Libosingiz - maʼnaviy olamingiz koʻzgusi
Insonning yurish-turishiga, kiyinishiga qarab baho berishadi. Bu gapda jon bor. Negaki, insonning kiygan kiyimi uning qanday ekanligini koʻrsatib turadi. Insoniyatning ongi oʻsishi bilan uning kiyinishi ham oʻzgarib boradi. Bugungi kunda kiyinish uslublari tubdan oʻzgargan. Kiyinish madaniyati esa insonlarning qay darajada shakllanganligini koʻrsatib turadi. Atrofga nazar tashlasak, turli kiyim kiygan odamlarni koʻramiz.
Ularning kiyinishlari qay darajada bizning mentalitetimizga toʻgʻri keladi? Tarixga nazar tashlaydigan boʻlsak, ayollar koʻzni quvontiradigan darajada yuz, qad-qomat goʻzalliklarini oʻz liboslari bilan bezab, yanada chiroyli boʻlib yurishgan.
Ammo u zamonlardagi ayollar kiyimi bilan bugungi kiyimlar oʻrtasida yer bilan osmonchalik farq bor. Men bu bilan yuz yillar ortga qaytib, ayollarimiz klassik uslubdagi kiyimlarni kiyishsin, demoqchi emasman. Men oʻsha zamonlardagi ayollar kiyimida aks etib turgan ibo-hayoni kiyimlarda namoyon qilish tarafdoriman, xolos.
Afsuski, hozirgi kunda qizlar ham, yigitlar ham chet el kiyimlaridan andoza olib kiyinmoqdalar. Har oʻn qizdan 3 nafari tor shimda, yana 3 nafari esa oʻziga mos boʻlmagan kiyimlarni kiyib olishadi. Yigitlarni ham bunday oʻzgarishlar chetlab oʻtayotgani yoʻq, albatta.
Millatimiz - oʻzbek. Qon-qonimizga singib ketgan ibo va hayo, oʻziga xos nazokatimiz bizni boshqa millatlardan ajratib turadi. Ammo bugungi yoshlarning kiyimlariga eʼtibor bersak, qizlarning kiyimlari haddan tashqari ochiq-sochiq ekanligi va tor shim kiyib yurganligi dilni xira qiladi. Bu, albatta koʻzga xunuk koʻrinadigan holat hisoblanadi. Shifokorlarning fikrlariga qaraganda tanaga yopishib turadigan, sunʼiy matodan tikilgan kiyimlar inson tanasining nafas olishini qiyinlashtirar ekan. Ha, har tomonlama qulay, kiysa, oʻzini yaxshi his qiladigan, uncha tor boʻlmagan kiyimni kiyish eng avvalo inson salomatligi, qolaversa, uning tashqi koʻrinishi uchun ham yaxshi. Yigitlarning egnidagi oʻziga haddan tashqari tor yoki yirtiq-yamoq jinsi shimlari inson kayfiyatiga yomon taʼsir qiladi. Tengdoshlarimizning bunday uslubda kiyinishi eng avvalo salomatlikka zarar boʻlsa, bunday tor kiyimlar ularning jismoniy rivojlanishiga salbiy taʼsir qiladi.
Qanchadan-qancha yoshlar bor, havas qilsa arzigudek. Ularning yurish-turishi, aql-zakovati, madaniyati tahsinlarga arziydi. Ammo biz yuqorida aytib oʻtganday kiyinishlar dilni xira qiladi.
Shuni unutmaslik kerakki, ommaviy madaniyat - maʼnaviyat kushandasi. Maʼnan yetuk, sogʻlom fikrli insonlar hech qachon oʻzligini yoʻqotmaydi.
Yulduz TURSUNBOYeVA,
3-sonli Amudaryo akademik litseyi oʻquvchisi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
