DALA XABARLARI

"Oʻrta qalʼa" ovulidagi "Mangʻit” MMTP xizmat koʻrsatuvchi fermer xoʻjaliklarida paxta yigʻim-terimi tobora avjiga chiqmoqda. Terimchilarga, hasharchilarga unumli ishlashlari uchun barcha qulayliklar yaratilganligi ish unumdorligini oshirayapti.

"Tojim dehqon", "Ram Haytimbat", "Javlon”, "Maʼruf Shahlo" fermer xoʻjaliklarida ayniqsa terim surʼati yuqori.

Ovuldagi mavjud paxtachilik bilan shugʻullanuvchi fermer xoʻjaliklari 3895 tonna paxta yigʻib-terib olishni niyat qilganlar. Terilgan hosil puli har besh kunda hisob-kitob qilinayapti.

 "Toʻlqin" ovulidagi "Ahmad-Maʼmur" fermer xoʻjaligi aʼzolari erta bahorda 56 gektar yerga baraka urugʻi ekkan edilar. Bir tekis unib chiqqan nihollar yaxshi parvarishlangani bois, barcha dalalarda moʻl hosil yetishtirildi.

Ayni kunda ijarachilar va ularga qiyin - qistovli kunlarda koʻmakka chiqqan hasharchilar yetishtirilgan hosilni gʻayrat-shijoat bilan terib olmoqdalar. Ularning saʼy-harakatlari natijasida xoʻjalikda har kuni shartnomaviy rejaning 7-7,5 foizi miqdorida hosil qabul maskaniga topshirilmoqda.

 Bugun tumanimizning har bir sof vijdonli kishisi oʻzining oʻrnini paxtazorda, deb bilib, dehqonlarimizning mashaqqatli mehnatlari evaziga yetishtirilgan hosilni yigʻishtirib olishga koʻmaklashishga intilmoqda. "Tosh yop" ovulida istiqomat qiluvchi Nodira Sobirova ham hamqishloqlariga koʻmakdosh boʻlib, kuniga 140-150 kg.dan paxta terayapti.

"Bogʻi Eram” fermer xoʻjaligi ijarachisi Oydin Qurbonboyeva har yili oʻz dalasida moʻl hosil yetishtiradi. Yigʻim-terim mavsumida esa chaqqonligi bois barchaga namuna boʻlayapdi.

U ayni kunlarda 150-155 kg.dan paxta terishga erishmoqda.

Ayni kunlarda tumanimizning barcha fermer xoʻjaliklarida paxta yigʻim-terimi tobora avj oldirilmoqda. Ijarachilar, ularga yordamga chiqqan vaqtincha ish bilan band boʻlmagan aholi hamjihatlikda qisqa  kunlar ichida yillik rejaning ado etilishi uchun harakat qilmoqdalar. Yigʻishtirib olingan hosil peshma-pesh qabul maskanlariga topshirilmoqda. Qator yillardan beri Qoraqalpogʻistonda, Oʻzbekistonda birinchilardan boʻlib marradan oshib kelayotgan amudaryolik paxtakorlar bu yil ham ilgʻorlikni qoʻldan bermaslikka harakat qilishayotir.