13-dekabr – Qishloq xoʻjaligi xodimlari kuni: QIShLOQ XOʻJALIGI MAHSULOTLARI YeTIShTIRISh HAJMI OShMOQDA

Tumanimizda Oʻzbekiston Respublikasi qishloq xoʻjaligini rivojlantirishning 2020-2030-yillarga moʻljallangan strategiyasida belgilangan vazifalarni 2020-yilda amalga oshirish boʻyicha chora-tadbirlar dasturinining ijrosini taʼminlash, paxta xom-ashyosi, gʻalla va boshqa qishloq xoʻjalik mahsulotlari yetishtirishda bozor mexanizmlarini joriy etish, oziq-ovqat tarmogʻini rivojlantirish borasida tizimli ishlar amalga oshirilmoqda. Xususan, 2020-yil hosili uchun 362 ta fermer xoʻjaliklari hamda qishloq xoʻjaligi  korxonalari tomonidan 15250 gektar maydonda 34900 tonna paxta yetishtirish boʻyicha MChJ shaklidagi “Amudaryo tex” xorijiy korxonasining paxta-toʻqimachilik klasteri oʻrtasida shartnomalar tuzilib, bu boradagi reja 102,7 foizga bajarildi.

Gʻallachilik sohasida ham yuqori natijalarga erishildi. Davlatga 8845 tonnadan ziyod “qirmizi don” yetkazib berildi. Bu boradagi reja 121 foizga yetkazildi. Shu bilan birga gʻallachilik sohasida 2021-yil hosili uchun puxta zamin yaratilib, 3800 gektar maydonga kuzgi bugʻdoy ekildi. Ayni paytda gʻalla yetishtirishga masʼul xoʻjalik va korxonalar tomonidan salkam 19 ming tonna mahalliy oʻgʻit jamgʻarib qoʻyildi. Shuningdek, gʻalla ekilgan maydonlarda kuzgi-qishgi sugʻorish, oziqlantirish kabi agrotexnik tadbirlarga alohida eʼtibor qaratildi. Natijada kuzgi bugʻdoy ekilgan barcha maydonlarda kuzgi-qishgi ishlar sifatli amalga oshirildi, gʻalla maydonlarining har gektariga 4 tadan, 905 ta xandaq qazilib, bu boradagi reja 100 foiz uddalandi.

Tumanda 2021-yil hosili uchun kuzgi shudgorlash ishlari samarali tashkil etildi. 13 ming gektar maydonda kuzgi shudgorlash ishlari bajarildi. Shudgorlash ishlarida 81 ta surim texnikalari yuqori unum bilan ishlatilib, belgilangan jadval asosida kuzgi shudgorlash jarayoni sifatli amalga oshirilmoqda.

Tumanimiz qishloq xoʻjaligining yetakchi tarmoqlaridan biri – chorvachilik sohasida 2020-yilda yuqori natijalarga erishildi.

Joriy yilning  1-dekabr  holatiga tumanda 156 ming 400 bosh yirik  shoxli qoramollar mavjud. Shuningdek, 104 ming 700 bosh qoʻy-echkilar, 659 ta ot zooveterinariya qoidalari asosida parvarish qilinmoqda. Parrandalar soni 1 mln. 32 ming 700 taga yetkazilib, goʻsht yetishtirish 9 ming 900 tonnani tashkil etdi. Sut ishlab chiqarish esa 34 ming 485 tonnaga yetkazildi.

Baliqchilik sohasi jadal rivojlanmoqda. Xususan, 2020-yilda jami 963 tonna baliq mahsuloti yetishtirildi. Bundan tashqari, 152 tonna yuqori sifatli asal yetishtirildi, 39 ming 465 dona tuxum xalqimiz dasturxoniga tortiq qilindi.

2021-yilda tumanimizda  chorvachilik sohasi boʻyicha boʻrdoqchilik yoʻnalishida  “Soatov Otabek” agrofirmasi tomonidan qiymati 600 mln. soʻmlik hamda “Qurbonboyev Shohjahon” MChJ tomonidan qiymati 550 mln. soʻm boʻlgan ikkita loyiha, sutchilik yoʻnalishida yana 2 ta loyihani ishga tushirish rejalashtirilgan.

Chorvachilik sohasida qoramollar naslini yaxshilash maqsadida 2020-yilda xorijdan 370 bosh nasldor mollar olib kelindi. Bu yoʻnalishda 7 ta loyiha amalga oshirilib, yana 2 ta loyiha yuzasidan tegishli tadbirlar ishlab chiqilmoqda.

Baliqchilik yoʻnalishi boʻyicha belgilangan 4 ta loyiha muvaffaqiyatli amalga oshirildi. Xususan, “Amu baraka fishing” MChJ, “Toʻraboy-Gulchehra” MChJ, “Yulduz ona Alirahmon-Muhammadjon” fermer xoʻjaligi, “Abdurasul Jayxun” oilaviy korxonalari tomonidan amalga oshirilgan mazkur loyihalar tashabbuskorlariga 26,6 gektar yer maydonlari baliqchilik tarmogʻi tashkil etish uchun ajratib berilib, amaliy ishlar boshlab yuborildi.

Amalga oshirilgan saʼy- harakatlar natijasida tumanda baliq mahsulotlari yetishtirish salmogʻi oshib bormoqda.

Oziq-ovqat  xavfsizligini taʼminlash yuzasidan olib borilayotgan saʼy-harakatlar natijasida sabzavot va poliz ekinlaridan ham yuqori hosil olindi. Xususan, joriy yilda 732,6 gektar maydonga ekilgan pomidor, bodring, piyoz va kartoshka mahsulotlari yetishtirish rejasi oshirib ado etildi. 462 gektar maydonga ekilgan poliz mahsulotlari hosili ham kutilganidan ziyoda boʻldi.

Shuni alohida qayd etish kerakki, “Mangʻit omad-savdo” MChJ klasteri tasarrufidagi 317 gektar maydonda ekilgan barcha ekinlardan rejadagi hosil yigʻishtirib olindi. Klasterga biriktirilgan 55 ta qishloq xoʻjalik korxonalari tomonidan 2482 tonna hosil olinib, shundan 826 tonnasi eksportga yoʻnaltirildi. Bu boradagi ishlar 2021  yilda ham davom ettirilishi rejalashtirilgan. Yaʼni, qiymati 400 ming dollar boʻlgan 1 gektarlik zamonaviy issiqxona, qiymati 200 ming dollar boʻlgan 500 tonna sigʻimga ega muzlatgichli omborxona hamda meva-sabzavot mahsulotlarini qayta ishlash va quritishga moʻljallangan korxonalar faoliyatini yoʻlga qoʻyish rejalashtirilmoqda.

Amalga oshirilgan va rejalashtirilayotgan ishlarning barchasi tumanimiz aholisining oziq-ovqat mahsulotlariga boʻlgan ehtiyojini qondirish, shu barobarida aholining sogʻlom ovqatlanishini tashkil etish yuzasidan ishlab chiqilgan davlat dasturi doirasidagi ishlarni amalga oshirishga munosib hissa qoʻshishdir.

Fayzulla Saʼdullayev, tuman hokimining qishloq va suv xoʻjaligi masalalari boʻyicha oʻrinbosari.