hurmat tuygʻusini tarbiyalashga harakat qilishmoqda.

Shu yilning 6-fevralida Qilichboy ovulida joylashgan 29- va 39-sonli maktablarda soʻz mulkining sultoni, ulugʻ mutafakkir bobomiz Alisher Navoiy tavalludining 579 yilligi munosabati bilan “Rahmat senga, qadrdon maktabim” shiori ostida oʻtkazilgan adabiy-maʼrifiy tadbir ham shularning biridir.

Tadbirga tashrif buyurgan mazkur qism harbiy xizmatchilari avvalo oʻquvchi yoshlar bilan inson hayotida maktab taʼlimining oʻrni xususida, maktabda ilk savod chiqarib, fanlar asoslarini mustahkam egallagan oʻquvchilar, qaysi kasbni, mutaxassislikni tanlashidan qatʼiy nazar, hayotda oʻz oʻrinlarini topa olishi haqida soʻz yuritdilar. Shuningdek, millatimizning maʼnaviy oʻzligini olamshumul darajada namoyon etgan tabarruk inson, bobokalonimiz Alisher Navoiy tavalludi har yili keng miqyosda nishonlanishini, bu ulugʻ zotning dunyo tamadduni taraqqiyotiga qoʻshgan hissasi benazirligini  faxr-u iftixor bilan tilga oldilar.

Ulugʻ bobomizning hayot yoʻllari, umri davomida yozgan  gʻazalu-ruboiylari, yozgan barcha tarixiy asarlari haqida bolaligidanoq ilmu-maʼrifatga oshno boʻlganligi, purmaʼno gʻazallariga bastalangan kuy-qoʻshiqlar mumtoz navolar ishqibozlarining yuksak hurmatiga sazovor boʻlgani va avloddan-avlodga oʻtib kelayotganini ham gapirib oʻtdilar. Undan tashqari, muhtaram Prezidentimiz Shavkat Mirziyoyev tashabbusi bilan yurtimizda kitobxonlik madaniyati muhim voqelikka aylanayotgan bir paytda Mir Alisher Navoiy bobomizning tengsiz maʼnaviy merosi bugungi yoshlar va kelajak avlodlar uchun ham hayot maktabi boʻlishini alohida taʼkidladilar.

Tadbir davomida maktabning yuqori sinflari oʻquvchilari oʻrtasida “Navoiy asarlari bilimdoni” tanlovi  oʻtkazildi. Tanlovda oʻquvchilar Navoiy asarlari yuzasidan berilgan savollarga javoblar berdilar va ijodidan namunalarni ifodali ijro etdilar. Ular yuqori saviyada Navoiy hazratlarining hayoti va ijodi boʻyicha mustahkam bilimga ega ekanliklarini namoyish qilishdi.
Tadbirda faol qatnashgan oʻquvchilar harbiy xizmatchilar tomonidan ragʻbatlantirildi.

Fazliddin MUHAMMADIYeV, 9202 “D” harbiy qism xizmatchisi.