БОҒ МАҲАЛЛАСИДА САЙЁР ҚАБУЛ ЎТКАЗИЛДИ

Бугунги кунда инсонлар билан мулоқот қилиш, аҳолини қийнаётган муаммоларни ўрганиш, уларни бартараф қилишда, ижобий ҳал қилишда амалий ёрдам бериш мақсадида мутасадди раҳбарларнинг жойларда ташкил қилаётган сайёр қабуллари муҳим аҳамият касб этмоқда. Бу эса ўз навбатида, мутасадди раҳбарларнинг, айниқса, ҳудудларни ижтимоий-иқтисодий ривожлантириш мақсадида ташкил қилинган секторлар раҳбарлари томонидан амалга оширилаётган ишларда яққол намоён бўлмоқда.
17 октябрь куни туман прокурори раҳбарлик қилаётган 2-сектор ҳудудидаги Боғ маҳалласида аҳоли муаммоларини ўрганиш, уларга тегишли ташкилотлар билан ҳамжиҳатликда ечим топиш, фуқароларга муносиб ҳаёт шароитларини яратиб, рози қилиш мақсадида сайёр қабул ўтказилди. Сайёр қабулда туман прокурори ёрдамчиси Улуғбек Аллабергенов, тумандаги корхона-ташкилотлар, фуқаролар йиғини масъуллари ҳамда аҳоли вакиллари, маҳалла фаоллари иштирок этдилар.
Шу ўринда таъкидлаш жоизки, сўнгги йилларда мамлакатимизда ҳудудларни комплекс ижтимоий-иқтисодий ривожлантириш, аҳолининг яшаш шароитларини тубдан яхшилаш, турмуш даражасида сезиларли ижобий ўзгаришларга эришиш бўйича изчил чора-тадбирлар амалга оширилмоқда. Ушбу мақсадда ҳудудларни секторларга бўлиб ишни ташкил этиш тизимининг жорий этилганлиги халқ билан манзилли мулоқотнинг йўлга қўйилишига имкон яратди.
Айтиш жоизки, мурожаатлар билан ишлаш, аҳоли муаммоларини аниқлаш ва ҳал этиш бўйича ҳамкорлик қилиш мақсадида йўлга қўйилган “маҳалла – сектор – Халқ қабулхонаси – маҳалла”  тизими халқ билан мулоқот қилишда ўз самарасини бермоқда. Жумладан, ушбу тизим ҳудудларни комплекс ижтимоий-иқтисодий ривожлантириш, уйма-уй юриш, ижтимоий ва бошқа объектларни ўрганиш орқали муаммоларни аниқлаш ва ҳамкорликда бартараф этиш чораларини кўриш, таъсирчан жамоатчилик назоратини ўрнатишда муҳим аҳамият касб этмоқда.
Туманимиздаги 2-сектор ҳамда Ўзбекистон Республикаси Президентининг Амударё туманидаги халқ қабулхонаси ҳамкорлигида Боғ маҳалласида ўтказилган сайёр қабулда фуқаролар томонидан турли масалаларга оид мурожаатлар келиб тушди. Хусусан, юртдошларимиз ҳудуддан оқиб ўтувчи Боғ каналидан томорқа ерларини суғориш мақсадида мазкур каналдан сув олишда фойдаланилиб келинаётган трубани 1 метр пастга туширишда, маҳалла ҳудудида яшовчи аҳолини ҳамда 13-сонли умумтаълим мактаби биносини электр энергияси билан таъминлаб турган трансформаторларни янги трансформаторга алмаштиришда, шунингдек, юқори кучланишдаги электр симлари ўтган симёғочларни янгисига алмаштиришда амалий ёрдам беришларини сўраб мурожаат қилдилар.
Қолаверса, қабул жараёнида тадбиркорлик фаолияти билан шуғулланиш учун кредит маблағи олишда, ўз бандлигини таъминлашда, маҳалла ҳудудидан ўтувчи йўлларни таъмирлашда, ҳудудда дорихона қурилиши учун ер майдони ажратилишида амалий ёрдам кўрсатиш бўйича мурожаатлар ҳам келиб тушди.
Aҳоли томонидан берилган ушбу мурожаатлар ўрганилиб, тегишли масъул ташкилотларлар билан ҳамкорликда ҳал қилинадиган бўлди. Қабул жараёнида юртдошларимиз томонидан берилган саволларга тўлиқ, ҳаётий мисоллар билан жавоб берилди.
Айтиш керакки, халқ дарди, муаммоларини ўрганишга эътибор қаратиш, уларнинг ҳал этилишига ёрдам кўрсатиш фуқароларнинг жамиятга ишончи ортишига, ҳаёт даражаси, яшаш тарзи  яхшиланишига хизмат қилади.  

Чарос Арслонова, туман ҳокимлигининг Ахборот хизмати раҳбари.