El ardogʻidagi shoira

Oʻzbekiston Respublikasi Prezidentining 2014-yil 31-oktyabrdagi "Oʻzbekiston xalq shoiri Zulfiya tavalludining 100 yilligini nishonlash toʻgʻrisida”gi qarori butun mamlakatimizda boʻlgani kabi tumanimizda ham keng jamoatchilik, adabiyot ixlosmandlari, soʻz qadrini bilgan insonlar tomonidan ayol zotiga, adabiyotimizga yuksak ehtirom namunasi sifatida mamnuniyat bilan kutib olindi.

Oʻzbekiston xalq shoiri Zulfiyaning Vatanga muhabbat, vafo va sadoqat kabi oliyjanob fazilatlarni tarannum etgan asarlari, ibratli hayoti va faoliyati bilan milliy adabiyotimiz rivojiga, xalqimiz maʼnaviyatini yuksaltirishga qoʻshgan ulkan hissasini oʻsib kelayotgan yosh avlod ong-u shuuriga yetkazish, Zulfiyaxonim ijodi va hayotini yoshlar oʻrtasida yanada keng targʻib etish maqsadida tuman hokimligining chora-tadbirlar rejasi ishlab chiqildi. Tumanimizdagi barcha taʼlim muassasalarida, ovul va mahallalarda Zulfiya hayoti va ijodiga bagʻishlangan davra suhbatlari, ijodiy uchrashuvlar, adabiy-badiiy kechalar oʻtkazilmoqda. Umumtaʼlim maktablari, akademik litsey va kasb-hunar kollejlarida "Zulfiyaxonim qizlari” deb nomlangan adabiy toʻgaraklar ishlab turibdi.

Prezidentimizning 1999-yil 10-iyundagi Qarori bilan Zulfiya nomidagi Davlat mukofoti taʼsis etildi. Mamlakatimizda har yili ushbu mukofot uchun 14 yoshdan 22 yoshgacha boʻlgan isteʼdodli qizlar oʻrtasida tanlov oʻtkazilib, eng iqtidorli qizlar ushbu mukofotga sazovor boʻlishmoqda. Bu tanlov isteʼdodli qizlarni har tomonlama ragʻbatlantirib, oʻz iqtidorlarini namoyon qilishi uchun keng imkoniyat eshiklarini ochmoqda. Tumanimizda ham Zulfiya ijodiga havas qilib, sheʼriyat yoʻlini tanlagan, taʼlim, sport, sanʼat, madaniyat sohasida oʻzlarining iqtidorlarini namoyon etishga intilgan qizlar soni yil sayin ortib bormoqda.

Yurtboshimizning ushbu qarori yana shunisi bilan ahamiyatliki, unda oʻzbek ayolining maʼnaviyati ulugʻlangan, desak hech mubolagʻa boʻlmaydi.

"Yuksak maʼnaviyat – yengilmas kuch” asarida: "Nafaqat oʻz sheʼrlari, balki butun hayoti bilan oʻzbek ayolining maʼnaviy qiyofasini namoyon etgan atoqli shoiramiz Zulfiyaxonimni ham men ana shunday fidoyi insonlar qatoriga qoʻshgan boʻlardim. Uning jahon minbarlaridan yangragan sheʼrlari Sharq ayolining aqlu zakosi, fazlu kamolining yorqin ifodasi sifatida millionlab sheʼriyat muxlislariga odamiylik, muhabbat va sadoqatdan saboq bergan, desak mubolagʻa boʻlmaydi. Aslida, bu dunyoda ayriliq va hijron azobi barchaning ham boshida bor. Ammo gʻam-anduh va hasratlarni matonat bilan yengib, togʻdek bardoshi bilan vafo va sadoqat ramziga aylangan Zulfiya opa singari ayollar har qanday yuksak hurmat va ehtiromga munosibdir” deb yozadi Prezidentimiz Islom Karimov.

Mustaqillik yillarida yurtimizda ayolga, onaga yuksak eʼtibor va ehtirom koʻrsatilmoqda. Buni Mustaqillik maydonidagi Baxtiyor Ona, Xotira xiyobonidagi motamsaro Ona, Vatanga qasamyod haykalida farzandining oy borib, omon qaytishini tilab duoga qoʻl ochgan moʻʼtabar ona siymosida koʻrishimiz mumkin. Bu ehtirom shoira Zulfiya xotirasiga oʻrnatilgan muhtasham haykalda yanada yuksakroq namoyon boʻladi.

Oʻzbekiston Xotin-qizlar qoʻmitasi tashabbusi bilan butun mamlakatimizda boʻlgani kabi tumanimizdagi barcha umumtaʼlim maktablari, akademik litsey va kasb-hunar kollejlarida9-14-fevral kunlari "Orasta qizlar” toʻgaraklarida "12 yillik majburiy taʼlim – biz qizlar uchun oʻta muhim va zarur” deb nomlangan haftalik doirasida oʻquvchi-qizlar tomonidan Zulfiya ijodidan namunalar oʻqildi. Shoira Zulfiyaoʻlmas ijodi va oʻchmas hayoti bilan tariximizning ajralmas qismi sifatida bugun xalqimiz, shu jumladan yoshlar qalbida mangu yashayveradi.

Shoira merosinioʻrganib oʻsgan qizlar jamiyatda, shu jumladan oila va mahallada oʻz oʻrnini topib, oʻzaro hurmat va hamjihatlikni mustahkamlashga, vafo va sadoqat, mehr-oqibat, shafqat va muruvvat tuygʻularining qadriga yetib yashashga hissa qoʻshadilar, albatta.

Maryam AHMEDOVA, tuman hokimi oʻrinbosari, Xotin-qizlar qoʻmitasi raisi.