Siyosat 14.01.2015 👁 2,748

Vatan himoyachilari bayrami

Qaysiki davlatning mudofaasi mustahkam boʻlsa, shu yurtda tinchlik va osoyishtalik hukm suradi. Farovonlik va taraqqiyotning asosi – tinchlikdir. Bu – necha ming yillar davomida oʻz isbotini topgan tarixiy haqiqat. Ana shu haqiqatni chuqur anglagan va umri davomida shunga amal qilib yashagan buyuk bobokalonimiz Amir Temur davlatni davlat darajasiga koʻtarish uchun avvalo, askarlar va harbiy sohaga katta eʼtibor qaratgan. Sarhadlari xavfsizligini taʼminlab, ichki nizolarni bartaraf qilgan. Natijada temuriylar davlatida ilm va fan rivojlanib, saltanat bunyodkorlik va taraqqiyot sari yuz tutgan.

Mamlakatimiz mustaqillikka erishgan ilk davrlaridanoq muhtaram Prezidentimiz Islom Karimov boshchiligida harbiy sohada keng koʻlamli islohotlar amalga oshirilib, bugun bu islohotlar oʻzining yuksak natijalari bermoqda.

14 yanvar kuni tuman markaziy madaniyat uyida Vatan himoyachilari kuniga bagʻishlangan tantanali bayram tadbiri boʻlib oʻtdi. Yigʻilishga tumanimizdagi "Ayoqchi” va "Mangʻit” chegara postlari maʼmuriyati hamda mazkur muassasalarda xizmat burchini namunali oʻtayotgan askar yigitlar, tuman hokimligi, prokuraturasi, mudofaa va ichki ishlar boʻlimlari masʼullari, fuqarolar yigʻinlari raislari, oʻrta maxsus, kasb-hunar taʼlimi muassasalari rahbarlari va oʻquvchilari hamda keng jamoatchilik vakillari qatnashdilar.

Tadbirni tuman hokimi oʻrinbosari, xotin-qizlar qoʻmitasi raisi Maryam Ahmedova ochdi va olib bordi. Oʻzbekiston va Qoraqalpogʻiston Respublikalarining davlat madhiyalari yangradi. Tabrik uchun soʻz tuman hokimi Rajabboy Yoʻldoshevga berildi.

Qayd etilganidek, boshqa sohalarda boʻlgani kabi mustaqilligimizning ilk yillaridanoq milliy armiyani yaratish va takomillashtirishga jiddiy eʼtibor qaratildi. Oʻtgan qisqa vaqt mobaynida yurtimizda davr talabi hamda jahon andozalariga javob beradigan Qurolli Kuchlarni barpo etish yoʻlida keng koʻlamli ishlar amalga oshirildi.

Oʻzbekiston Respublikasi Oliy Kengashining 1992-yil 14-yanvardagi qarori bilan mustaqil Oʻzbekiston Respublikasi hududida joylashgan barcha harbiy tuzilmalar davlatimiz yurisdiktsiyasiga, yaʼni boʻysinuviga oʻtkazildi. Oʻzbekiston Qurolli Kuchlarining mamlakat mustaqilligini hamda hududiy yaxlitligini himoya qilish, xalqimizning farovon hayotini taʼminlashdagi ahamiyati inobatga olingan holda, 14-yanvar – Vatan himoyachilari kuni, deb belgilandi. Bu yil Vatan himoyachilari kuni mamlakatimizda "Vatan – ulugʻ, burchim muqaddas!” shiori ostida nishonlanmoqda. Tumanimiz hokimi tabrik nutqidan keyin "Ayoqchi” va "Mangʻit” chegara postlari maʼmuriyatiga hamda sana munosabati bilan oʻtkazilgan oʻzaro sport musobaqalarida gʻolib boʻlgan oʻrta maxsus, kasb-hunar taʼlim muassasalari rahbariyatiga esdalik sovgʻalarini topshirdi.

Soʻzga chiqqanlar – tuman mudofaa ishlari boʻlimi boshligʻi, podpolkovnik Faxriddin Musulmonov, 31-sonli maktab oʻqituvchisi Salomat Xolimbetova, oddiy askar Habibulla Toʻxtamurotovlar Milliy Armiyamiz va uning safida xizmat qilayotgan istiqlolimiz qalqonlarining sharofati bilan yurtimizda tinchlik va osoyishtalik hukm surayotganini, Vatan himoyasi har bir inson uchun sharafli burch ekanini taʼkidlab oʻtdilar.

Darhaqiqat, mamlakatimizda bu kunni milliy bayram sifatida katta tantana bilan nishonlash oʻziga xos anʼanaga aylanib borayotganligi bejiz emas. Zero, Sizu — bizning bugungidek tinch, xotirjam hayotimiz Qurolli kuchlarimiz tomonidan ishonchli tarzda himoya qilinayotgan ekan, ularni har qancha sharaflasak, yigitlik burchni sidqidildan ado etayotgan, taraqqiyotimiz barqarorligiga kamarbasta boʻlayotgan oʻgʻlonlarimizni har qancha eʼzozlasak, koʻkka koʻtarsak, arziydi. Tadbir davomida askarlarga homiy tashkilotlarning sovgʻalari topshirildi hamda tuman madaniyat va sport ishlari boʻlimi tomonidan tayyorlangan kontsert dasturi namoyish qilindi.