Tabiat va bolalar
Bugungi kunda Respublikamizda farzandlarimizning jismonan sogʻlom, maʼnan yetuk, barkamol avlod boʻlib, voyaga yetishlari uchun keng koʻlamda taʼlim-tarbiya - ishlari olib borilmoqda. Respublikamizda "Barkamol avlod” bolalar markazlarining tashkil etilishi bunga yaqqol misol boʻla oladi. Nomidan koʻrinib turibdiki, bu markazlarda farzandlarimiz zukko va komil insonboʻlib kamol topishlari uchun barcha imkoniyatlar yaratilgan. Farzandlarimizning turli kasb sirlarini oʻrganishi, boʻsh vaqtlarini mazmunli oʻtkazishi, ularning ichki qiziqishlarini uygʻotish maqsadida turli toʻgaraklarning ahamiyati beqiyosdir.
Tumanimizning chekka bir qishlogʻi boʻlmish Qangli ovuli markazida 29-sonli umumtaʼlim oʻrta maktabi joylashgan. Bu maktab 2008-2009 yillarda Davlat dasturiga asosan, yangidan qurilib, ishga tushirilgan. Shu maktabda BABMga qarashli "Yosh ekolog” toʻgaragida toʻgarak rahbari boʻlib faoliyat yuritayotganimga 4 yil boʻldi. Toʻgarakka 30 nafar oʻquvchi jalb qilingan "Yosh ekolog” toʻgaragi oʻz nomidan koʻrinib turibdiki, oʻquvchi-yoshlarning egologik ongini shakllantirish, bugungi kundagi ekologik ahvoldan xabardor etish, sanitariya-gigiyena malakalarini rivojlantirish, oila va jamiyatda sogʻlom turmush tarzini shakllantirish hamda bugungi kundagi dolzarb ekologik muammolarni nazariy hamda amaliy koʻrsatib berish orqali ularni tabiatga muhabbat ruhida tarbiyalashdan iborat. Maktabimizda alohida toʻgarak xonasi mavjud boʻlib, xona sohaga oid koʻrgazmali qurollar bilan jihozlangan: turli xil tabiat tasvirlari aks ettirilgan stendlar, oʻsimlik va hayvonlar tasvirlangan rasmlar, oʻquvchilarning oʻzlari tayyorlagan maketlar, turli xil rang-barang gullar bilan bezatilgan. Toʻgaragimiz aʼzolari orasida turli xil koʻrik-tanlovlar oʻtkazilib turiladi. Yaqinda oʻtkazilgan "Bir tomchi suvda hayot jilvasi” nomli tadbirimizda Shirinoy Saidboyeva faol ishtirok etib, toʻgarak aʼzolari orasida gʻoliblikni qoʻlga kiritdi. U oʻzi chizgan "Goʻzal tabiat” manzara-surati orqali, Mahliyo Jumaboyeva esa "Jayron” rasmini chizib, hammani hayratga soldi. Ayniqsa, Shohruh Kengashboyevning "Chilpiq qoʻrgʻoni” nomli surati toʻgarak aʼzolari va maktab oʻquvchilarida katta taassurot qoldirdi. Bundan koʻrinib turibdiki, farzandlarimizning murgʻak qalblarida ona Vatanga, goʻzal tabiatga mehr-muhabbat mevasi kurtak yozmoqda. Undan tashqari mart, aprel oylari maktabimizda obodonlashtirish va koʻkalamzorlashtirish ishlari yanada avj oldi. Maktab atrofiga turli mevali, manzarali koʻchatlar, archa koʻchatlari ekildi. Toʻgaragimiz aʼzolari har hafta shanba kunini "tozalik kuni” deb eʼlon qilishib, maktabimiz atroflarini, sinf xonalarini tozalashda ham faollik koʻrsatmoqdalar. Oʻquvchilar rejaga asosan, tabiat qoʻyniga sayohatlarga olib borilmoqda. Shunday sayohatlardan biri "Chilpiq” qoʻrgʻoniga uyushtirildi. Bunda oʻquvchilar oʻzlari tugʻilib, voyaga yetayotgan yurt tabiati, tabiiy boyliklari, tarixiy yodgorliklari toʻgʻrisida bilimlarga ega boʻlishdi. Daryo boʻyida goʻzal, baland joyga joylashgan bu yodgorlikning yaratilishi, bu yodgorlikdan topilgan arxeologik yodgorliklar toʻgʻrisida bir qancha maʼlumotlarga ega boʻldilar. Tabiat va jamiyat orasidagi oʻzaro munosabat, tabiatning barcha neʼmatlariga ehtiyotkorlik bilan munosabatda boʻlish sirlarini oʻrgandilar.
Ekologik ong va tafakkurga ega boʻlgan har bir toʻgarak aʼzosi oʻz mehnat faoliyatida tabiatga nojoʻya taʼsir etish qanday oqibatlarga olib kelishi mumkinligini bilishi kerak. Tabiatning bizga inʼom etgan noz-neʼmatlarini koʻz qorachigʻidek asrab-avaylashimiz har birimizning burchimiz ekanligini unutmasligimiz kerak. Men taʼlim-tarbiya berayotgan toʻgarak aʼzolari qalbida ona Vatanga, tabiatga muhabbat tuygʻusini uy-gʻotayotganimdan faxrlanaman.
Nilufar AVEZOVA,
"Barkamol avlod” bolalar markazining 29-sonli maktabdagi "Yosh ekolog” toʻgaragi rahbari.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
