MATONAT BILAN MEHNAT QILIShGA DAʼVAT BOʻLDI

Muhtaram Prezidentimiz Islom Karimov Oʻzbekiston Respublikasi Oliy Majlisi Qonunchilik palatasining birinchi tashkiliy yigʻilishidagi nutqida "Deputat qaysi partiyaga mansub boʻlmasin, birinchi navbatda saylovchilar oldida, el-yurt oldida javob beradi. Partiyalar jamiyatning maʼlum bir qatlami manfaatlarini ifoda etadigan va himoya qiladigan kuch sifatida parlamentda bir-biriga raqib yoki muxolif boʻlishi tabiiydir. Lekin yagona Vatanimiz boʻlmish Oʻzbekiston manfaati, yagona xalq manfaatlari haqida soʻz borganda, ularning barchasi bir musht boʻlib birlashishi darkorligini hech qachon yodimizdan chiqarmasligimiz zarur.

... Faylasuflar aytganidek, bu dunyoda dushmandan emas, avvalo loqayd, beparvo va betaraf odamlardan qoʻrqish kerak. Mening sizlarga tilagim, daʼvatim shuki, xalq vakillari avvalo kurashchi boʻlishi kerak. Mana shu muqaddas zamin uchun, Oʻzbekistonimiz uchun, xalqimiz tinchligi, farzandlarimizning baxtli kelajagi uchun barchamiz bir yoqadan bosh chiqarib, ishlashimiz, kurashishimiz zarur”, – deya taʼkidladilar.

Prezidentimizning ushbu soʻzlarialbatta, deputatlar zimmasiga katta vazifa yuklashi bilan birga, saylovchilarning ishonchini oqlashga bel bogʻlagan vakillarning qaysi partiyadan boʻlishiga qaramasdan, har bir partiyaning saylovoldi dasturida belgilangan vazifalarni xalqimizning farovonligi, obodonchiligi, tinchligi, mustaqilligini yanada mustahkamlash yoʻlida birlashtirishga chaqiradi.

Aholi manfaatlari va farovonligiga, yurtimiz taraqqiyotiga xizmat qiluvchi mukammal qonunlarni ishlab chiqish, davlat boshqaruvi organlari tomonidan qonunchilik talablarining bajarilishi ustidan nazorat oʻrnatish, koʻp sonli saylovchilarning ishonchini qozonish, xalq vakili sifatida Qonunchilik palatasiga saylangan deputatlarning kundalik faoliyatidagi eng muhim vazifa boʻlishi kerak.

Prezidentimiz parlament palatalarining qoʻshma majlisidagi maʼruzasida: "Qonunlar loyihalari, ayniqsa, aholining hayotiy muhim manfaatlari, ijtimoiy huquqlariga bevosita daxldor boʻlgan qonunchilik hujjatlari muhokamasiga jamoatchilikni, fuqarolar institutlari vakillarini ham keng jalb etish lozim,” degan fikrlarni bildirib oʻtdi.

Albatta, qonun hujjatlari qabul qilinmasdan oldin keng jamoatchilik bilan birga muhokama etilib, fikrlar almashilsa, bunday qonun har tomonlama yetuk, xalqning manfaatini oʻz ichida toʻla aks ettirgan holatga keladi. Shuningdek, fuqarolarning davlat boshqaruvidagi oʻrnini mustahkamlaydi.

Mana shunday jarayonlarda mehnat va hayotiy tajribaga ega yoshi ulugʻlarimiz bilan birga, kelajakka ishonchli qadamlar bilan kirib kelayotgan yoshlarimizning ham fikrlarini inobatga olish, ular orasida har xil interaktiv usullardagi muhokamalarni oʻtkazish orqali ularning huquqiy bilim va koʻnikmalarini yanada orttirish uchun imkoniyat yaratiladi.

Deputatlar Prezidentimiz tomonidan parlament palatalarining qoʻshma majlisidagi maʼruzasida bildirilgan fikrlardan kelib chiqqan holda amaliy harakatlarni boshladi. Qonunchilik tashabbuslari, parlament nazoratini tashkil etish, deputatlik soʻrovlarini oʻtkazish va shu kabi boshqa vakolatlarimizdan unumli foydalangan holda saylovchilarga bergan vaʼdalarimizning ustidan chiqishga intilish zimmamizdagi masʼuliyatli vazifadir.

Joldasboy ABDIJAMILOV,

Oʻzbekiston Respublikasi Oliy Majlisi Qonunchilik palatasi deputati.