Davlatimiz qudrati va hurligimiz ramzi

OʻzA, Ziyodulla Jonibekov, 01.07.2014 11:06

2-iyul – Oʻzbekiston Respublikasi Davlat gerbi qabul qilingan kun

Davlat ramzlari el-yurtning hurligi, milliy gʻurur va mentaliteti, shonli tarixi, maʼnaviy-madaniy boyligi, urf-odat va anʼanalari, buyuk maqsad va ezgu orzu-intilishlarini oʻzida aks ettiradi.

Istiqlolga erishgach, mamlakatimiz ham oʻz davlat ramzlariga ega boʻldi. Bugun Oʻzbekiston oʻz Bayrogʻi, Gerbi, Madhiyasi va Valyutasiga ega.

Davlatimiz gerbida xalqimizning tarixi, buguni va kelajagi oʻz aksini topgan. Unda tasvirlangan gullagan vodiy uzra nur sochayotgan oftob serquyosh yurtimizga, undagi obod manzillarga ishora. Baland togʻlar oralab oqayotgan daryolar – hayot boqiyligi timsoli boʻlsa, gerbning soʻl tomonidagi bugʻdoy boshoqlari xalqimizning rizq-roʻzi butunligidan, oʻng tomonidagi qiygʻos ochilgan gʻoʻza ifodalangan chambar xalqimizning oppoq orzulari, ezgu niyatlaridan dalolatdir. Gerbning yuqori qismida elu yurtimiz jipsligining ramzi sifatida sakkiz qirrali yulduz tasvirlangan.

Gerbimiz markazida baxt va olijanoblik timsoli boʻlgan afsonaviy Humo qushi qanotlarini yozib, parvozga shaylanib turibdi. Bu xalqimizga xos ezgu orzu-umidlar ifodasidir. Zero, elimiz Humoni azal-azaldan baxt qushi sifatida tasavvur etib kelgan.

Gerbimizdagi ushbu ramz va timsollar xalqimizning tinchlik, ezgulik, baxt-saodat, toʻkinlik, farovonlik kabi orzu-umidlarini oʻzida namoyon etadi. Gerbning pastki qismidagi davlatimiz bayrogʻini ifodalovchi chambar bandiga zarhal harflar bilan "Oʻzbekiston” soʻzi bitilgan.

Prezidentimiz Islom Karimov tashabbusi bilan 1992-yil 2-iyulda qabul qilingan "Oʻzbekiston Respublikasining Davlat gerbi toʻgʻrisida”gi tarixiy qonunda belgilanganidek, Davlat gerbi Oʻzbekiston Respublikasi Prezidenti devoni, Oliy Majlis palatalari, Vazirlar Mahkamasi, vazirliklar, hokimliklar, qoʻmitalar, davlat hokimiyati va boshqaruvi idoralari binolari, chet ellardagi mamlakatimiz diplomatik vakolatxonalari va konsullik muassasalarining peshtoqida oʻrnatilgan. Respublikamiz davlat chegaralaridagi Davlat gerbi barchamizga gʻurur-iftixor bagʻishlaydi. Vatan ostonasidagi davlatimiz ramzini koʻrib, beixtiyor qalbimiz entikadi, muqaddas zaminimizga boʻlgan mehr-muhabbatimiz yanada oshadi.

Davlat gerbi tasviri har birimizning mana shu saxovatli zamin farzandi, ushbu ozod yurt fuqarosi ekanimizni tasdiqlovchi fuqarolik pasportida ham aks ettirilgan.

"Oʻzbekiston Respublikasi Davlat gerbi toʻgʻrisida”gi qonunda mamlakatimiz fuqarolari, shuningdek, Oʻzbekistonda istiqomat qiladigan barcha shaxslar davlatimiz gerbini hurmat qilishlari shart ekani belgilab qoʻyilgan.

Davlat ramzlari muqaddasdir. 2010-yil 24-dekabrda qabul qilingan "Oʻzbekiston Respublikasining davlat ramzlari haqidagi ayrim qonun hujjatlariga va Oʻzbekiston Respublikasining Maʼmuriy javobgarlik toʻgʻrisidagi kodeksiga oʻzgartish va qoʻshimchalar kiritish haqidagi”gi qonunga muvofiq, davlatimiz ramzlaridan foydalanish qoidalari yanada takomillashtirildi. Unga koʻra, Oʻzbekiston Respublikasi Davlat gerbining elementlarini nodavlat tashkilotlari hujjatlarining rekvizitlari yoki reklama materiallariga kiritilishiga yoʻl qoʻyilmaydi. Oʻzbekiston Respublikasi Davlat gerbining tasviri tushirilgan belgilardan ishlab chiqarilayotgan yoki realizatsiya qilinayotgan tovarlarni (ishlarni, xizmatlarni) oʻtkazish uchun tijorat maqsadlarida foydalanish mumkin emas. Nodavlat notijorat tashkilotlarining ramzlari Oʻzbekiston Respublikasining Davlat gerbiga oʻxshash boʻlishi mumkin emas.

Ha, mustaqil Vatanimizning Davlat gerbi ulkan gʻoyaviy-tarbiyaviy ahamiyatga molik timsol sifatida barchamiz uchun qadrli va muqaddasdir. Uni har safar koʻrganimizda shunday betakror, hech kimdan kam boʻlmagan qudratli mamlakatda yashayotganimizdan faxr-iftixor tuygʻularini his etamiz.