Ўқитувчилар оиласи

Педагоглар билан кўп суҳбатда бўлганимдан бу касб машаққати ва масъулиятини жуда яхши ҳис қиламан.

Ҳа, ўқитувчилик бошқалар ўйлаганидай маълум соатлардангина иборат эмас, балки, бутун борлиғингни, иқтидорингни бахшида этиб ишлайдиган касб. Айниқса, бунинг устига маълум хизмат лавозими ҳам қўшилса, масъулият бундан-да ортади.

Шу боисдан Гулимбат Хўрозов ҳақида, унинг ўқитувчилардан иборат ибратли оиласи ҳақида ёзгим келди.

У ўрта мактабни тугатиб, Самарқанд Давлат Университетининг география факультетига ўқишга кирди. 1983 йилда олийгоҳни тамомлагач, ўзи таълим олган 21-сонли мактабга ишга кирди. Бу унинг айни орзуси эди. Шундай бўлишига қарамай, илк иш бошлаган кезлари устозлари олдида ҳаяжондан довдираган, уларнинг ишончларини оқлай олармиканман, деган ўйларга борган дамлари бўлди. Ва кейинчалик интилиш, ўз-ўзига ишонч билан қилинган меҳнат самара беришига ишонди, ишлаш жараёнида ҳам устозларидан ўрганишни канда қилмади ва орадан йиллар ўтиб, фидойи, тажрибали ўқитувчилар сафидан жой олди.

Раҳбарият Гулимбат Хўрозовнинг салоҳиятини, интилувчанлигини инобатга олиб, уни илмий ишлар бўйича директор ўринбосари лавозимига тайинлади.

У мана 16 йилдирки, мактаб директори ўринбосари вазифасини сидқидилдан адо этиш баробарида ўқувчиларга география фанидан сабоқ бериб келаётир. Турмуш ўртоғи, мактабнинг тарих фани ўқитувчиси бўлиб, 32 йил ишлаб нафақага чиққан Дармонжон опа билан оқ ювиб, оқ тараб вояга етказган фарзандлари ҳам ота-она касбининг давомчилари бўлиб етишишди. Оиланинг тўнғич фарзанди Шуҳрат Нукус Давлат Педагогика институтининг тарих факультетини тамомлаб, 16 йилдан бери 21-сонли мактабда ўқувчиларга тарих фанидан дарс бериб келмоқда. Бахтиёр 51-сонли мактабда биология фани, Қудрат эса 21-сонли мактабда қорақалпоқ тили ўқитувчиси. Келинлари Гулзода 18-сонли МТМда тарбиячи ёрдамчиси, Холида 21-сонли мактабда биология фани ўқитувчиси, Гулнора эса психолог. Қизи Дилноза Дўрман касб-ҳунар коллежини битирди. Унинг ҳам орзуси ўқитувчи бўлиш.

Гулимбат Хўрозовнинг оиласи Хитой овулидаги энг ибратли оилаларнинг бири. Кўпчилик бу аҳилликни уларнинг ҳаммаси ўқитувчи бўлганлигидан деб ўйлашади. Эҳтимол, шундайдир? Бу оилада ҳеч ким ишдан келдим, деб қўл қовуштириб ўтирмайди, ҳамжиҳатликда биров томорқага, биров мол-ҳолга қарайди. Оиладаги қўшимча даромад манбалари кўпайишига оила бекаси, 32 йил ўқитувчилик қилиб нафақага чиққан Дармонжон опа ҳам муносиб ҳисса қўшади. Шунинг учун томорқасида экинлар ҳосилдор, таъми тотли бўлади.

Ўзларининг турмушини ўз меҳнатлари, эл-юртга хизматлари билан безаётган педагоглар оиласининг барча аъзоларини 1 октябрь – Ўқитувчи ва мураббийлар куни байрами билан табриклаб, касбингиздан барака топинг, деймиз!

Ойгул Ражабова.