ФАВҚУЛОДДА ВАЗИЯТЛАРДА ФУҚАРО МУҲОФАЗАСИНИ ТАЪМИНЛАШ БЎЙИЧА ТАКТИК ЎҚУВ-МАШҒУЛОТЛАРИ ЎТКАЗИЛДИ

Ҳаёт фаолияти давомида халқимизнинг  хавфсизлигини таъминлаш, инсон ҳаёти ва фаолияти учун қулай шароит, яъни инсонлар томонидан шакллантирилган муҳитни ва ишлаб чиқаришда меҳнат муҳофазасини ташкил этиш, атроф-муҳитга техноген таъсирларни камайтириш муҳим аҳамият касб этади. Замонавий техник воситалардан, назорат усулларидан ҳамда маълумот ва мавжуд вазиятлардан оқилона фойдаланиш ҳисобига инсон ҳаёти ва соғлигини асраш билан  боғлиқ комплекс вазифаларни адо этишда Фавқулодда вазиятлар Бошқармаси, ходимлари томонидан бажариладиган ишлар бу борада алоҳида ўрин тутади.

Хусусан, турли кўринишдаги хавф-хатарлар, яшаш муҳити хавфлари, хавфли табиий ҳодисалар, йўл-траспорт ҳаракатига оид, шунингдек, электр ускуналаридан фойдаланиш бўйича техника хавфсизлиги қоидаларининг бузилиши, ёнғин хавфи инсон ҳаётини хавф остида қолдиради. Бундай фавқулодда ҳодисалар содир бўлганда фуқаролар муҳозафасини таъминлаш, хавфни бартараф этиш чораларининг тезкорлик билан кўрилиши кўплаб фалокатларнинг олди олинишини таъминлайди.

21 октябрь куни туман Фавқулодда вазиятлар бўлими томонидан “Жайхун мобиль газ” масъулияти чекланган жамияти тактик ўқув-машғулоти ўтказилди. Тадбирга жами 63 та шахсий таркиб ва 12 та техника жалб қилинди. Мазкур тактик ўқув-машғулотида “Жайхун мобиль газ”  масъулияти чекланган жамиятида фавқулодда вазият содир бўлганда, ёнғин келиб чиққанда, техника хавфсизлиги қоидаларига риоя қилинмаганда, электр ускуналаридан нотўғри фойдаланганда, шунингдек, ис газидан заҳарланиш ҳолатлари каби инсон ҳаётий фаолияти билан боғлиқ хавф-хатарлар юз берганда туман Фавқулодда вазиятлар Бошқармаси ва давлат  ташкилотлари ходимларининг ҳамкорликдаги ҳаракатлари амалий машқлар орқали кўрсатиб берилди.

Шунингдек, Амударё пахта тозалаш заводида ҳам ана шундай тактик ўқув-машғулоти ўтказилди. Унда 51 та шахсий таркиб аъзолари, 14 та техника воситалари иштирок этди. Машғулотларда мазкур саноат корхонаси ҳудудида табиий ҳамда техноген хусусиятли фавқулодда вазиятлар, инсон фаолияти билан боғлиқ турли кўринишдаги хавф-хатарлар, хусусан, ёнғин чиққанда, техника хавфсизлиги қоидалари бузилганда, электр узатиш тизимларидан нотўғри фойдаланганда, ис газидан заҳарланганда Фавқулодда вазиятлар бошқармаси ҳамда давлат ташкилотлари томонидан амалга ошириладиган тезкор ҳаракатлар амалий машқлар орқали намойиш этилди.

Шу куни Қипчоқ пантон кўпригида ҳам 51 та шахсий  таркиб ва 11 та техника жалб қилинган ҳолда тактик ўқув-машғулотлари ўтказилди. Туман Фавқулодда вазиятлар бошқармаси давлат ташкилоти ҳамкорлигидаги тактик  ўқув-машғулотларида Амударё устига қурилган пантон кўпригида  фавқулодда ҳодисалар содир бўлганда мавжуд вазиятдан келиб чиқиб амалга ошириладиган қутқарув ишлари, офатни бартараф  этиш чоралари бўйича амалий машқлар ўтказилди. Хусусан, пантон кўпригида фалокатли ҳолатлар кузатилганда, ёнғин хавфи, электр ускуналаридан нотўғри фойдаланиш, шунингдек, кўприк ҳудудида муз тиқилганда сув тошқини  юз берганда амалга ошириладиган тезкор қутқарув ишлари амалий машқлар орқали кўрсатилди.

Бу каби тактик ўқув-машғулотларини ўтказишдан кўзланган мақсад, халқимизнинг саломатлиги, тинч-осойишталиги ҳамда мамлакат, шу жумладан туманимиз иқтисодий тараққиётини таъминлашга ҳисса қўшишдир.

Тактик ўқув-машғулотларида йўл қўйилган камчиликлар ҳам алоҳида қайд этилиб, келгусида  бундай нуқсонларга йўл қўймаслик юзасидан зарур тушунча ва тавсиялар берилди.

Робия ЙЎЛДОШЕВА.