TUMANDA ChOPVA MAHSULOTLAPI YeTIShTIPISh HAJMI OPTADI

Amudaryo tumanida chorvachilik sohasini jadal rivojlantirish, ichki isteʼmol bozorini sifatli goʻsht va sut mahsulotlari bilan uzluksiz taʼminlash masalasiga katta eʼtibor qaratilmoqda.

Oʻzbekiston Pespublikasi Prezidenti tomonidan 2020-yil 29-yanvarda imzolangan “Chorvachilik tarmogʻini davlat tomonidan qoʻllab-quvvatlashning qoʻshimcha chora-tadbirlari toʻgʻrisida”gi Qarorining mazmun-mohiyati ham mamlakatimizda qishloq xoʻjaligi ekin maydonlaridan samarali foydalanish, oziq-ovqat xavfsizligini taʼminlash, sohaga yetuk, malakali kadrlarni jalb etgan holda chorvachilik sohasida yuqori samaradorlikka erishish koʻzda tutilgan. Bundan tashqari, chorvachilik va naslchilik sohasini davlat tomonidan qoʻllab-quvvatlash, mahsuldorlikni oshirish va ozuqabop ekinlar urugʻchiligini rivojlantirish, chorvachilik xoʻjalikliklariga ajratilgan yer maydonlaridan samarali foydalanish holatini tahlil qilib borishga eʼtibor qaratilgani chorvachilik sohasi bilan shugʻullanuvchi fermer xoʻjaliklariga yer maydonlari ajratishda shaffoflikni taʼminlash imkonini yaratadi. Yaʼni, har bir bosh chorva moliga mutanosib ravishda ozuqabop ekin maydoni ajratiladi va yerdan unumli foydalanish masʼuliyati ortadi.

Mazkur Qaror bilan chorvachilik sohasida ish yurituvchi subʼektlar uchun davlat tomonidan subsidiyalar ajratish koʻzda tutilgani tadbirkorlar uchun juda katta imtiyozdir. Prezidentimizning mazkur Qarori amudaryolik chorvadorlar uchun ham muhim ahamiyatga ega hujjat boʻldi.

Tumanda sohani rivojlantirish maqsadida 2019-2021-yillarda boʻrdoqichilikka ixtisoslashgan 2 ta kompleks tashkil etish, jumladan “Soatov Otabek” agrofirmasida yiliga 60 tonna goʻsht tayyorlashga ixtisoslashgan 600 mln. soʻmlik, “Qurbonboyev Shohjahon” masʼuliyati cheklangan jamiyatida yiliga 600 tonna goʻsht tayyorlash boʻyicha 550 mln. soʻmlik loyihalarni amalga oshirish rejalashtirilgan. Bundan tashqari, “Xoʻjakoʻl” fermer xoʻjaligida 280 bosh qoramol boqilib, yiliga 854 tonna, “Yerlapas” fermer xoʻjaligida 270 bosh qoramol boqilib, yiliga 823 tonna sut tayyorlash rejalashtirilgan.

Chorva uchun toʻyimli ozuqa bazasini yaratish ham 2020-2021-yillarda bajaradigan muhim vazifalardan biri hisoblanadi. – Bu yil gʻalladan boʻshagan maydonlarning bir qismiga takroriy ekin sifatida Italiyadan keltirilgan beda urugʻi ekiladi. Shuningdek, Turkiya urugʻchilik kompaniyasi don va silos uchun makkajoʻxori urugʻlarini shartnoma asosida yetkazib berish boʻyicha oʻz takliflarini bildirmoqda. Bu ham soha rivojida muhim omil hisoblanadi.

Darvoqe, bugungi kunda Amudaryo tumandagi chorvachilik subʼektlariga 2 ming 289 gektar yer maydoni ajratilgan boʻlib, shundan 1 ming 285 gektari ekishlik yerlardir. Mazkur chorvachilik subʼektlari ixtiyorida 2 ming 600 bosh qoramol boʻlib, shundan 1 ming 100 boshi sigirlardir. 2020-yilda chorva mollari nasldorligini yaxshilash, chetdan keltirilgan nasldor mollarni mahalliy iqlim sharoitiga moslashtirish maqsadida “Amudaryo sohili” fermer xoʻjaligida 200 mln. soʻm oʻz mablagʻi va 900 mln. soʻm bank krediti asosida yirik loyiha amalga oshirilmoqda. Loyiha doirasida Qozogʻistondan 40 ta zotor qoramollar keltirildi. “Amu nasl chorva” agrofirmasi tomonidan jami 260 bosh zotli qoʻylar olib kelinib, parvarish qilinmoqda. “Polvonboy ovuli” masʼuliyati cheklangan jamiyati tomonidan esa Belarus davlatidan umumiy qiymati 1,2 mlrd. soʻmlik 103 bosh zotdor qoramollar keltirilib, mahalliy sharoitga moslashtirildi.

Bir soʻz bilan aytganda, Amudaryo tumanida chorvachilik sohasini jadal rivojlantirish boʻyicha tizimli ishlar amalga oshirilmoqda. Bu esa oʻz navbatida goʻsht va sut mahsulotlari tayyorlash hajmining ortishiga zamin yaratadi.

Robiya Yoʻldosheva.