НАЗОРАТ ТАДБИРЛАРИ ДАВОМ ЭТМОҚДА
Юртимизда коронавирусга чалиниш, касалликнинг янги ўчоқлари пайдо бўлиш ҳолатларининг камаймаётгани аҳолидан касалликка қарши кураш борасида ўрнатилган карантин талабларига қатъий риоя қилишни тақозо қилмоқда. Туманимизда бу борадаги аҳвол мунтазам назорат қилиниб, аниқланган камчиликлар бўйича профилактик тушунтириш ишлари мунтазам олиб борилаётир.
Шу йилнинг 22 июнида Миллий гвардия ходими Марат Абдиев, Қорақалпоғистон Республикаси санитария эпидемиология осойишталик ходими Рохат Хожалапесов, туман Ички ишлар бўлими профилактика инспектори Амангелди Нагметов, Қорақалпоғистон Республикаси Санитария эпидемиология назорати бошқармаси туман филиали инспектори Норгул Атабаевалар иштирокида туманимизда навбатдаги назорат тадбирлари ўтказилди.
Қорақалпоқ ҳудудий электр таъминоти акциядорлик жамиятининг туман филиалида коронавирус инфекциясига қарши курашиш чора-тадбирларига амал қилиниш ҳолати ўрганилганида филиал биноси кириш эшигига дезинфекцион тўшама қўйилмаган, эшиклар тутқичлари хлорли дезинфекцияланган мато билан ўралмаганлиги маълум бўлди. Идора ходимларининг ва ташриф буюрувчиларнинг келиб-кетишлари махсус журналга қайд этилмаган, келувчиларнинг тана ҳароратини ўлчаш учун тепловизор, антисептик воситалар мавжуд эмаслиги аниқланди. Шунингдек, айрим ходимлар тиббий ниқобсиз ишлашмоқда, карантин қоидалари ҳақида эслатмалар ҳам йўқ, ташриф буюрувчилар орасида оралиқ масофа сақланмаяпти. Аниқланган камчиликлар бўйича корхона раҳбари, ходимларига тушунтириш ишлари олиб борилди ва баённома расмийлаштирилди.
Чордара маҳалласининг “Озодлик” кўчасида жойлашган Равшан Отажоновага қарашли миллий ширинликлар ва қандолат маҳсулотлари билан савдо қилувчи дўконда ҳам кириш эшикка дезинфекцон тўшама қўйилмаган, эшик тутқичларига хлорли матолар билан ишлов берилмаган, карантин қоидаларига амал қилиш бўйича эслатмалар қўйилмаганлиги аниқланди. Худди шундай камчиликлар “Буюк Турон” кўчасида жойлашган “Илҳом хонқа” дўконида ҳам мавжудлиги, сотувчилар тиббий ниқоб тақмасдан савдо қилишаётганлиги учун тадбиркорга нисбатан маъмурий баённома расмийлаштирилди.
Ушбу маҳаллада янгидан қурилаётган бинода уч нафар фуқаро тиббий ниқоб тақмасдан ишлаётганлиги аниқланиб, уларга профилактик тушунтириш ишлари олиб борилди ва маъмурий баённома тузилди. Манғит Деҳқон бозори атрофидаги ошхона-кафелар карантин қоидаларига зид равишда фаолият юритаётгани етмагандай, хизматчилари махсус кийим, қўлқопларсиз хизмат кўрсатишаяпти, тиббий ниқобларни ҳам нотўғри тақишган. Бу ҳақда ҳам маъмурий баённома тузилиб, тегишли тартибда жавобгарлик белгиланди. Шунингдек, Буюм бозорида назорат тадбирлари давом эттирилганида баъзи сотувчилар тиббий ниқобсиз фаолият юритаётганликлари, бозорга келган баъзи фуқаролар ниқобни қоидага риоя қилмасдан тақса, баъзилари умуман ниқобсиз юришгани аниқ бўлди. Бозор кириш эшиги олдига махсус дезинфекцион барьер ўрнатилган. Махсус ходим шахсий ҳимоя кийим ва тепловизор билан таъминланган. Бозор ичида жойлашган Нодира Худойбергановага қарашли кийим тикиш цехи чеварлари эса тиббий ниқобсиз фаолият юритаётганликлари аниқланди. Шунингдек, бозор ҳудудида ҳам тиббий ниқобсиз ҳаракатланаётган бир неча фуқаролар аниқланиб огоҳлантирилди ва профилактик тушунтириш ишлари олиб борилди. Назорат тадбирлари шуни кўрсатдики, коронавирус пандемиясига қарши кураш чораларига ҳамма ҳам бирдай амал қилмаяпти.
Юртимизда коронавирус пандемияси тезроқ бартараф этилиб, тинч-осойишта кунларга етишни ҳаммамиз ҳам чин кўнгилдан истаймиз, шунга умид қиламиз. Бунинг учун эса ҳамжиҳатликда, карантин қоидаларига қатъий амал қилган ҳолда курашишимиз лозимлигини ҳам унутмайлик!
Ойгул РАЖАБОВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
