ЙЎЛ-ТРАНСПОРТ ҲОДИСАЛАРИНИНГ ОЛДИНИ ОЛИШГА БАҒИШЛАНГАН ЙИҒИЛИШ ЎТКАЗИЛДИ

Ҳаёт тасодифларга тўла. Эрталаб ўз кундалик ташвишлари билан уйидан кўчага чиқиб кетаётган одам ўзини олдинда нималар кутаётганини ҳеч қачон билмайди. Бухоро вилоятининг Когон туманида яшовчи бир юртдошимиз ҳам ўз яшаш жойидан юзлаб чақирим олисда, Амударё туманининг “Қипчоқ-Манғит-Туркманистон” чегара йўли бўйлаб ҳаракатланиб бораётганида автоҳалокатга учради. Ушбу автоҳалокат оқибатида ҳаётдан кўз юмишини билганида, балки у олис йўлга чиқмаган бўлар эди. Лекин афсуски, бу фалокат содир бўлди ва ушбу фуқаро бизнинг туманимизда, туман Тиббиёт бирлашмасининг жонлантириш бўлимида ҳушига келмасдан вафот этди.

Жорий йилнинг 20 октябрь санасида, Қипчоқ овул фуқаролар йиғини маъмурий биносида бўлиб ўтган мутасадди идоралар раҳбарлари, Қипчоқ овули масъуллари ва овул фаоллари, кенг аҳоли вакиллари иштирокидаги йиғилишда айнан ана шу  йўл-транспорт ҳодисаси оқибатлари муҳокама этилди.

Туман ҳокимининг ўринбосари, Маҳалла ва оилани қўллаб-қувватлаш бўлими бошлиғи Алишер Йўлдошев раислигида ўтказилган мазкур йиғилишни Қипчоқ овул фуқаролар йиғини раиси Соатбой Наметов очди ва йиғилганларни кун тартибидаги асосий масала – “Қипчоқ-Манғит-Туркманистон” чегараси йўлида 2020 йил 16 октябрь куни юз берган йўл-транспорт ҳодисаси ва келгусида шу каби кўнгилсиз ҳолатлар содир бўлишининг олдини олиш чора-тадбирлари ҳақида қисқача тўхталиб ўтди.

Шундан сўнг, туман Ички ишлар бўлими бошлиғи подполковник Улуғбек Худойберганов йиғилиш кун тартибидаги масаланинг ўта муҳимлиги, мамлакатимизда инсон ўлимига сабаб бўладиган йўл-транспорт ҳодисаларининг кўпайиб бораётгани, бунга асосан транспорт бошқарувчилар, шу билан бирга оддий йўловчиларнинг эътиборсизликлари сабаб бўлаётгани, аҳоли зич яшайдиган ҳудудлардан ўтувчи автомобиль йўллари бўйича зарур йўл белгилари ўрнатиш масаласига эътиборсизлик билан қаралаётгани, жуда кўпчилик ҳолатларда автотранспорт воситалари ҳайдовчилари мавжуд йўл белгиларига аҳамият бермасликлари хусусида ҳаётий мисоллар орқали зарур  маълумотлар берди.

Туман ҳокимининг ўринбосари, Маҳалла ва оилани қўллаб-қувватлаш бўлими бошлиғи, Алишер Йўлдошев содир этилаётган йўл-транспорт ҳодисаларининг олдини олишда жамоат ташкилотлари, маҳалла ва таълим муассасаларининг ўзаро ҳамкорлигини таъминлаш муҳим аҳамиятга эга эканлигини таъкидлади. Шу билан бирга туманимиз  аҳолиси орасида маст ҳолда автотраспорт бошқариш ҳолатлари кузатилаётгани, оқибатда йўл-траспорт ҳодисалари юз бераётгани, кўпчилик ҳайдовчилар йўл ҳаракати қоидаларини яхши билмасликлари, билганлари эса бу белгиларга эътибор қилмасликлари туфайли бахтсиз ҳодисалар юз бераётганини таъкидлади.

Туман Ички ишлар бўлимининг йўл ҳаракати хавфсизлик хизмати бўлими бошлиғи Дилшод Аминов бу каби кўнгилсиз ҳодисаларнинг содир бўлмаслиги учун йўл ҳаракати қоидабузарликларига нисбатан кескин чоралар кўриш, туманимиз ҳудудида ҳуқуқбузарликларнинг олдини олишга қарши кураш чораларидан энг афзали бу масалада кенг жамоатчиликнинг фаоллигини, йўловчи маданиятини ошириш эканлиги, айниқса, аҳоли зич яшайдиган ҳудудлардаги йўл бўйларига янгидан махсус белгилар ўрнатиш зарурлигини таъкидлади.

Шунингдек, йиғилишда Қипчоқ овули фаоллари ҳам сўзга чиқишиб, ўз фикр-мулоҳазаларини билдиришди. Йиғилиш кунида муҳокама этилган масала юзасидан тегишли қарор қабул қилинди.

Робия ЙЎЛДОШЕВА.