САЙЛОВГА МУНОСИБ ТАЙЁРГАРЛИК КЎРИЛМОҚДА

Шу йил 20 сентябрь якшанба куни Халқ депутатлари Амударё туман Кенгашида бўшаб қолган ўринларга бўлиб ўтадиган сайловларга 24-Оқ олтин ва 28-Дарёбўйи сайлов округларида муносиб тайёргарлик ишлари олиб борилмоқда.  
Ўтган 2019 йилда қабул қилинган Сайлов кодекси мамлакатимиз сиёсий ҳаётида муҳим аҳамият касб этадиган сайлов жараёнларини мукаммал даражада ташкил қилиш, сайловларни очиқ, ошкоралик тамойилларига асосланган ҳолда ўтказиш, шунингдек, сайлов қонунчилиги асосларини янада мустаҳкамлаш борасида муҳим ҳужжат бўлди. Сайлов кодексининг қабул қилиниши билан сайлов қонунчилигида кўплаб ўзгаришлар киритилди. Шундай ўзгаришлардан бири сифатида айтиш мумкинки, аввал участка сайлов комиссияларининг аъзолари жамоатчиликнинг обрўли вакиллари орасидан тайинланади, деб белгилаб қўйиш билан чекланилган бўлса, энди Кодекснинг 23-моддасига асосан участка сайлов комиссияси аъзолигига номзодлар фуқароларнинг ўзини ўзи бошқариш органлари, жамоат бирлашмалари, корхоналар, муассасалар ва ташкилотлар томонидан таклиф этилиши мустаҳкамлаб қўйилди.
Ушбу қонун ҳужжатида белгиланган тамойилларга асосланган ҳолда ташкил қилинаётган Халқ депутатлари Амударё туман Кенгашида бўшаб қолган ўринларга сайлов ўтказиш учун 2 та сайлов округи ва 4 та сайлов участкалари ташкил қилинган бўлиб, шундан 28-Дарёбўйи сайлов округи таркибига 131-сайлов участкаси ҳамда 132-сайлов участкалари киради.
131-сайлов участкасининг участка сайлов комиссияси Қипчоқ шаҳарчасида 1-сонли касб-ҳунар мактаби биносида жойлашган бўлиб, участка чегаралари Қипчоқ шаҳарча фуқаролар йиғини ҳудудида жойлашган барча турар жойлар ҳамда Дарёбўйи маҳалла фуқаролар йиғинидаги Тараққиёт аҳоли пункти жанубий қисмидаги 75 та турар жойлардан бошқа барча турар жойлар қамраб олинган. Мазкур сайлов участкасидаги сайлов ҳуқуқига эга бўлган жами сайловчилар сони 2751 нафарни ташкил қилади.
Шунингдек, сайлов округи таркибидаги 132-сайлов участкасининг участка сайлов комиссияси Бештом маҳалласидаги 24-сонли мактаб биносида жойлашган бўлиб, унга фуқаролар йиғини ҳудудидаги Бештом ва Хўжакўл аҳоли пунктларида жойлашган турар жойлар киради. Мазкур ҳудудлардаги сайлаш ҳуқуқига эга бўлган сайловчилар сони 1464 нафардан иборат.
Халқ депутатлари туман Кенгаши депутатлигига 28-Дарёбўйи сайлов округида 3 нафар номзодлар рўйхатга олинган бўлиб, улар аҳоли билан таништирилмоқда. округ сайлов комиссияси аъзолари сайловга муносиб тайёргарлик кўришмоқда. Мазкур округ сайлов комиссияси Қипчоқ шаҳарча фуқаролар йиғини биносида фаолият олиб бормоқда. Ушбу округ ҳудудига Қипчоқ шаҳарчаси, Дарёбўйи ва Бештом маҳалла фуқаролар йиғинлари аҳолиси қамраб олинган.
28-Дарёбўйи сайлов округида 2 та сайлов участкалари ташкил этилган бўлиб, улардаги сайлаш ҳуқуқига эга бўлган  жами сайловчилар сони – 4215 (тўрт минг икки юз ўн беш) нафардан иборат.
Туман сайлов комиссиясининг қарори билан тузилган 2 та сайлов округи ҳамда улардаги сайлов участкаларида сайлов жараёнига пухта тайёргарлик кўрилди. Бинолар зарурий жиҳозлар, сайловга оид қўлланмалар билан таъминланиб, атрофлари ободонлаштирилди.
Мазкур сайлов округларида депутатликка номзодларга ва уларнинг ишончли вакилларига сайловолди ташвиқотини олиб боришда сайловчилар билан учрашувлар ўтказиш учун тенг шароитлар берилди. Сайловчилар билан учрашувлар номзодлар ва уларнинг ишончли вакиллари томонидан мустақил равишда ўтказилди. Номзодлар ҳар бир учрашувда сайловчиларга партия ва ўзининг сайловолди дастурида белгиланган вазифалар, уларни амалга ошириш йўллари ҳақида батафсил маълумот бериб бордилар. Уларнинг сайловолди дастуридаги партия ғоялари билан уйғун ҳолда илгари сурилган ташаббуслар сайловчиларда катта таассурот қолдирди.
Ушбу ҳудудлардаги сайловчилар ўзлари танлаган номзодларга овоз бериш учун сайлов кунига қизғин тайёргарлик кўришмоқда.

Чарос Арслонова, туман ҳокимлигининг Ахборот хизмати раҳбари.