“Taraqqiyot koʻzgusi” – xalq minbari

"Oʻz qutlugʻ tarixi, qadri, hayot tarzi va dunyoqarashi qanday kechayotganligini, hozirgi davrning yorqin qirralarini anglashni istagan har bir inson gazetalarimiz taxlamlari sahifasini varaqlasin, shundagina bir butun hayot tarzining boy xazinasidan bahramand boʻlishiga, oʻzining kimligini chuqurroq anglab olishiga aminman”, - deb yozgan edi faxriy jurnalist, falsafa fanlari nomzodi Tursunboy Davlatboyev.

Ha, bu yil 80 yilligi nishonlashga qizgʻin hozirlik koʻrilayotgan tumanimiz matbuoti qayerda, qanday nomda nashr etilishidan qatʼiy nazar, hamisha xalq minbari boʻlib keldi, xalq xohish-irodasining ifodachisi, tumanimiz ijtimoiy-iqtisodiy va madaniy yuksalish bosqichlarini tarixga muhrlagan solnoma, kishilarni yangi kunga umid bilan qarab, ezgu maqsadlar yoʻlida mehnat qilishga chorlaguvchi kuch boʻlib keldi.

Ayni kunda ham gazeta har bir fuqaroni oʻtmishdan tegishli xulosa chiqarib, bugungi hayot tarzini toʻgʻri belgilay olishi, oldin kim edig-u bugun kim boʻlganimizni chuqur mushohada etib, istiqlol bergan imkoniyatlardan bahramand boʻlishga, bunyodkor xalqimizni hech kimdan kam boʻlmay, ona Vatanimizni rivojlangan davlatga aylantirish yoʻlida fidoyi mehnat qilishga undayotgani bilan ham qadrlidir.

Shuni alohida taʼkidlash joizki, ayrim tuman gazetalari oyda, ikki oyda bir marta 400-500 nusxa atrofida chop etilayotgan bir vaqtda "Taraqqiyot koʻzgusi” gazetasi har oyda 4-marta, 5000 dan ziyod nusxada chop etilayotgani va tumanimizning barcha hududlarini qamrab olayotgani bilan ham diqqatga sazovordir. "Taraqqiyot koʻzgusi”ning ilovasi "Mening oilam” gazetasi va www.amunews.uz veb sayti esa tumanimiz aholisini tezkor va xolis axborot bilan taʼminlashga hissa qoʻshmoqda.

Shularni hisobga olib, shu yilning 7-iyulida tuman hokimining mamlakatimiz mustaqilligining 23 yilligiga hamohang tarzda "Mustaqillikni mustahkamlash va milliy istiqlol gʻoyalarini targʻib qilishda "Taraqqiyot koʻzgusi” gazetasining oʻrni va ahamiyati” mavzusida targʻibot oyligini oʻtkazish toʻgʻrisida”gi qarori qabul qilindi.

Qaror bilan tuzilgan Tashkiliy qoʻmitaga targʻibot oyligi doirasidagi chora-tadbirlarning yuksak saviyada oʻtkazilishini taʼminlash, tumandagi barcha korxona-tashkilotlar rahbarlari, fuqarolar yigʻinlari raislariga oʻz mehnat jamoalarida rejaga muvofiq ijodiy kechalar, adabiy-badiiy uchrashuvlarni tashkil etishga amaliy yordam berish vazifasi topshirildi.

Tahririyat ijodiy jamoasi tumanimiz rahbariyatining matbuotga, matbuot xodimlarining zahmatli mehnatlariga eʼtibori va eʼtirofidan minnatdor boʻlib, yangi-yangi ijodiy parvozlarga shaylanmoqda.

Aziz gazetxon!

Siz ham bizning ishimizga befarq boʻlmasangiz, bizni qoʻllab-quvvatlasangiz targʻibot oyligida faol ishtirok eting, tuman matbuotida oʻz soʻzingiz, fikr mulohazalaringiz, ijodiy ishlaringiz bilan faol qatnashing. Zero, bizning gazetamiz, xalq minbaridir.

"Taraqqiyot koʻzgusi” gazetasi tahririyati.