“Ajdodlar merosi mangu muqaddas” nomli badiiy kecha oʻtkazildi

Alisher Navoiy turkiy til asoschisi, ulugʻ mutafakkir shoir, olim. Nafaqat oʻzbek mumtoz adabiyotida, balki jahon adabiyotida ham oʻzining betakror asarlari bilan oʻchmas nom hamda avlodlar maʼnaviyatini yukslatiruvchi buyuk meros qoldirgan. Butun mamlakatimizda adabiyot, soʻz sanʼatining mohir ustasi Nizomiddin mir Alisher Navoiyning tavalludi kuni munosabati bilan turli xil tadbirlar tashkil qilinadi. Ushbu tadbirlarda buyuk siymo Alisher Navoiy xotirlanadi, eʼzozlanadi hamda ehtirom koʻrsatiladi.

Tumanimizda ham ushbu sana keng miqyosda nishonlanadi. Barcha taʼlim maskanlarida adabiy-badiiy kechalar tashkil qilinib, oʻquvchilar turli chiqishlar bilan moziyga sayohat qilishadi. Shu kabi ajoyib tadbirlardan biri tumanimizdagi 60-sonli umumtaʼlim maktabida ham boʻlib oʻtdi.

“Ajdodlar merosi mangu muqaddas” deya nomlangan tadbirni maktabning ona tili va adabiyot fani oʻqituvchisi Feruza Gʻaniyeva ochdi hamda olib bordi. Ustoz oʻz soʻzida, Alisher Navoiyning oʻzbek mumtoz adabiyotida tutgan oʻrni hamda ahamiyati, jahon xalqlarining mashhur olimlari tomonidan adibning asarlarini koʻplab chet tillariga tarjima qilinganligi, sevib mutolaa qilinishi hamda mutafakkir asarlarining mazmun-mohiyati haqida toʻxtalib oʻtdi.

Badiiy kechada maktabning yuqori sinf oʻquvchilari ishtirok etishdi. Bilimga chanqoq oʻquvchilar oʻzlarining Alisher Navoiy hayoti va ijodi, ayniqsa, sheʼriyatiga boʻlgan qizishlarini, bilimlarini namoyish qilishdi hamda mutafakkir ijod mahsullaridan namunalar keltirishdi. Maktabning 5-sinf oʻquvchilari adibning ruboiylaridan va “Xamsa” asarining birinchi dostoni, axloqiy-didaktik ruhda yozilgan asar “Hayrat ul abror”dan parchalarni yigʻilganlar eʼtiboriga havola qildilar. Shuningdek, 6-sinf oʻquvchilari Navoiy hikmatlaridan namunalar keltirdilar hamda oʻzbek adabiyotining zabardast vakili Mirkarim Osimning adib bolaligiga bagʻishlangan “Zulmat ichra nur” asaridan sahna koʻrinishlarini ijro qildilar.

Taʼkidlash joizki, Alisher Navoiy oʻz asarlari bilan jahon shoir-u mutafakkirlarini lol qoldirgan. Dunyoning mashhur kishilari oʻz asarlarida buyuk siymoga ajoyib taʼriflar keltirib oʻtganlar. Bu esa maktabdagi izlanuvchan 7-sinf oʻquvchilarining diqqatini tortdi. Oʻquvchilar oʻz chiqishlarida jahonning mashhur kishilarining Navoiyga bergan taʼriflarini keltirib, Alisher Navoiyga bagʻishlab yozilgan sheʼrlardan namunalar aytib, u haqidagi asarlardan sahna koʻrinishlari namoyish qildilar.

Undan tashqari, 8-sinf oʻquvchilari Navoiy sheʼriyatidan gʻazallar hamda ruboiylar aytishib, sheʼriyat gulshaniga sayohat qildilar. Oʻquvchilar shoirning “Kelmadi”, “Boʻldum sanga”, “Bol”, “Qilgʻil” va “Deyin” radifli gʻazallarini ifodali tarzda aytishib, gʻazallarning mazmuni haqida tushunchalar berdilar. 9-sinf oʻquvchilari esa Navoiy ijodining gultoji boʻlgan “Xamsa” asarining tarixi, asar tarkibidagi dostonlarda aks etgan mazmun-mohiyat haqida maʼlumotlar keltirdilar.
Adabiy-badiiy kecha barcha ishtirokchilarda katta taassurot qoldirib, adabiyotga, soʻz sanʼatiga qiziqishlarini yanada oshirdi.

Charos Arslonova.